മുൻപൊക്കെ അടുക്കളകളില്‍ സ്ഥിരമായി ഉപയോഗിച്ചിരുന്നത് മണ്‍പാത്രങ്ങളായിരുന്നു. പിന്നീട് കാലം മാറിയതോടെ അവ ലോഹപാത്രങ്ങള്‍ക്കും, പിന്നീട് നോൺസ്റ്റിക്ക് പാത്രങ്ങൾക്കും വഴി മാറി. ഇപ്പോഴിതാ ഇന്ത്യയുടെ ഉന്നത ആരോഗ്യ സ്ഥാപനമായ ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ഐസിഎംആർ) നോൺസ്റ്റിക്ക് പാത്രങ്ങൾക്കെതിരെ മുന്നറിയിപ്പ് നൽകിയിരിക്കുകയാണ്. ഐസിഎംആർ ൻ്റെ കീഴിൽ പ്രവർത്തിക്കുന്ന ഹൈദരാബാദ് ആസ്ഥാനമായുള്ള നാഷണൽ ഇൻസ്റ്റിറ്റ്യൂട്ട് ഓഫ് ന്യൂട്രീഷൻ (NIN) അടുത്തിടെ പുറത്തിറക്കിയ ഇന്ത്യക്കാർക്കുള്ള ഭക്ഷണ മാർഗ്ഗനിർദ്ദേശങ്ങളിലാണ് ഈ മുന്നറിയിപ്പ്.
നോൺസ്റ്റിക്ക് പാത്രങ്ങളുമായി ബന്ധപ്പെട്ട ആരോഗ്യഅപകടങ്ങളില്‍ ഹോർമോൺ അസന്തുലിതാവസ്ഥ, കാൻസർ തുടങ്ങിയവ ഉള്‍പ്പെടുന്നതായി ഗവേഷണങ്ങള്‍ തെളിയിച്ചിട്ടുണ്ട്.
സാധാരണയായി ടെഫ്ലോൺ എന്നറിയപ്പെടുന്ന പോളിടെട്രാഫ്ലൂറോഎത്തിലീൻ (PTFE) ആണ് നോൺസ്റ്റിക്ക് പാത്രങ്ങളിലെ പ്രധാനവില്ലന്‍. കാർബൺ, ഫ്ലൂറിൻ ആറ്റങ്ങൾ അടങ്ങിയ ഒരു സിന്തറ്റിക് രാസവസ്തുവാണ് ഇത്. 170 ഡിഗ്രി സെൽഷ്യസിനു മുകളിലുള്ള ഉയർന്ന ഊഷ്മാവിൽ പാകം ചെയ്യുമ്പോൾ, പോറലുകള്‍ ഉള്ള നോൺസ്റ്റിക്ക് പാത്രങ്ങള്‍, ഉയർന്ന അളവിൽ വിഷ പുകകളും ദോഷകരമായ രാസവസ്തുക്കളും മൈക്രോ പ്ലാസ്റ്റിക്കുകളും ഭക്ഷണത്തിലേക്ക് പുറപ്പെടുവിക്കുമെന്ന് ഐസിഎംആർ പറയുന്നു
.
മൈക്രോപ്ലാസ്റ്റിക്സ് എൻഡോക്രൈൻ തടസ്സപ്പെടുത്തുന്നവയാണ്. അവ ഹോർമോൺ അസന്തുലിതാവസ്ഥയ്ക്കും പ്രത്യുൽപാദന പ്രശ്‌നങ്ങൾക്കും കാരണമാകും, കൂടാതെ കാൻസറിനുള്ള സാധ്യത വർദ്ധിപ്പിക്കുകയും ചെയ്യും.
ഇവയ്ക്ക് പകരം, മണ്‍പാത്രങ്ങള്‍ ഉപയോഗിക്കാന്‍ റിപ്പോര്‍ട്ട് ശുപാര്‍ശ ചെയ്യുന്നു. ഇവയിൽ പാചകം ചെയ്യുന്നതിന് കുറച്ച് എണ്ണ മാത്രമേ ആവശ്യമുള്ളൂ എന്ന് മാത്രമല്ല, തുല്യമായ ചൂട് വിതരണം കാരണം അവ ഭക്ഷണത്തിന്റെ പോഷക സന്തുലിതാവസ്ഥ നിലനിർത്തുകയും ചെയ്യുന്നു. പാചകം ചെയ്യാന്‍ ഏറ്റവും സുരക്ഷിതമായ ഓപ്ഷനാണ് മണ്‍പാത്രങ്ങള്‍.
കൂടാതെ, ഫുഡ് ഗ്രേഡ് സ്റ്റെയിൻലെസ് സ്റ്റീലിൽ പാകം ചെയ്ത ഭക്ഷണവും സുരക്ഷിതമായ ഓപ്ഷനാണ്. വൃത്തിയാക്കുകയും നന്നായി പരിപാലിക്കുകയും ചെയ്താൽ സെറാമിക് പാത്രങ്ങൾ സുരക്ഷിതമാണ്. ചട്ണി, സാമ്പാർ തുടങ്ങിയ അസിഡിറ്റി ഉള്ള ഭക്ഷണങ്ങൾ അലുമിനിയം, ഇരുമ്പ് എന്നിവയിൽ സൂക്ഷിക്കുന്നത് സുരക്ഷിതമല്ല എന്നും ഇതില്‍ പറയുന്നു.
എങ്ങനെ സുരക്ഷിതമായി ഉപയോഗിക്കാം
ശൂന്യമായ പാൻ മുൻകൂട്ടി ചൂടാക്കുന്നത് ഒഴിവാക്കണം, കാരണം അത് വളരെ വേഗത്തിൽ ചൂടാകുകയും ഇത് വിഷ പുകകൾ പുറത്തുവിടുകയും ചെയ്യും.
ചെറിയ തീയിൽ പാകം ചെയ്യുന്നതാണ് അനുയോജ്യം.
നോൺ-സ്റ്റിക്ക് പാനുകളിൽ പാചകം ചെയ്യുമ്പോൾ ചിമ്മിനി അല്ലെങ്കിൽ എക്‌സ്‌ഹോസ്റ്റ് ഫാൻ ഉപയോഗിക്കുന്നത് നല്ലതാണ്.
കഴുകുമ്പോൾ നോൺ-സ്റ്റിക്ക് കോട്ടിങ് പോകാതെ മൃദുവായ സ്പോഞ്ചും സോപ്പും ചൂടുവെള്ളവും ഉപയോഗിച്ച് കഴുകാം
നോൺസ്റ്റിക്കിന്റെ കോട്ടിങ് നശിക്കുമ്പോൾ കുക്ക് വെയർ മാറ്റാം.
സ്റ്റെയിൻലെസ് സ്റ്റീൽ, കാസ്റ്റ് ഇരുമ്പ്, കല്ല്, സെറാമിക് കുക്ക്വെയർ എന്നിവയിൽ പാചകം ചെയ്യുന്നതാണ് നല്ലത്
