തിയറ്ററുകളില്‍ മികച്ച അഭിപ്രായം നേടി മുന്നേറുന്ന വ്യസന സമ്മേതം ബന്ധുമിത്രാദികള്‍ എന്ന ചിത്രത്തിന്റെ റിവ്യൂ നല്കാന് ഓണ്‍ലൈന്‍ സിനിമ നിരൂപകന്‍ പണം ആവശ്യപ്പെട്ടെന്ന് ആരോപിച്ച് പരാതിയുമായി രംഗത്തെത്തിയിരിക്കുകയാണ് ചിത്രത്തിന്റെ നിര്‍മാതാവ് വിപിന്‍ദാസ്.
സിനിമ റിവ്യൂവിന് പണം ആവശ്യപ്പെട്ടെന്നാണ് പരാതി. പാലാരിവട്ടം പൊലീസ് സ്റ്റേഷനിലാണ് പരാതി നല്‍കിയത്. പണം നല്‍കിയില്ലെങ്കില്‍ സിനിമയെക്കുറിച്ച് മോശം റിവ്യൂ നല്‍കുമെന്ന് നിര്‍മാതാവിനെയും സിനിമയുടെ അണിയറപ്രവര്‍ത്തകരെയും ഓണ്‍ലൈന്‍ സിനിമ നിരൂപകന്‍ വിളിച്ച് ഭീഷണിപ്പെടുത്തി. എന്നാല്‍ പണം നല്കാന് തയാറായില്ല.
തുടര്‍ന്ന് സിനിമയെക്കുറിച്ച് മോശം റിവ്യൂ ഇടുകയും ചെയ്തു. പിന്നാലെയാണ് നിര്‍മാതാവ് പൊലീസിനെ സമീപിച്ചത്. സിനിമയുടെ പ്രൊഡക്ഷന്‍ ഹൗസ് ഹൈദരാബാദില്‍ ആയതിനാല്‍ അവിടെയും ഇയാള്‍ക്കെതിരെ പരാതി നല്‍കിയിട്ടുണ്ട്. തിരുവനന്തപുരം സ്വദേശിയായ നിരൂപകനെതിരെയാണ് പരാതി നല്‍കിയിരിക്കുന്നത്. പരാതില്‍ പൊലീസ് കേസ് രജിസ്റ്റര്‍ ചെയ്തിട്ടില്ല. പണം ചോദിച്ചതിന്റെ ഫോണ്‍ സംഭാഷണം അടക്കം പൊലീസിന് കൈമാറിയിട്ടുണ്ട്. അതേസമയം തുടര്‍നടപടികള്‍ ഉടന്‍ ആരംഭിക്കുമെന്ന് പാലാരിവട്ടം പൊലീസ് അറിയിച്ചു.
