ന്യൂഡല്‍ഹി: മെട്രോ ട്രെയിനിന്റെ വാതിലുകള്‍ക്കിടയില്‍ വസ്ത്രം കുടുങ്ങി പരിക്കേറ്റ യുവതി മരിച്ചു. ഡല്‍ഹി സ്വദേശിയായ റീന (35) എന്ന യുവതിയാണ് ഇന്ദര്‍ലോക് സ്റ്റേഷനില്‍ അപകടത്തില്‍ പെട്ടത്. ഗുരുതരമായി പരിക്കേറ്റ യുവതിയെ സഫ്ദര്‍ജംഗ് ആശുപത്രിയില്‍ പ്രവേശിപ്പിച്ചെങ്കിലും ചികിത്സയ്ക്കിടെ മരിക്കുകയായിരുന്നു.
വ്യാഴാഴ്ചയാണ് അപകടം നടന്നത്. വാതിലുകള്‍ അടയുന്നതിനിടെ റീനയുടെ വസ്ത്രത്തിന്റെ ഒരു ഭാഗം കുടുങ്ങുകയായിരുന്നു. ട്രെയിന്‍ നീങ്ങിയപ്പോള്‍ യുവതി മെട്രോയുടെ അടിയില്‍ പെട്ടു.
വ്യാഴാഴ്ച ഇന്ദര്‍ലോക് മെട്രോ സ്റ്റേഷനില്‍ ഒരു വനിതാ യാത്രക്കാരിയുടെ വസ്ത്രം ട്രെയിനില്‍ കുടുങ്ങി അപകടം സംഭവിച്ചതായും പരിക്കേറ്റ യുവതി ശനിയാഴ്ച ആശുപത്രിയില്‍ വെച്ച് മരണപ്പെട്ടതായും ഡല്‍ഹി മെട്രോ ചീഫ് പബ്ലിക് റിലേഷന്‍സ് ഓഫീസര്‍ അനുജ് ദയാലാണ് സ്ഥിരീകരിച്ചത്. സംഭവത്തെക്കുറിച്ച് മെട്രോ റെയില്‍വേ സുരക്ഷാ കമ്മീഷണര്‍ അന്വേഷണം നടത്തുമെന്നും അദ്ദേഹം വ്യക്തമാക്കി.
പടിഞ്ഞാറന്‍ ഡല്‍ഹിയിലെ നംഗ്ലോയില്‍ നിന്ന് മോഹന്‍ നഗറിലേക്ക് പോകുമ്പോഴാണ് യുവതി അപകടത്തില്‍ പെട്ടതെന്ന് ബന്ധുവായ വിക്കി പറഞ്ഞു. ഏഴു വര്‍ഷം മുന്‍പാണ് റീനയുടെ ഭര്‍ത്താവ് മരിച്ചത്.യുവതിക്ക് ഒരു മകനും ഒരു മകളുമുണ്ട്.
