- Advertisement -
വാഷിങ്ടണ്‍: അമേരിക്കൻ പ്രസിഡന്‍റിന്‍റെ ഔദ്യോഗിക വസതിയായ വൈറ്റ് ഹൗസിന്‍റെ ഗേറ്റിലേക്ക് വാഹനം ഇടിച്ചു കയറി. സംഭവത്തിൽ ഡ്രൈവറെ സുരക്ഷ ഉദ്യോഗസ്ഥർ കസ്റ്റഡിയിലെടുത്തു.
ആക്രമണമാണോ അപകടം സംഭവിച്ചതാണോ എന്ന് അധികൃതർ വ്യക്തമാക്കിയിട്ടില്ല. വാഹനവും കസ്റ്റഡിയിലെടുത്തിട്ടുണ്ട്. അന്വേഷണം പുരോഗമിക്കുകയാണെന്നും അപകട കാരണം അന്വേഷിക്കുകയാണെന്നും അമേരിക്കൻ രഹസ്യാന്വേഷണ വിഭാഗം വക്താവ് ആന്‍റണി ഗുഗ്ലിയൽമി അറിയിച്ചു.
തിങ്കളാഴ്ച പ്രാദേശിക സമയം വൈകുന്നേരം ആറോടെയായിരുന്നു സംഭവം. ഈ സമയം പ്രസിഡന്‍റ് ജോ ബൈഡൻ വൈറ്റ് ഹൗസിൽ ഉണ്ടായിരുന്നില്ല.
ഡിസംബർ 17ന് ബൈഡന്‍റെ അകമ്പടി വാഹന വ്യൂഹത്തിലേക്ക് ഒരു കാർ ഇടിച്ചു കയറിയിരുന്നു. മദ്യപിച്ച് വാഹനമോടിച്ചതിനാണ് അന്ന് ഡ്രൈവർക്കെതിരെ കേസെടുത്തിരുന്നത്.
