തൃശ്ശൂർ: തൃശ്ശൂരിലെ കുതിരാനിൽ വൻ ലഹരി വേട്ടയിൽ. 42 ഗ്രാം എംഡിഎംഎ യും,ബ്ലൂ എക്സ്റ്റേസി ഗുളികകളും പിടികൂടി. മയക്കുമരുന്ന് കടത്തിയ തൃശ്ശൂർ പൂത്തോൾ സ്വദേശി വിഷ്ണുവിനെ പോലീസ് അറസ്റ്റ് ചെയ്തു.
ഇന്ന് പുലർച്ചെയാണ് രഹസ്യ വിവരത്തെ തുടർന്ന് ലഹരി വിരുദ്ധ സ്ക്വാഡും പോലീസും കർശന പരിശോധന നടത്തിയത്. ബാംഗ്ലൂരിൽ നിന്നും ബസ് മാർഗ്ഗമാണ് ഇയാൾ മയക്കുമരുന്ന് തൃശ്ശൂരിൽ എത്തിച്ചത്. കുതിരാൻ ഭാഗത്ത് ബസ്സിറങ്ങിയ ഇയാളെ പോലീസ് എത്തി പിടികൂടുകയായിരുന്നു . 42ഗ്രാം എം.ഡി.എം.എ യും, എം.ഡി.എം.എ യുടെ ഗുളിക രൂപമായ ബ്ലൂ എക്സ്റ്റേസി ഗുളികകളും ഇയാളിൽ നിന്നും കണ്ടെടുത്തു. തൃശ്ശൂർ സിറ്റി ലഹരി വിരുദ്ധ സ്ക്വാഡും, പീച്ചി പോലീസും ചേർന്നാണ് പ്രതിയെ പിടികൂടിയത്. പിടിയിലായ വിഷ്ണു നേരത്തെയും ലഹരി കേസിൽ ഉൾപ്പെട്ടിട്ടുള്ള ആളാണെന്ന് പോലീസ് പറഞ്ഞു. വാളയാറിൽ നിന്നും, തൃശൂർ റെയിൽവേ സ്റ്റേഷനിൽ നിന്നും കഞ്ചാവുമായി ഇയാളെ മുൻപും പിടികൂടിയിട്ടുണ്ട്.
മണ്ണുത്തി, മുക്കാട്ടുകര, നെല്ലങ്കര തുടങ്ങി തൃശ്ശൂർ നഗരത്തിന്‍റെ പ്രാന്ത പ്രദേശങ്ങളിൽ വിതരണം ചെയ്യാൻ കൊണ്ടുവന്നതാണ് മയക്കുമരുന്ന് എന്ന് പോലീസ് അറിയിച്ചു. ഇയാൾക്ക് ബാംഗ്ലൂരിൽ എവിടെ നിന്നുമാണ് മയക്കുമരുന്ന് ലഭിക്കുന്നതെന്നും, ആരാണ് സാമ്പത്തിക സഹായം നൽകുന്നതെന്നുമുള്ള വിവരങ്ങൾ പോലീസ് അന്വേഷിച്ചു വരുന്നു.
