നാരങ്ങ ഫ്രിഡ്ജിൽ വച്ചാലും പെട്ടന്ന് കേടായി പോകുന്നത് നമ്മൾ അടുക്കളയിൽ നേരിടുന്ന വലിയ പ്രശ്നമാണ്. നാരങ്ങ കേടായി പോകുന്നത് തടയാൻ പല വഴികളും പരീക്ഷിച്ച് തളർന്നവരാണോ നിങ്ങൾ? എങ്കിൽ അനായാസം ഈ പ്രശ്നം പരിഹരിക്കാൻ കുറച്ച് എളുപ്പവഴികൾ പരിചയപ്പെടാം. ഇങ്ങനെ ചെയ്താൽ മാസങ്ങളോളം നാരങ്ങ കേടായി പോകാതെ ഫ്രിഡ്ജിൽ സൂക്ഷിച്ചുവയ്ക്കാവുന്നതാണ്.
- നല്ല നാരങ്ങ വാങ്ങുകയെന്നത് പ്രധാന മാ‌ർഗം. കടകളിൽ നിന്ന് നാരങ്ങ വാങ്ങുമ്പോൾ കേടിലാത്തതാണെന്ന് ഉറപ്പുവരുത്തേണ്ടതുണ്ട്. അതിനായി നാരങ്ങ ചെറുതായി അമർത്തി നോക്കിയതിനുശേഷം മാത്രം വാങ്ങുക. ഇങ്ങനെ ചെയ്യുമ്പോൾ അഴുകിയ നാരങ്ങ ഏതാണെന്ന് പെട്ടെന്ന് മനസിലാക്കാൻ സാധിക്കും.
- ഓരോ നാരങ്ങയും പത്രക്കടലാസിലോ ടിഷ്യൂ പേപ്പറിലോ പൊതിഞ്ഞ് ഫ്രിഡ്ജിൽ സൂക്ഷിക്കുന്നത് ഗുണം ചെയ്യും. ഇങ്ങനെ ചെയ്യുന്നതിലൂടെ നാരങ്ങയിലെ ജലാംശം നിലനിർത്തി ഉണങ്ങി പോകാതിരിക്കാൻ സഹായിക്കും. നാരങ്ങ ഏറെ നാൾ ഫ്രഷായിയിരിക്കും.
- നാരങ്ങാനീരാണ് കൂടുതൽ നാൾ കേടുവരാതെ സൂക്ഷിക്കേണ്ടതെങ്കിൽ അതിനും വഴികളുണ്ട്.നാരങ്ങാനീര് ഒരു ഐസ് ട്രേയിൽ മാറ്റി ഫ്രീസറിൽ സൂക്ഷിക്കുക എന്നതാണ്. ഇങ്ങനെ ചെയ്താൽ നാരങ്ങാനീരിന്റെ ഗുണം നഷ്ടപ്പെടുമെന്ന പേടിയും വേണ്ട.
- നാരങ്ങകൾ നേരിട്ട് ഫ്രിഡ്ജിൽ വയ്ക്കാതെ ഒരു പ്ലാസ്റ്റിക് കുപ്പിയിലോ പാത്രത്തിലോ മാറ്റിയതിനുശേഷം മാത്രം ഫ്രിഡ്ജിൽ സൂക്ഷിക്കുക. അതിനുമുൻപ് പാത്രത്തിന്റെ ഉൾവശത്തായി ഒരു ടിഷ്യൂ പേപ്പർ വിരിക്കാനും മറക്കരുത്.
