തെലങ്കാനയിലെ നിസാമാബാദ് ജില്ലയിലെ നവിപേട്ട് പ്രദേശത്ത് ഓഗസ്റ്റ് 28-നാണ് സംഭവം നടന്നത്. വിവാഹ സൽക്കാരത്തിന് ഭക്ഷണം വിളമ്പിയതുമായി ബന്ധപ്പെട്ടാണ് തമ്മിലടി. വിവാഹത്തിന് മട്ടൻ കറി വിളമ്പിയത് കുറഞ്ഞുപോയെന്ന് പറഞ്ഞതാണ് തർക്കത്തിന് കാരണമായത്.
പ്രതീക്ഷിച്ചതിലും കുറഞ്ഞ മട്ടൻ കറി വിളമ്പിയതിനെ വരന്റെ ഭാഗത്തുള്ള ചിലർ ചോദ്യം ചെയ്തു. കൂടാതെ, വരന്റെ ഭാഗത്തെ ഒരു കൂട്ടം യുവാക്കൾ പാചകക്കാരനെ കയ്യേറ്റവും ചെയ്തതോടെ സംഭവം വഷളായി. തുടർന്ന്, ഇരുവിഭാഗങ്ങൾ തമ്മിൽ കല്ലും വടിയും ഉപയോഗിച്ച് ആക്രമിക്കാൻ തുടങ്ങി.
സംഭവത്തിന്റെ വീഡിയോ നിമിഷനേരങ്ങൾക്കുള്ളിലാണ് സമൂഹമാദ്ധ്യമങ്ങളിൽ വൈറലായത്. പ്രശ്നം വഷളായതോടെ നാട്ടുകാരും പൊലീസും ഇടപെട്ടാണ് രംഗം ശാന്തമാക്കിയത്. പരിക്കേറ്റ എട്ടുപേരെ അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. സംഭവത്തിൽ 11 പേർക്കെതിരെ കേസെടുത്തതായും പൊലീസ് പറഞ്ഞു.
