കാസര്‍ഗോഡ് : ഉറങ്ങിക്കിടന്ന 10 വയസുകാരിയെ തട്ടിക്കൊണ്ട് പോയി പീഡിപ്പിച്ച പ്രതിയെ തേടി പോലീസ്. അന്വേഷണത്തിനായി 25 അംഗങ്ങളുളള പോലീസ് സംഘത്തെ നിയോഗിച്ചു. സംഭവത്തിന്റെ ഞെട്ടലിലാണ് ബന്ധുക്കളും നാട്ടുകാരും. കുട്ടിയുടെ വീടുമായി അടുപ്പമുളള ആളായിരിക്കാം ഈ ക്രൂരകൃത്യത്തിന് പിന്നിലെന്ന് സംശയിക്കുന്നു. അപ്പൂപ്പന്റെ അടുത്തായിരുന്ന കുട്ടി സ്ഥിരം കിടന്നിരുന്നത്. അതിരാവിലെ അപ്പൂപ്പന്‍ പാല് കറക്കാനായി എഴുന്നേറ്റ് പോകുമായിരുന്നു. ഇത് പ്രതി മനസ്സിലാക്കിയിരുന്നൂവെന്നാണ് കരുതുന്നത്.
സംഭവത്തില്‍ പോലീസ് അന്വേഷണം ഊര്‍ജിതമാക്കിയിട്ടുണ്ട്. കണ്ണൂര്‍ റേഞ്ച് ഡിഐജി തോംസണ്‍ ജോസ്, ജില്ലാപോലീസ് മേധാവി പി.ബിജോയുടെ നേതൃത്വത്തിലുളള പോലീസ് സംഘവും സ്ഥലത്തെത്തി അന്വേഷണം ആരംഭിച്ചു.
സംഭവത്തിന്റെ ആഘാതത്തില്‍ നിന്ന് കുട്ടി ഇതുവരെ മോചിതയായിട്ടില്ല. കുട്ടിയെ തട്ടിയെടുത്ത് അടുക്കള വാതില്‍ വഴി പുറത്ത് 500 മീറ്റര്‍ അകലെ കൊണ്ട് പോയി ലൈംഗികാതിക്രമം നടത്തുകയും കമ്മല്‍ കവര്‍ന്നെടുക്കുകയും ചെയ്യുകയായിരുന്നു. മെലിഞ്ഞ ശരീരപ്രകൃതിയുളള ആളാണ് ഉപദ്രവിച്ചതെന്ന് കുട്ടി മൊഴി നല്‍കി. പ്രതി മലയാളത്തിലാണ് സംസാരിച്ചത്. കുട്ടിക്ക് തിരികെ പോകാനുളള വഴിയും കാണിച്ചുകൊടുത്തിട്ടാണ് പ്രതി കടന്നുകളഞ്ഞത്. എന്നാല്‍ പേടിച്ച് അവശയായ കുട്ടി മറ്റൊരു വീട്ടിലേക്ക് ഓടിക്കയറുകയായിരുന്നു. ആ വീട്ടുകാരാണ് കുട്ടിയുടെ അച്ഛനെ വിവരം അറിയിച്ചത്. കുട്ടി ഇപ്പോള്‍ കാഞ്ഞങ്ങാട് ആശുപത്രിയില്‍ ചികിത്സയിലാണ്. സിസിടിവി കേന്ദ്രീകരിച്ച് പോലീസ് അന്വേഷണം ആരംഭിച്ചു. പ്രതി ഉടന്‍ വലയിലാവുമെന്നാണ് സൂചന.
