ചാഴൂര്‍: തെക്കേ ആലിനു സമീപം നിയന്ത്രണം വിട്ട കാര്‍ തട്ടു കടയിലേക്ക് ഇടിച്ചു കയറി ഒരാള്‍ മരിച്ചു. അപകടത്തില്‍ രണ്ട് പേര്‍ക്ക് പരിക്കേറ്റു. പഴുവില്‍ വെസ്റ്റ് കൊറ്റംകുളത്തിന് സമീപം താമസിക്കുന്ന വേളൂക്കര ഗോപി (61) ആണ് മരിച്ചത്. ചാഴൂര്‍ ചിറമ്മല്‍ സിജോ (43), ചാഴൂര്‍ കിഴക്കേപ്പുരയ്ക്കല്‍ ശ്രീധരന്‍ (59) എന്നിവര്‍ക്കാണ് പരിക്കേറ്റത്. ഞായറാഴ്ച രാവിലെ 6.15 ഓടെയാണ് അപകടം. സമീപത്തെ ചായക്കടയില്‍ നിന്നും ചായ കുടിച്ച് തട്ടുകടയുടെ മുന്‍പില്‍ പത്രം വായിച്ച് കൊണ്ടിരുന്നവരുടെ ഇടയിലേക്ക് നിയന്ത്രണം വിട്ട കാര്‍ ഇടിച്ചു കയറുകയായിരുന്നു.
പെരിങ്ങോട്ടുകര ഭാഗത്ത് നിന്നും വന്നിരുന്നതാണ് കാര്‍. ഡ്രൈവര്‍ ഉറങ്ങിപ്പോയതാകാം അപകടത്തിനു കാരണമെന്ന് കരുതുന്നു. മൂവരേയും പെരിങ്ങോട്ടുകര സര്‍വ്വതോ ഭദ്രം ആംബുലന്‍സ് പ്രവര്‍ത്തകര്‍ തൃശൂര്‍ എലൈറ്റ് ആശുപത്രിയില്‍ എത്തിച്ചെങ്കിലും ഗോപിയുടെ ജീവന്‍ രക്ഷിക്കാനായില്ല.
