മന്ദൻ എന്ന പേരിൻ്റെ ആദ്യാക്ഷരം ആയ ‘മ’ ഉപയോഗിച്ചാണ് ശനിയെ ഗ്രഹനിലയിൽ അടയാളപ്പെടുത്തുക. മന്ദൻ എന്നുപറഞ്ഞാലും ശനി എന്നുപറഞ്ഞാലും അർത്ഥം പതുക്കെ നടക്കുന്നവൻ / സഞ്ചരിക്കുന്നവൻ എന്നാണ്. (Saturn is represented as a planet by the first letter of the name Mandan, ‘M’. Whether you say Mandan or Shani, they mean one who walks slowly/one who travels. Both are just two names for the same planet!) രണ്ടും ഒരു ഗ്രഹത്തിൻ്റെ ഇരുപേരുകൾ മാത്രം!
360 ഡിഗ്രിയായി ചുറ്റപ്പെട്ടു കിടക്കുന്ന രാശിചക്രത്തിൽ 30 ഡിഗ്രി വീതം വരുന്ന 12 രാശികൾ അടങ്ങിയിട്ടുണ്ട്. നവഗ്രഹങ്ങൾ ഈ രാശിചക്രത്തിലൂടെ സഞ്ചരിക്കുകയാണ്. വ്യത്യസ്ത വേഗതയിലാണ് എന്നുമാത്രം.
ശനി അഥവ മന്ദൻ ആവുമല്ലോ സ്വാഭാവികമായും ഏറ്റവും മെല്ലെ സഞ്ചരിക്കുന്നതെന്ന് ആ പേരിൽ നിന്നും വ്യക്തമാണല്ലോ? ശനി ഇപ്പോൾ സഞ്ചരിക്കുന്നത് കുംഭം രാശിയിലാണ്. ശരാശരി രണ്ടരവർഷക്കാലം അഥവാ മുപ്പതുമാസം ശനി ഒരു രാശിയിൽ സഞ്ചരിക്കും.
2023 ആദ്യമാണ് ശനി കുംഭം രാശിയിൽ പ്രവേശിച്ചത്. ഇപ്പോൾ കുംഭം രാശിയിലെ യാത്ര പൂർത്തിയാക്കി ശനി മീനം രാശിയിലേക്ക് സംക്രമിക്കുകയാണ്. മുപ്പതുവർഷം വേണ്ടി വരും, പന്ത്രണ്ടു രാശികൾ അടങ്ങിയ രാശിചക്രം ശനിക്ക് ഒരുവട്ടം ചുറ്റിവരാൻ. (12 രാശികൾ x രണ്ടര വർഷം = 30 വർഷം). ചിലപ്പോൾ ഇതിന് ചെറിയ കുറവുകൾ വരാം. ഇപ്പോൾ ശനി കുംഭം രാശിയിലെ യാത്ര പൂർത്തിയാക്കുകയാണല്ലോ? ഇനി കുംഭം രാശിയിലെത്താൻ ശരാശരി ഇരുപത്തിയേഴര വർഷം വേണ്ടിവരും എന്നതാണ് കണക്ക്!
ഒരുദാഹരണം പറഞ്ഞാൽ ഇപ്പോൾ 20 വയസ്സുള്ളയാൾക്ക് ശനി കുംഭം രാശിയിൽ വീണ്ടുമെത്തുമ്പോൾ 47 വയസ്സു കഴിയും. 2025 മാർച്ച് 29ന്/ 1200 മീനം 15ന് ശനിയാഴ്ച രാത്രി 10:39 ന് ആണ് ശനി മീനം രാശിയിൽ പ്രവേശിക്കുന്നത്. 2027 പകുതി വരെ, ശരാശരി രണ്ടരവർഷം ശനി ഇനി മീനം രാശിയിൽ സഞ്ചരിക്കുന്നതാണ്.
ജ്യോതിഷത്തിൽ ഗ്രഹങ്ങളുടെ രാശിമാറ്റം കൊണ്ടുള്ള ഫലം (ഗോചര ഫലം അഥവാ ചാരഫലം) പ്രാധാന്യമുള്ളതായി കരുതാറുണ്ട്. പന്ത്രണ്ട് കൂറുകളിൽ, 27 നക്ഷത്രങ്ങളിലായി പിറന്നവരെയെല്ലാം ഗ്രഹങ്ങളുടെ രാശിമാറ്റം പലതരത്തിൽ – ഗുണമായും ദോഷമായും സമ്മിശ്രമായും – ബാധിക്കുന്നു; സ്വാധീനിക്കുന്നു. അവയിൽ ഏറ്റവും പ്രധാനം ശനിയുടെ രാശിമാറ്റവും അതുകൊണ്ടുണ്ടാകുന്ന ഫലങ്ങളുമാണ്.
നവഗ്രഹങ്ങളിൽ ജീവിതത്തെ ഏറ്റവും അധികം മാറ്റിമറിക്കുന്ന ഗ്രഹം ശനിയാണ്. സൂര്യൻ്റെയും ഛായാദേവിയുടെയും പുത്രനാണ് ശനി. ഗ്രഹങ്ങളിൽ സൂര്യൻ, ചന്ദ്രൻ, ചൊവ്വ എന്നിവരോട് ശത്രുതയുണ്ട് ശനിക്ക്. ബുധൻ, ശുക്രൻ എന്നിവർ സുഹൃത്തുക്കൾ. വ്യാഴം സമശീർഷനും.
പുരാണങ്ങളിലെ കഥകളിൽ ശനി ദേവീദേവന്മാരെയും ഇതിഹാസങ്ങളിലെ അത്ഭുത വിക്രമന്മാരെയും നിയന്ത്രിക്കുന്ന കാര്യം വിവരിക്കുന്നുണ്ട്. അവരുടെ ഭാഗധേയങ്ങളെ ശനി തൻ്റെ ചലനത്തിന് അനുസരിച്ച് മാറ്റിമറിക്കുന്നു. ശ്രീകൃഷ്ണന് സ്യമന്തകം രത്നം കട്ടവൻ എന്ന ദുഷ്പ്പേരുണ്ടായത്, ശിവന് ഭിക്ഷാടനം നടത്തേണ്ടി വന്നത്, ശ്രീരാമന് കാട്ടിൽ പോകേണ്ടി വന്നത്, യുധിഷ്ഠിരന് ചുതിൽ എല്ലാം നശിച്ചത് -ഒക്കെ ശനിയുടെ ലീലകളാണെന്ന് ‘ശനിമാഹാത്മ്യം’ കഥകളിൽ നിന്നറിയാം.
ഈ ലേഖനത്തിൽ 2025 മാർച്ച് 29 ന് രാത്രി മുതൽ രണ്ടരവർഷക്കാലം മീനം രാശിയിൽ സഞ്ചരിക്കുന്ന ശനി നമ്മൾ മനുഷ്യരുടെ ജീവിതത്തെ എങ്ങനെയാണ് സ്വാധീനിക്കുന്നതെന്ന ആരായലാണ്. വസ്തുനിഷ്ഠമായ അപഗ്രഥനമാണ്.
അശ്വതി
ജന്മരാശിയുടെ അഥവാ ജനിച്ചകൂറിൻ്റെ പന്ത്രണ്ടാം രാശിയിൽ ശനി പ്രവേശിക്കുമ്പോഴാണ് ഏഴരശ്ശനി തുടങ്ങുക. അശ്വതി നക്ഷത്രം മേടക്കൂറിൽ ഉൾപ്പെടുന്നു. അതിനാൽ മീനം രാശി പന്ത്രണ്ടാം രാശിയാണ്. മീനം, മേടം, ഇടവം എന്നീ രാശികളിൽ ഓരോ രാശിയിലും ക്രമത്തിൽ രണ്ടര വർഷം വീതം ശനി സഞ്ചരിക്കുന്ന ഏഴരവർഷത്തിനാണ് ഇപ്പോൾ തുടക്കമാവുന്നത്. പന്ത്രണ്ടാം രാശിയിൽ ശനി സഞ്ചരിക്കുമ്പോൾ ജന്മനാട്ടിൽ നിന്നും അകലേക്ക് പോകാൻ സാധ്യതയുണ്ട്. ഇതിന് തൊഴിൽപരമായ കാരണമോ മറ്റു കാരണങ്ങളോ വന്നെത്താം. വലിയ മുതൽ മുടക്കിയുള്ള കച്ചവടത്തിലേർപ്പെട്ടാൽ ലാഭം കിട്ടാൻ കാലതാമസമുണ്ടാവും. ഗൃഹനിർമ്മാണം തുടങ്ങുന്നത് ഉചിതമാവും. പന്ത്രണ്ടിലെ ശനി വ്യയം സൃഷ്ടിക്കും. ആ ചെലവ് നല്ല കാര്യങ്ങൾക്കായി പ്രയോജനപ്പെടുത്താം എന്നതാണ് ഇതിൻ്റെ ഉപപത്തി. ജീവിതശൈലീരോഗങ്ങൾ വരാനിടയുണ്ട്. ബന്ധങ്ങളുടെ ദാർഢ്യം നിലനിർത്തുക എന്നതും ക്ലേശകരമാവും. ക്ഷമയാണ്, സഹനമാണ് ഏറ്റവും നല്ല പ്രതിരോധം. ചടുലതയുള്ള പ്രവർത്തന ശൈലി ഏഴരശ്ശനിയിൽ പതിഞ്ഞ താളത്തിലായി മാറുന്നതാണ്.
ഭരണി
മേടക്കൂറിൽ വരുന്ന നക്ഷത്രമായ ഭരണിയിൽ ജനിച്ചവർക്ക് 2025 മാർച്ച് 29 ന് രാത്രി ശനി മീനം രാശിയിൽ പ്രവേശിക്കുന്നതോടെ ഏഴരശ്ശനിക്കാലം തുടങ്ങുന്നു. ശരാശരി മുപ്പതു വയസ്സിൽ താഴെ ഉള്ളവർക്ക് ഇത് ആദ്യത്തെയും അറുപത് വയസ്സിൽ താഴെയുള്ളവർക്ക് ഇത് രണ്ടാമത്തെയും അതിനുമേൽ പ്രായം ചെന്നവർക്ക് ഇതു മൂന്നാമത്തെയും ഏഴരശ്ശനിക്കാലം ആയിരിക്കും. പന്ത്രണ്ടാം രാശിയിൽ പ്രവേശിച്ച ശനി ഏതാണ്ട് രണ്ടരവർഷം ആ നില തുടരും. എവിടെയാണോ ജീവിതം കരുപ്പിടിപ്പിച്ചിരിക്കുന്നത് അവിടെ നിന്നും സ്ഥിരമായോ താത്കാലികമായോ മാറിനിൽക്കാനിടവരും. പണം നിക്ഷേപിക്കുന്നത് കരുതലോടെയല്ലെങ്കിൽ നഷ്ടം സംഭവിക്കാനിടയുണ്ട്. ബന്ധങ്ങളുടെ സ്നേഹോഷ്മളതയ്ക്ക് ഭംഗം ഉണ്ടാവും. പാദത്തെ സംബദ്ധിച്ച രോഗങ്ങൾ, വാതം, പ്രായത്തിൻ്റെതായ പ്രശ്നങ്ങൾ, കടബാധ്യതകൾ ഇവ സാധ്യതകൾ. തനിക്കൊത്ത മാനസികനിലവാരം ഇല്ലാത്തവരുമായി കൂട്ടുകൂടി അമളി പറ്റാം. അലച്ചിലേറാം. ഗൃഹനിർമ്മാണം ഏഴരശനിയിൽ ഉചിതമാണ്.
കാർത്തിക
മേടക്കൂറിലെ കാർത്തിക നാളുകാർക്ക് ഇപ്പോഴത്തെ ശനിമാറ്റം മൂലം ഏഴരശ്ശനിക്കാലം തുടങ്ങുകയാണ്. ഇടവക്കൂറിലെ കാർത്തിക നാളുകാർക്ക് ശനിമാറ്റം പതിനൊന്നാം രാശിയിൽ ആവുകയാൽ അത്യന്തം ഗുണകരവുമാണ്. മേടക്കൂറിൽ ജനിച്ചവർ പഠനം, ജോലി ഇവയ്ക്കായി അന്യദേശത്ത് / വിദേശത്ത് പോകും. നാട്ടിൽ സ്വകാര്യ കമ്പനികളിൽ ജോലി ചെയ്യുന്നവർക്ക് അനുകൂലമല്ലാഞ്ഞ ഷിഫ്റ്റ്, പ്രൊമോഷൻ കിട്ടാതിരിക്കൽ, വേതന വർദ്ധനവ് ഉണ്ടാവാതിരിക്കുക എന്നിവ സാധ്യതകളാണ്. തൊഴിലിൽ അലച്ചിലേറുന്നതിന് സാഹചര്യം ഉണ്ടാവും. സ്വന്തം ബിസിനസ്സിനോട് താലപര്യം കുറയുന്നതാണ്. ഇടവക്കൂറിലെ കാർത്തിക നാളുകാർക്ക് ആദായമാർഗം വിപുലീകരിക്കാൻ കഴിയുന്ന കാലമാണ്. പദവി ഉയരും. സാമൂഹ്യ അംഗീകാരം കിട്ടും. വിദ്യാർത്ഥികളുടെ പഠന നിലവാരം ഉന്നതിയിലെത്തും. അവിവാഹിതർക്ക് വിവാഹസാഫല്യം പ്രതീക്ഷിക്കാം. കൂടുതൽ പ്രതിഫലമുള്ള ജോലിയിൽ പ്രവേശിക്കാൻ കഴിയും.
രോഹിണി
ശനിമാറ്റം പതിനൊന്നാം രാശിയിലേക്കാണ്. തിരസ്കരിക്കപ്പെട്ട ഇടങ്ങളിൽ മികച്ച സ്വീകാര്യത ലഭിക്കും. സമുന്നതമായ പദവികൾ അനായാസം കൈവരും. വിദ്യാർത്ഥികൾക്ക് പ്രശസ്തമാംവിധം പഠനത്തിൽ മുന്നേറാൻ സാധിക്കുന്നതാണ്. തൊഴിൽ രഹിതർക്ക് കഴിവിലധികമായ ജോലി ലഭിച്ചേക്കാം. ഉദ്യോഗസ്ഥർക്ക് ഉയർച്ചയുടെ കാലമാണ്. മത്സരങ്ങളിലും തെരഞ്ഞെടുപ്പുകളിലും അസൂയാർഹമായ വിജയം നേടും. അവിവാഹിതർക്ക് കുടുംബ ജീവിതത്തിൽ പ്രവേശിക്കാൻ സന്ദർഭം ഒത്തുവരുന്നതാണ്. പൈതൃക സ്വത്തുക്കളിൽ നടക്കുന്ന വ്യവഹാരം അനുകൂലമായ വിധിയിൽ പര്യവസാനിക്കും. രോഗത്താൽ ക്ലേശിതർക്ക് ചികിൽസാമാറ്റം ആശ്വാസമേകും. ഗൃഹനിർമ്മാണം പൂർത്തിയായി കേറിത്താമസിക്കാൻ സാധിക്കുന്നതാണ്. കടബാധ്യതകൾ ഒട്ടൊക്കെ പരിഹരിക്കാൻ കഴിഞ്ഞേക്കും.
മകയിരം
ഇടവക്കൂറുകാരായ മകയിരം നാളുകാർക്ക് ജീവിതം പുഷ്ടിപ്പെടുന്ന കാലഘട്ടമാണ്. ശനിമാറ്റം പതിനൊന്നാം ഭാവത്തിലേക്കാകയാൽ കർമ്മഗുണം ഉണ്ടാവും. ചെയ്യുന്ന പ്രവർത്തനങ്ങൾക്ക് ഉയർന്ന പ്രതിഫലം ലഭിക്കുന്നതാണ്. ഉദ്യോഗസ്ഥർക്ക് പദവിയിൽ കയറ്റം, വേതന വർദ്ധനവ് എന്നിവ കൈവരും. മത്സരാധിഷ്ഠിത കരാറുകളിൽ വിജയിക്കും. പ്രണയസാഫല്യമുണ്ടാവുന്നതാണ്. ദാമ്പത്യത്തിൽ സംതൃപ്തി വന്നെത്തും. കുട്ടികൾക്ക് ശ്രേയസ്സ് ഭവിക്കുന്നതാണ്. പൊതുവേ സാമ്പത്തിക സ്ഥിതി മെച്ചപ്പെടും. മിഥുനക്കൂറുകാർക്ക് പത്താം ഭാവത്തിൽ ശനി വരികയാൽ കണ്ടകശനി തുടങ്ങുകയാണ്. മുഖ്യമായും കർമ്മരംഗം ബാധിക്കപ്പെടാം. തൊഴിലിൽ സമ്മർദ്ദങ്ങൾക്ക് സാധ്യതയുണ്ട്. നിലവിലെ തൊഴിൽ ഉപേക്ഷിച്ചുകൊണ്ട് പുതുതൊഴിൽ തേടുന്നത് ഗുണകരമാവില്ല. വിദേശത്ത് ജോലിലഭിക്കാം. വലിയ മുതൽമുടക്കിയുള്ള ബിസിനസ്സിന് മുതിരരുത്.
തിരുവാതിര
മീനം രാശിയിൽ – മിഥുനക്കൂറിൻ്റെ പത്താം രാശിയിൽ – ശനി പ്രവേശിക്കുമ്പോൾ തിരുവാതിര നാളുകാർക്ക് കണ്ടകശനിക്കാലം ആരംഭിക്കുകയാണ്. ചെറുതും വലുതുമായ തൊഴിലുകൾ, സ്വയം സംരംഭങ്ങൾ എന്നിവയെല്ലാം ഏതെങ്കിലും തരത്തിൽ ബാധിക്കപ്പെടാം. സർക്കാർ കാര്യങ്ങളിൽ തടസ്സങ്ങൾ വരാനുള്ള സാധ്യതയുണ്ട്. ഉദ്യോഗസ്ഥർക്ക് തൊഴിലിടത്തിൽ സുഗമത കുറയുന്നതാണ്. നിലവിലെ സ്ഥിതി അതുപോലെ തുടരുകയാവും അഭികാമ്യം. നവീകരണങ്ങൾ കൊണ്ട് പ്രതീക്ഷിച്ച നേട്ടം വന്നേക്കില്ല. രാഷ്ട്രീയ പ്രവർത്തകർ എതിർപ്പുകളെ നേരിടുന്നതാണ്. നാലാം ഭാവത്തിലേക്ക് ശനി ദൃഷ്ടി വരികയാൽ ഗാർഹികമായ സ്വൈരക്കേടുകൾ തലപൊക്കാം. വാഹനയാത്രയിൽ ശ്രദ്ധയുണ്ടാവണം. ബന്ധുക്കളുടെ കാര്യത്തിൽ ഇടപെടുമ്പോൾ വാക്കും കർമ്മവും സംശുദ്ധമായിരിക്കാൻ കരുതൽ വേണം. ഇടക്കിടെ മനസ്സിൻ്റെ സന്തുലിതാവസ്ഥക്ക് ചാഞ്ചല്യം വരാം.
പുണർതം
പുണർതം നക്ഷത്രം മിഥുനം, കർക്കടകം രാശികളിലായി വരുന്നു. മിഥുനക്കൂറുകാർക്ക് ശനി പത്താമെടത്തിൽ വരുകയാൽ കണ്ടകശനി തുടങ്ങുകയാണ്. പത്താമെടം തൊഴിലിടമാകയാൽ തൽസംബന്ധമായ പ്രശ്നങ്ങൾ ഒരു ബാധ്യതയായി മാറും. അനുകൂലമല്ലാത്ത ഇടത്തിലേക്ക് സ്ഥലംമാറ്റം ഉണ്ടാവാം. സഹപ്രവർത്തകരുമായോ മേലധികാരികളുമായോ ഒത്തുപോകാൻ കഴിഞ്ഞില്ലെന്നു വന്നേക്കും. ബിസിനസ്സ് നടത്തുന്നവർ വ്യാപാരമാന്ദ്യം അനുഭവിക്കും. കാലോചിതമായ പരിഷ്കാരങ്ങൾ വരുത്താൻ കഴിയാതെ വിഷമിക്കുന്നതാണ്. കർക്കടകക്കൂറിലെ പുണർതം നാളുകാർക്ക് ശനി എട്ടാമെടത്തിൽ നിന്നും ഒമ്പതാമെടത്തിലേക്ക് പകരുന്നു. ഭാഗ്യഭ്രംശത്തിന് ശനി കാരണമായേക്കും. ചുണ്ടിനും കപ്പിനുമിടയിൽ നേട്ടങ്ങൾ കൈവിട്ടു പോകാം. പിതാവ്, ഗുരുജനങ്ങൾ, പേരക്കുട്ടികൾ എന്നിവർക്ക് ഒമ്പതിലെ ശനി ഗുണകരമല്ല. ഈശ്വരോപാസന തടസ്സപ്പെടാനുമിടയുണ്ട്.
പൂയം
അഷ്ടമശനിയായിരുന്നു, കഴിഞ്ഞ രണ്ടര വർഷത്തോളമായി നടപ്പ്. ഇപ്പോൾ ശനി ഒമ്പതാം ഭാവത്തിലേക്ക് പ്രവേശിക്കുന്നു. ദോഷം ഉണ്ടാക്കുക എന്നതിനെക്കാൾ ഗുണത്തെ അപഹരിക്കുക എന്നതാണ് ഒമ്പതാമെടത്തിലെ ശനിയുടെ പ്രവർത്തനരഹസ്യം. ദൈവാധീനം കുറയുന്നതായി തോന്നും. ഏകാന്തത അനുഭവപ്പെടാം. കുടുംബ പ്രാരബ്ധം ഒറ്റയ്ക്ക് ചുമക്കേണ്ടി വന്നേക്കും. ധാർമ്മിക പ്രവർത്തനങ്ങൾ മുടങ്ങുവാനിടയുണ്ട്. ദൈവീക സമർപ്പണങ്ങൾ നീണ്ടുപോകാം. ചില കടപ്പാടുകൾക്ക് നിർബന്ധപൂർവമായി പ്രത്യുപകാരകർമ്മം ചെയ്യേണ്ടി വരാം. സഹായിക്കാമെന്ന് വാക്കുപറയുന്നവർ പിന്മാറുവാനിടയുണ്ട്. മംഗളകർമ്മങ്ങൾ അവസാനനിമിഷം മാറ്റിവെക്കേണ്ട സാഹചര്യം ഉദയം ചെയ്യാം. ഗുരു, പിതാവ്, കുടുംബത്തിലെ പുതുതലമുറ എന്നിവരുടെ ആശയങ്ങളോട് കലഹിക്കുന്നതാണ്. ആദ്ധ്യാത്മികചര്യക്ക് മുടക്കം വരാനുള്ള സാധ്യതയുമുണ്ട്.
ആയില്യം
അനിഷ്ടവും ആധിവ്യാധികളും കാര്യവിഘ്നവും സൃഷ്ടിക്കുന്ന എട്ടാം ഭാവത്തിലായിരുന്നു, ആയില്യം നാളുകാർക്ക് ഇതുവരെ ശനിയുടെ സഞ്ചാരം. ഇപ്പോൾ മുതൽ ഒമ്പതാമെടത്തിലും. എട്ടാമെടത്തോളം കഠിനമായിരിക്കില്ല, എന്തായാലും ശനി ഒമ്പതിൽ സഞ്ചരിക്കുമ്പോഴുള്ള ഫലങ്ങൾ. ക്ലേശങ്ങൾ ഇവ്വിധത്തിലാവും. പ്രവർത്തനരംഗത്ത് ശോഭിക്കാൻ കൂടുതൽ വിയർപ്പൊഴുക്കേണ്ടി വരുന്നതാണ്. പിതാവിന്റെ സ്വത്ത് അനുഭവത്തിൽ വന്നെത്താൻ തടസ്സങ്ങളുണ്ടാവും. മന്ത്രതന്ത്രസാധനകൾ പകുതിയിൽ അവസാനിപ്പിച്ചേക്കാൻ ഇടയുണ്ട്. ഔദ്യോഗികമായി നിലവിലെ പദവിയിൽ തുടരപ്പെടുന്നതാണ്. കുടുംബകാര്യങ്ങൾക്ക് കൂടുതൽ സമയം കണ്ടെത്തും. വീട്ടുകാരുമായി പിണങ്ങിക്കഴിഞ്ഞവർക്ക് ഇണക്കത്തിലാവാൻ സാഹചര്യം ഉദിക്കും. ഉപരിപഠനം പൂർത്തിയാക്കി ജോലിയിൽ പ്രവേശിക്കും. പാരമ്പര്യമായ തൊഴിലുകൾ മനസ്സില്ലാമനസ്സോടെ തുടർന്നേക്കാം.
മകം
ഏഴാം ഭാവത്തിൽ സഞ്ചരിച്ചിരുന്ന ശനി ഇനി എട്ടിലേക്ക് നീങ്ങുന്നു. കണ്ടകശനി എന്നനിലയായിരുന്നു, ഇതുവരെ. ഇനി മുതൽ അഷ്ടമശനി എന്ന സ്ഥിതിയിലും. ശനിമാറ്റം മകം നാളുകാർ വളരെ ഗൗരവത്തോടെ നോക്കിക്കാണേണ്ടതുണ്ട്. കാര്യവിഘ്നം, രോഗ ക്ലേശങ്ങൾ, ഉറ്റവരുടെ വിരഹവിയോഗാദികൾ ഇവ അഷ്ടമശനിക്കാലത്ത് സംഭവിച്ചേക്കാം. സാമ്പത്തിക ഇടപാടുകളിൽ ഏറ്റവും കരുതൽ വേണം. സ്വാഭാവികമായ കഴിവുകൾ പ്രകടിപ്പിക്കാൻ അവസരം കുറഞ്ഞേക്കും. മുൻപ് സമൂഹമധ്യത്തിൽ ഉണ്ടായിരുന്ന സ്വാധീനത അഷ്ടമശനിയിൽ കുറയുന്നതായി തോന്നിയേക്കും. ജോലി ഉപേക്ഷിക്കുന്നത് പുതുജോലി ഉറപ്പിച്ച ശേഷമാവണം. പൊതുപ്രവർത്തകർക്ക് ദുരാരോപണങ്ങളെ നേരിടേണ്ടി വന്നേക്കും. എളുപ്പത്തിൽ നേടിയിരുന്നവ ഇപ്പോൾ പ്രയത്നപൂർവ്വം നേടേണ്ടതായി വരാം.
പൂരം
ഏഴാം ഭാവത്തിൽ ശനി സഞ്ചരിച്ചിരുന്നതിനാൽ ഇതുവരെ കണ്ടകശനിക്കാലം ആയിരുന്നു. ഇനിമേൽ ശനി എട്ടാം ഭാവത്തിൽ സഞ്ചരിക്കുകന്നതിനാൽ അഷ്ടമശനിക്കാലമാണ്. എട്ടാമെടം വ്യക്തികളുടെ കഴിവുകളെ തളർത്തുന്ന ഭാവമാണ്. സ്വാശ്രയമായി ജീവിച്ചവർക്ക് പരാശ്രയത്വം ഉണ്ടായേക്കാം. സമൂഹത്തിൻ്റെ പൊതുചിന്തകളെ തനിക്കും തൻ്റെ ചിന്താധാരകളെ സമൂഹത്തിനും ഉൾക്കൊള്ളാൻ കഴിയാത്ത സ്ഥിതിവരും. ആരോഗ്യപരമായി കൂടുതൽ ജാഗ്രത വേണം. ജീവിതശൈലീ രോഗങ്ങൾ ബാധിക്കാനിടയുണ്ട്. സാഹസങ്ങൾക്ക് മുതിരരുത്. സാമ്പത്തികമായി സൂക്ഷ്മതയും കൃത്യതയും പുലർത്തുന്നതാണ് അഭികാമ്യം. കടബാധ്യതകൾ കൂടാതെ നോക്കണം. ബന്ധുമിത്രാദികളുടെ വിരഹവിയോഗങ്ങൾ അഷ്ടമശനിയുടെ ദോഷങ്ങളിൽ ഉൾപ്പെടുന്ന കാര്യമാണ്. പുതുസംരംഭങ്ങൾ തുടങ്ങുന്നത് എല്ലാവശങ്ങളും ആലോചിച്ചിട്ടാവണം. പ്രവാസ ജീവിതത്തിന് സാധ്യതയുള്ള കാലം കൂടിയാണിത്.
ഉത്രം
ചിങ്ങക്കൂറുകാർക്ക് അഷ്ടമശനിക്കാലം തുടങ്ങുന്നു. കന്നിക്കൂറുകാർക്ക് കണ്ടകശനിക്കാലവും. അതിനാൽ ജീവിതത്തിൻ്റെ സ്വാഭാവിക താളത്തിന് ക്രമം നഷ്ടമാകാം. ബന്ധങ്ങളുടെ ദാർഢ്യത്തിൽ വിള്ളൽ വരുന്നതിനിടയുണ്ട്. ബന്ധുവാര് ? ശത്രുവാര് ? എന്ന വിവേകം നഷ്ടപ്പെട്ടേക്കും. തൊഴിൽ തേടുന്നവർക്ക് പൂർണതൃപ്തിയുള്ള ജോലി ലഭിക്കണമെന്നില്ല. അകലങ്ങളിലേക്ക് സ്ഥലംമാറ്റം, വീടുവിട്ടു നിൽക്കേണ്ട സ്ഥിതി എന്നിവ ഭവിക്കാം. പ്രതിമാസമുള്ള ആദായത്തിൽ കുറവ് വരുന്നതാണ്. വാഗ്ദാനങ്ങൾ നൽകിയവർ അവ പാലിക്കാത്തത് മാനസിക സമ്മർദ്ദം സൃഷ്ടിക്കും. പ്രണയത്തിൽ തടസ്സവും ദാമ്പത്യത്തിൽ അലോസരങ്ങളും ഉദയം ചെയ്യാം. കാര്യസാധ്യത്തിന് അലച്ചിൽ ഉണ്ടാവുന്നതാണ്. കൂട്ടുകച്ചവടത്തിൽ അസ്വാരസ്യങ്ങൾ തലപൊക്കും. ക്ഷമയും മൗനവും ആധ്യാത്മിക ചര്യകളും ശനിദോഷത്തിന് പ്രതിരോധം ചമയ്ക്കുന്നതാണ്.
അത്തം
അനുകൂല ഭാവമായിരുന്ന ആറാമെടത്തിൽ നിന്നും പ്രതികൂലമായ ഏഴാമെടത്തിലേക്ക് ശനി മാറുകയാണ്. ജന്മരാശി, 4,7,10 എന്നീ ഭാവങ്ങളിൽ ശനി സഞ്ചരിക്കുന്ന കാലം കണ്ടകശ്ശനിക്കാലമായി വിശേഷിപ്പിക്കപ്പെടുന്നു. ഏഴാം ഭാവത്തിലെ ശനി കൂട്ടുകച്ചവടത്തെ മരവിപ്പിക്കുകയോ ശിഥിലമാക്കുകയോ ചെയ്തേക്കാം. പ്രണയാനുഭവങ്ങൾക്ക് വിരാമചിഹ്നം ഇടേണ്ടി വന്നേക്കും. ദാമ്പത്യത്തിൽ അസംതൃപ്തി പുകയും. പരസ്പര വിശ്വാസം നഷ്ടപ്പെടാനിടയുണ്ട്. അവിവാഹിതരുടെ ദാമ്പത്യ സ്വപ്നങ്ങൾ സഫലമാവാൻ തടസ്സങ്ങൾ ഭവിച്ചേക്കാം. അന്യദേശ – വിദേശ യാത്രകൾക്ക് അവസരം തെളിയുന്നതാണ്. വഴിനടന്നുള്ള കച്ചവടം നഷ്ടത്തിലെത്താം. വ്യാപാരസ്ഥാപനം തുടങ്ങാൻ കടം വാങ്ങുന്നത് അഭിലഷണീയമാവില്ല. ജന്മരാശിയിലേക്ക് ശനി നോക്കുന്നതിനാൽ മനോവിഷാദം, ദേഹക്ഷീണം, കർമ്മപരാങ്മുഖത്വം ഇവയുണ്ടാവാൻ സാഹചര്യം രൂപപ്പെടുന്നതാണ്. പലതും സമയബന്ധിതമായി പൂർത്തീകരിക്കാൻ കഴിയാതെ വരാം.
ചിത്തിര
കന്നിക്കൂറുകാരായ ചിത്തിര നാളുകാർക്ക് കണ്ടകശനി ആരംഭിക്കുകയാണ്. ഏഴാം ഭാവത്തിൽ ശനി സഞ്ചരിക്കുകയാൽ പ്രണയവിഘ്നം, പാർട്ണർഷിപ്പുകളിൽ തിരിച്ചടികൾ എന്നിവ ഉണ്ടാവാം. അന്യനാട്ടിൽ/വിദേശത്ത് ഉപരി പഠനത്തിന് അഡ്മിഷൻ ലഭിക്കും. വിദേശ തൊഴിലും സാധ്യതയിൽപ്പെടും. വിലപിടിച്ച വസ്തുക്കൾ നഷ്ടമാകാതിരിക്കാൻ കരുതൽ വേണം. വ്യർത്ഥയാത്രകൾ ഊർജ്ജ ശോഷണത്തിനും പാഴ്ച്ചെലവുകൾക്കും കാരണമാകാം. തുലാക്കൂറിൽ ജനിച്ച ചിത്തിര നാളുകാർക്ക് ശനി അനുകൂലമായ ആറാം ഭാവത്തിൽ വരികയാൽ ധാരാളം നേട്ടങ്ങൾ കരഗതമാവുന്ന കാലമാണ്. നഷ്ടപ്പെട്ട ചിലതൊക്കെ തിരികെ കിട്ടാനിടയുണ്ട്. ഉദ്യോഗത്തിൽ വ്യക്തമായ ഉയർച്ച കൈവരുന്നതാണ്. വിദ്യാഭ്യാസം ഉയർച്ചയിലെത്തും. ധനസ്ഥിതി പുഷ്ടിപ്പെടുന്നതാണ്. ഗാർഹിക രംഗത്ത് മനശ്ശാന്തി അനുഭവപ്പെടും. പരാശ്രയം അനുഭവിച്ചിരുന്നവർക്ക് സ്വന്തം കാലിൽ നിൽക്കാനാവും.
ചോതി
ആറാം രാശിയിലേക്കാണ് ചോതി നാളുകാർക്ക് ശനി പ്രവേശിക്കുന്നത്. ശനി നന്മ ചൊരിയുന്നിടമാണ് ആറാം ഭാവം. ന്യായമായ പ്രതീക്ഷകൾ മിക്കതും പൂവണിയും. സ്ഥിരം തൊഴിൽ, സ്ഥിരം വരുമാനം എന്ന സ്വപ്നം സഫലമാവും. വ്യാപാരം തുടങ്ങാൻ ആവശ്യമായ സാമ്പത്തിക സഹായം കരഗതമാവുന്നതാണ്. നിലവിൽ ബിസിനസ്സ് ചെയ്തുപോരുന്നവർക്കും അഭ്യുദയം ഉണ്ടാവും. കുടുംബ പ്രശ്നങ്ങൾ പരിഹരിക്കപ്പെടും. വസ്തുതർക്കങ്ങൾക്ക് രമ്യമായ പോംവഴി തെളിയുന്നതാണ്. ധനക്ലേശത്താൽ തടസ്സപ്പെട്ട വീടുപണി പൂർത്തീകരിക്കും. കൊതിച്ച വാഹനം വാങ്ങാനാവും. ഭാവിജീവിതത്തിന് പ്രയോജനകരമാവുന്ന നിക്ഷേപങ്ങൾ നടത്താൻ സാധിച്ചേക്കും. ജീവിതം കണ്ണീരുമാത്രമല്ല സന്തോഷവും കൂടി ചേർന്നതാണ് എന്ന ആത്മവിശ്വാസം പകരാനും ജീവിതത്തെ കൂടുതൽ സ്നേഹിക്കാനും ശനിമാറ്റം സാഹചര്യം സൃഷ്ടിക്കുന്നതാണ്.
വിശാഖം
തുലാക്കൂറിൽ വരുന്ന വിശാഖം നാളുകാർക്ക് ശനി ആറാമെടത്തിൽ സഞ്ചരിക്കുന്നത് പലതരം ഗുണഫലങ്ങൾക്ക് കാരണമാകും. സമൂഹത്തിൽ കൂടുതൽ പരിഗണന കൈവരുന്നതാണ്. ഉദ്യോഗസ്ഥർക്ക് സ്വതന്ത്ര ചുമതലയുള്ള തസ്തികയിലേക്ക് മാറ്റം ലഭിക്കാം. വേതനവർദ്ധനവ് പ്രതീക്ഷിച്ച പോലെ കൈവരും. കടബാദ്ധ്യതയിൽ നിന്നും മോചനം സാധ്യമാകുന്നതാണ്. “ഒന്നും സമ്പാദിച്ചിട്ടില്ല” എന്ന വിഷമമുള്ളവർക്ക് ക്രമേണ നിക്ഷേപങ്ങൾ ഉണ്ടാവുന്നതാണ്. പഠനത്തിൽ അഭ്യുദയം കൈവന്നേക്കും. ആരോഗ്യപരമായും ആശ്വാസകാലമാവും. വൃശ്ചികക്കൂറുകാരായ വിശാഖം നാളുകാർക്ക് കണ്ടകശ്ശനി തീരുന്നത് ആശ്വാസമാണ്. തൊഴിൽ രംഗത്ത് സമ്മർദ്ദം കുറയാം. മക്കളുടെ പഠനം, തൊഴിൽ മുതലായവയിൽ തടസ്സങ്ങളോ വിളംബമോ വന്നേക്കാം. വേണ്ടാത്ത കാര്യത്തിന് ശാഠ്യം കാട്ടുന്നതുമൂലം അല്പം കയ്പുരസം കുടിക്കാൻ നിർബന്ധിതരാവും.
അനിഴം
നാലാം ഭാവത്തിൽ തുടർന്നുവന്ന കണ്ടകശ്ശനി തീരുന്നത് ആശ്വാസകരമാവും. അഞ്ചാമെടത്തിലെ ശനിയുടെ ഭരണകാലമാണിനി. അദ്ധ്വാനം വെറുതെയാവുന്ന സ്ഥിതിക്ക് ശുഭകരമായ മാറ്റം കണ്ടേക്കും. എന്തുചെയ്താലും തൻ്റെ കുറ്റം കണ്ടെത്തുന്നവർ മൗനം ഭജിക്കാം. ധനവരവിലെ തടസ്സങ്ങൾ അകലുന്നതാണ്. പുതിയ ജീവനമാർഗങ്ങൾ നേടുന്നതിൽ വിജയിക്കും. വീട്ടിലും – പുറത്തും ഉള്ള മുതിർന്നവരുടെ മതിയായ പിന്തുണ എപ്പോഴും ലഭിക്കും. ഉപരിപഠനത്തിനോ ഉപജീവനത്തിനോ ദൂരദേശങ്ങളെ ആശ്രയിക്കേണ്ടതായി വന്നേക്കും. സംരംഭങ്ങൾ സുഗമമായി നടത്തിക്കൊണ്ടു പോവുന്നതിൽ ചില ക്ലേശങ്ങൾ ഏർപ്പെടാനിടയുണ്ട് എന്നതും പ്രസ്താവ്യമാണ്. ആത്മാർത്ഥമായ പരിശ്രമം ഫലവത്താകാൻ തടസ്സങ്ങൾ ഉണ്ടാകും. ഉപാസനാദികളുടെ ചിട്ടതെറ്റാം.
തൃക്കേട്ട
നാലാമെടമായ മീനം രാശിയിൽ നിന്നും ശനി മാറുകയാണ്. കണ്ടകശ്ശനിയുടെ ക്ലേശങ്ങൾക്ക് അതോടെ വിരാമം വരുകയായി. കർമ്മരംഗത്തെ ആലസ്യം അകലുന്നതാണ്. മുൻഗണന നിശ്ചയിച്ച് കർമ്മനിരതരാവും. ബന്ധുക്കളുടെ പിന്തുണ മുന്നത്തേതിലും കൈവരും. മനസ്സിൻ്റെ വ്രണിതഭാവങ്ങൾ വിടപറയുന്നതാണ്. അഞ്ചാം ഭാവത്തിലാണ് രണ്ടരവർഷക്കാലം ഇനി ശനിയുടെ സഞ്ചാരം. ചിട്ടി, ഇൻഷ്വറൻസ്, നറുക്കെടുപ്പ് ഇവയിൽ നിന്നും ആദായം വരും. പാരമ്പര്യസ്വത്തുക്കൾ നന്നായി സംരക്ഷിക്കും. സർഗ്ഗശക്തി പ്രകടിപ്പിക്കാനുള്ള ധാരാളം അവസരങ്ങൾ തുറന്നുകിട്ടുന്നതാണ്. വ്യത്യസ്തതയുള്ള കഴിവുകൾക്ക് അംഗീകാരമുണ്ടാവും. കുടുംബത്തിലെ പുതുതലമുറയുമായി ആശയപരമായ അനൈക്യം ഉടലെടുക്കാം. വലിയ കാര്യങ്ങളിൽ വിട്ടുവീഴ്ച ചെയ്യും. ചെറുകാര്യങ്ങളിൽ ശാഠ്യം പിടിക്കുന്നതാണ്. ആദർശവും പ്രായോഗികതയും സമന്വയിപ്പിക്കുന്നതിൽ വിജയം നേടും.
മൂലം
ശനി സഞ്ചരിച്ചിരുന്നത് അനുകൂലഭാവമായ മൂന്നാമെടത്തിൽ. ഇനി നാലാമെടത്തിൽ സഞ്ചരിക്കും. നാലാംഭാവത്തിലെ ശനി കണ്ടകശനിയാണ്. ആയതിനാൽ സുഖസ്ഥാനമാണ് നാലാമെടം. ദേഹം, മനസ്സ് ഇവയെ സംബന്ധിക്കുന്ന സുഖാനുഭവങ്ങൾക്ക് ലോപം വരാം. വീടുവെക്കുന്നവർ ധനപരമായി ക്ലേശിച്ചാലും കാര്യസാധ്യം ഭവിക്കുന്നതാണ്. ബന്ധുക്കളുടെ ഇടപെടലുകൾ അനിഷ്ടകാരിയായേക്കും. തൊഴിൽ രംഗത്ത് മാറ്റം കൊണ്ടുവരാൻ തീവ്രമായി ആഗ്രഹിക്കുമെങ്കിലും പ്രാവർത്തികമാക്കുക എളുപ്പമല്ലെന്ന് തിരിച്ചറിയും. പഴയ വാഹനം മാറ്റിവാങ്ങാനുള്ള ശ്രമം നീണ്ടേക്കും. ബന്ധങ്ങളുടെ ദൃഢത നിലനിർത്താൻ വിഷമിക്കുന്നതാണ്. വരുമാനം അസ്ഥിരമായിരിക്കും. വസ്തുസംബന്ധിച്ച ക്രയവിക്രയത്തിൽ കബളിപ്പിക്കപ്പെടാം. ഹൃദയം, കരൾ തുടങ്ങിയ അവയവങ്ങൾക്ക് രോഗം വരാനുള്ള സാധ്യത കാണുന്നു.
പൂരാടം
കണ്ടകശനി തുടങ്ങുന്നു. സുഗമമായത് പലതും കൃച്ഛ്രസാധ്യമാവുന്നതാണ്. വാക്കുകളിലും നിലപാടുകളിലും ഉറച്ചുനിൽക്കുവാൻ ക്ലേശിക്കും. ഉദ്യോഗസ്ഥർക്ക് ദൂരദിക്കിലേക്ക് സ്ഥലംമാറ്റം ഭവിക്കാം. സുഹൃൽബന്ധം നിലനിർത്തുക ക്ലേശകരമാവും. ദേഹസുഖം ഓരോ ദിവസം ഓരോ മാതിരിയാവും. പ്രയത്നം ഏറുന്നതാണ്. എന്നാൽ പ്രതിഫലം തക്കതായിരിക്കില്ല. ജന്മദേശത്തിലെ വീടോ വസ്തുവോ വിൽക്കാനിടയുണ്ട്. നിക്ഷേപങ്ങൾ സുരക്ഷിതമാക്കണം. പൊതുപ്രവർത്തകർക്ക് പൂർവ്വരീതിയിലുള്ള പിന്തുണ ലഭിച്ചേക്കില്ല. കരാറുപണികളിൽ കൈനഷ്ടം വരാനുള്ള സാധ്യതയുണ്ട്. ഉപരിവിദ്യാഭ്യാസത്തിന് വിദേശത്ത് സീറ്റ് ലഭിക്കും. മാതാവിൻ്റെ ആരോഗ്യത്തിൽ ജാഗ്രതയുണ്ടാവണം. ബിസിനസ്സ് രംഗത്ത് ശരാശരി പുരോഗതി ദൃശ്യമാകും. നിലവിലെ തൊഴിൽ ഉപേക്ഷിക്കുന്നതിൽ വളരെ കരുതൽ വേണം. അർഹതയ്ക്കും ആഗ്രഹത്തിനും അനുസരിച്ച് പുതിയത് കിട്ടുക എളുപ്പമായേക്കില്ല.
ഉത്രാടം
ധനുക്കൂറിൽ വരുന്ന ഉത്രാടം നാളുകാർക്ക് കണ്ടകശനി (നാലാംഭാവത്തിൽ) തുടങ്ങുന്നു. ജോലിമാറ്റം, സ്ഥലംമാറ്റം, ഗൃഹം മാറ്റം തുടങ്ങിയവ ഭവിക്കുന്നതാണ്. ഇഷ്ടപ്പെടാത്ത കാര്യങ്ങളും നിർവഹിക്കേണ്ടിവരും. സ്വന്തം ആശയങ്ങൾക്കും ആവിഷ്ക്കാരങ്ങൾക്കും ജനപ്രീതി കുറയുന്നതിൽ വിഷമമുണ്ടാവും. സൈബർ തട്ടിപ്പുകൾ, ഭൂമിയിടപാടിൽ നഷ്ടം എന്നിവ വരാതിരിക്കാൻ പ്രത്യേകം ശ്രദ്ധിക്കണം. മാതാവിന് ക്ലേശാനുഭവങ്ങൾ ഭവിച്ചേക്കാം. മകരക്കൂറുകാർക്ക് ഗുണം കൂടുന്നതാണ്. വ്യാപാരത്തിൽ മുന്നോട്ട് പോകാനാവും. സ്വന്തം തെറ്റുകൾ തിരുത്താൻ കഴിയും. എതിർപ്പുകളെപ്പോലും അനുകൂലമാക്കി മാറ്റാൻ കഴിഞ്ഞേക്കും. മാനസികമായ പിരിമുറുക്കമില്ലാതെ കർമ്മരംഗത്ത് സക്രിയരാവും. ഭാവിയിൽ പ്രയോജനം ചെയ്യുന്ന നിക്ഷേപങ്ങൾക്ക് മുതിരുന്നതാണ്. കിടപ്പുരോഗികൾക്ക് സമാശ്വാസം വന്നു ചേരും.
തിരുവോണം
കഴിഞ്ഞ ഏഴര വർഷക്കാലമായി ‘ഏഴരശനി’ ബാധിതരാണ് തിരുവോണം നാളിൽ ജനിച്ചവർ. പ്രസ്തുതദോഷകാലം ഇപ്പോൾ അവസാനിക്കുന്നു. കൂട്ടിൽ നിന്നും തുറന്നുവിടപ്പെട്ട പക്ഷിയുടെ സ്വാതന്ത്ര്യമാണ് ഇവർ അനുഭവിക്കാൻ പോകുന്നത്. മൂന്നാം ഭാവത്തിലേക്ക് മാറുന്ന ശനി ഏറ്റവും അനുകൂലനാണ്. ജോലിയില്ലാത്തവർക്ക് ജോലി ലഭിക്കും. നിലവിലെ ജോലിയിൽ ഒരുവിധത്തിലുള്ള ഗുണവും കിട്ടാത്തവർ ഇപ്പോൾ സ്ഥാനക്കയറ്റം, വേതന വർദ്ധനവ് എന്നിവയ്ക്ക് പരിഗണിക്കപ്പെടും. സാമ്പത്തിക ക്ലേശങ്ങൾക്ക് അയവുണ്ടാവും. സമ്പാദ്യശീലം ഉയരുന്നതാണ്. സംരംഭങ്ങൾ തുടങ്ങാനും അവയിൽ വിജയിക്കാനും സാധിച്ചേയ്ക്കും. ജീവിതനിലവാരം ഉയരുന്നതാണ്.. സുഖഭോഗങ്ങൾ നുകരാനാവും. ആരോഗ്യപ്രശ്നങ്ങളെ വ്യായാമം, ഔഷധം ഇവയാൽ നിയന്ത്രിക്കാൻ കഴിയുന്നതാണ്. സമൂഹത്തിൻ്റെ ആദരം ലഭിക്കുന്നതായിരിക്കും.
അവിട്ടം
മകരക്കൂറുകാർക്ക് ഏഴരശ്ശനിക്കാലം അവസാനിക്കുകയാൽ ഈ ശനിമാറ്റം ഗുണകരമാവും. ലക്ഷ്യത്തിലെത്താൻ കുറഞ്ഞ ദൂരം സഞ്ചരിച്ചാൽ മതിയെന്ന നിലവരും. കുടുംബസൗഖ്യം ഭവിക്കും. സാമ്പത്തികമായി സ്ഥിരതയുണ്ടാവും. രോഗദുരിതങ്ങൾക്ക് വലിയ തോതിൽ ആശ്വാസം ലഭിക്കുന്നതാണ്. പഠനം പൂർത്തിയാക്കാനും അർഹമായ ഉദ്യോഗം കിട്ടാനും സാഹചര്യത്തിൻ്റെ അനുകൂല്യതയുണ്ട്. കടബാധ്യതകൾ പരിഹരിച്ചേക്കും. കുംഭക്കൂറിൽ വരുന്ന അവിട്ടം നാളുകാർക്ക് ശനി രണ്ടാം ഭാവത്തിൽ വരുന്നു. ഏഴരശ്ശനി അഞ്ചുവർഷം കഴിഞ്ഞു. ഇനി രണ്ടരവർഷം ബാക്കിയാണ്. അതിനാൽ തീരുമാനങ്ങൾ ആലോചിച്ച് കൈക്കൊള്ളണം. ധനവിഷയമായി അതൃപ്തിക്ക് സാധ്യതയുണ്ട്. പഠനത്തിൽ പിറകിലാവാം. വലിയ മുതൽമുടക്കുകൾ കരുതലോടെ ചെയ്യണം. ആരോഗ്യത്തിൽ ജാഗ്രതയുണ്ടാവണം.
ചതയം
ഏഴരശ്ശനിയിലെ ജന്മശനി മാറുന്നത് അല്പം ആശ്വാസകരമാണ്. ശനി രണ്ടാം ഭാവത്തിലാണിനി. വാക്കും വിദ്യാഭ്യാസവും കുടുംബ ജീവിതവും ധനസ്ഥിതിയും രണ്ടാം ഭാവം കൊണ്ട് വിചിന്തനം ചെയ്യുന്നു. ഇപ്പറഞ്ഞവയ്ക്ക് തിളക്കം കുറയാനിടയുള്ള കാലമാണ്. ഓരോ വാക്കും ശരിക്കും ആലോചിച്ച് പറയണം. എന്തു കേൾക്കണം എന്തു കേൾക്കണ്ടാ എന്നതും പ്രധാനമാണ്. വിദ്യാർത്ഥികൾക്ക് പഠനവൈകല്യം വരാനിടയുണ്ട്. ധനം കരുതലോടെ കൈകാര്യം ചെയ്യണം. വലുതാകട്ടെ, ചെറുതാകട്ടെ വരവത്രയും ചെലവായിപ്പോകുന്ന, ചെലവാക്കിപ്പോകുന്ന കാലമാണ്. കഴിവതും സമ്പാദ്യശീലം വളർത്തണം. കുടുംബ ജീവിതത്തിൽ അലോസരങ്ങൾ ഉദയം ചെയ്യാം. തിടുക്കം ദോഷത്തിനിടവരുത്താം. സമചിത്തതയോടെ അപ്പോഴപ്പോൾ പ്രശ്നങ്ങൾ പരിഹരിക്കാൻ സന്നദ്ധതയുണ്ടാവണം. സാഹസ കർമ്മങ്ങൾ ഒഴിവാക്കുകയും കരണീയം.
പൂരൂരുട്ടാതി
കുംഭക്കൂറുകാർ ഏഴരശ്ശനിയിലെ അവസാനത്തെ രണ്ടരവർഷത്തിലേക്ക് കടക്കുന്നു. സാമ്പത്തിക സമ്മർദ്ദങ്ങൾ ഉണ്ടാവും. കടബാധ്യത പരിഹരിക്കാനായി കൂടുതൽ കടം വാങ്ങുന്ന പ്രവണതയ്ക്ക് ശമനം വരുത്തണം. വാക്കുകളിൽ നേർമ്മയും നെറിയും കുറയാം. അറിഞ്ഞോ അറിയാതെയോ കള്ളം പറഞ്ഞും പ്രവർത്തിച്ചും ശത്രുക്കളെ സൃഷ്ടിക്കുന്നതാണ്. രോഗികൾ സ്വയം ചികിത്സയ്ക്ക് മുതിരരുത്. മീനക്കൂറിൽ വരുന്ന പൂരുരുട്ടാതിക്കാർക്ക് ഏഴരശ്ശനി ജന്മരാശിയിലേക്ക് പകരുകയാണ്. നിർബന്ധശീലവും അനാവശ്യമായ ‘ഈഗോ’യും കുടുംബ ഭദ്രതയെ തളർത്താനിടയുണ്ട്. വിദ്യാർത്ഥികളുടെ കാര്യത്തിൽ രക്ഷിതാക്കളും ശ്രദ്ധാലുക്കളാവണം. പുതുതലമുറയുടെ കാര്യങ്ങളിൽ മുതിർന്നവർ ജാഗ്രത കാട്ടുന്നത് ഉചിതമായിരിക്കും. ഉപാസനകൾ, മിതവ്യയം, മൗനശീലം, ആരോഗ്യ ജാഗ്രത
ഇവ ഗുണകരമാവും.
ഉത്രട്ടാതി
ഉത്രട്ടാതി ഉൾപ്പെടുന്ന മീനം രാശിയിലേക്കാണ് ശനി സംക്രമിക്കുന്നത്. അതിനാൽ ഇവർക്ക് ഏഴരശ്ശനിയുടെ നടുഭാഗം ആയ ജന്മശ്ശനിയും കണ്ടകശ്ശനിയും ഒരുമിച്ച് വരുന്നു. ജീവിതത്തിലെ പരീക്ഷണ നിർഭരമായ കാലമായിരിക്കും, ഇക്കാലം. വിശ്വാസവഞ്ചനയ്ക്ക് വിധേയരാവാനിടയുണ്ട്. സാമ്പത്തികമായി കബളിപ്പിക്കപ്പെടാൻ സാധ്യതയുള്ളതിനാൽ അക്കാര്യത്തിൽ കരുതലുണ്ടാവണം. ചെറിയ കാര്യങ്ങൾ വിഷാദത്തിലേക്ക് നയിക്കാം. ഉത്രട്ടാതിക്കാരുടെ വേണ്ടപ്പെട്ടവർ മാനസികശക്തി പകരാൻ തയ്യാറാവണം. ദേഹാധ്വാനം കൂടും. പ്രതിഫലം അർഹിച്ചത്ര കിട്ടിയേക്കില്ല. ഉദ്യോഗസ്ഥർക്ക് തൊഴിലിടത്തിൽ സമാധാനക്കേടുണ്ടാവാനിടയുണ്ട്. അസൗകര്യമുള്ള ഷിഫ്റ്റോ ഡ്യൂട്ടിയോ ചുമതലയോ നിർവഹിക്കേണ്ടിവന്നേക്കും. ബിസിനസ്സ് തുടങ്ങുകയാണെങ്കിൽ ധനകാര്യങ്ങളിൽ ജാഗ്രത കൈക്കൊള്ളണം. വാഹനയാത്രയിൽ ഏറെ കരുതൽ വേണ്ടതുണ്ട്.
രേവതി
ശനി ജന്മരാശിയിൽ പ്രവേശിച്ചതിനാൽ ഏഴരശ്ശനിയിലെ ജന്മശനിയും ഒപ്പം കണ്ടകശനിയും ഒന്നായി ബാധിക്കുകയാണ് രേവതി നാളുകാരെ. തൊഴിലിൽ ഇടക്കിടെ തടസ്സങ്ങൾ വരാം. അർഹമായ അവകാശം സ്വാഭാവികമായി വന്നെത്തില്ല. പ്രതിഷേധം വേണ്ടതായി വന്നേക്കും. സമയോചിതമായി പ്രവർത്തിക്കാൻ കഴിയാതെ വരുന്നതാണ്. ആലസ്യം അനുഭവപ്പെടും. വിദ്യാർത്ഥികളാവും കൂടുതൽ ബാധിക്കപ്പെടുക. സംഘടനയിൽ ഒറ്റപ്പെടാനിടയുണ്ട്. അവഹേളനത്തിന് പാത്രമാവും. സുലഭവസ്തുക്കൾ ദുർലഭമായി അനുഭവപ്പെട്ടേക്കും. ഭാര്യാഭർത്താക്കന്മാർ മാനസികമായോ സ്ഥലപരമായോ അകലാൻ സാധ്യതയുണ്ട്. കൃത്യമായ ആരോഗ്യപരിശോധന അനിവാര്യമാണ്. സാമ്പത്തിക അച്ചടക്കമില്ലെങ്കിൽ കടക്കെണിയിൽ മുങ്ങും. ധ്യാനം, യോഗ, അദ്ധ്യാത്മിക ചര്യ എന്നിവ ശനിദോഷത്തിനെ ചെറുക്കുന്നതാണ്.
