തിരുവനന്തപുരം : തീര്‍ത്ഥാടകരുടെ ദീര്‍ഘനാളത്തെ ആവശ്യങ്ങള്‍ക്ക് പിന്നാലെ തിരുവനന്തപുരത്തു നിന്ന് മധുരയിലേക്കുള്ള അമൃത എക്സ്പ്രസ് ഇന്നു മുതല്‍ രാമേശ്വരം വരെ സര്‍വീസ് നടത്താന്‍ റെയില്‍വേ തീരുമാനിച്ചു. രാമേശ്വരത്തേക്ക് സര്‍വീസ് നീട്ടാനുള്ള തീരുമാനം വ്യാഴാഴ്ച മുതല്‍ പ്രാബല്യത്തില്‍ വരുമെന്ന് റെയില്‍വേ അധികൃതര്‍ അറിയിച്ചു. ഇതോടെ, ദക്ഷിണേന്ത്യയിലെ പ്രധാന തീര്‍ഥാടനകേന്ദ്രമായ രാമേശ്വരത്തേക്ക് കേരളത്തില്‍നിന്നുള്ള ഏക തീവണ്ടിയായി അമൃത എക്സ്പ്രസ് മാറി. തിരുവനന്തപുരത്തു നിന്നും രാത്രി 8.30-ന് പുറപ്പെടുന്ന ട്രെയിന് (16343) പിറ്റേന്ന് ഉച്ചയ്ക്ക് 12.45-ന് രാമേശ്വരത്തെത്തും. രാമേശ്വരം- തിരുവനന്തപുരം വണ്ടി ഉച്ചയ്ക്ക് 1.30-ന് പുറപ്പെട്ട് അടുത്തദിവസം പുലര്‍ച്ചെ 4.55-ന് തിരുവനന്തപുരം സെന്‍ട്രലില്‍ എത്തും. തിരുവനന്തപുരത്തിനും മധുരയ്ക്കുമിടയില്‍ നിലവിലുള്ള സമയക്രമം തുടരും.
Also read
12 സ്ലീപ്പര്‍ കോച്ചുകളും നാല് ജനറല്‍ കോച്ചുകളും മൂന്ന് എസി ത്രീ ടിയര്‍ കോച്ചുകളും രണ്ട് ഫസ്റ്റ് എസി, സെക്കന്‍ഡ് എസി കോച്ചുകളുമാണ് ട്രെയിന് ഉള്ളത്. തിരുവനന്തപുരം-രാമേശ്വരം തീവണ്ടി രാവിലെ 9.50-ന് മധുരയിലും 10.25-ന് മാനാമധുരയിലും 10.50-ന് പരമകുടിയിലും 11.13-ന് രാമനാഥപുരത്തുമെത്തും. തിരിച്ചുള്ള ട്രെയിന് 2.38-ന് പരമകുടിയിലും 3.05-ന് മാനാമധുരയിലും 4.05-ന് മധുരയിലുമെത്തും.പാമ്പന്‍ പാലം തുറക്കുന്നതോടെ അമൃത എക്സ്പ്രസ് രാമേശ്വരത്തേക്കു നീട്ടുമെന്ന് റെയില്‍വേ നേരത്തേ അറിയിച്ചിരുന്നു.
