കരിയറിന്റെ ഉച്ചസ്ഥായില്‍ നില്‍ക്കുമ്പോള്‍ ഒരു കാറപടകം. തുടര്‍ന്ന് പരിക്ക്.. കഴിഞ്ഞ വര്‍ഷം ഇന്ത്യന്‍ ക്രിക്കറ്റ് താരം ഋഷഭ് പന്തിന് സംഭവിച്ചതാണിത്. ക്രിക്കറ്റ് ലോകം ഏറെ ഞെട്ടലോടെയാണ് ഈ വാര്‍ത്ത കേട്ടത്.
എന്നാല്‍ പതുക്കെ പരിക്കുകളെല്ലാം മാറി തിരിച്ചുവരവിന്റെ പാതയിലാണ് പന്ത്. ക്രിക്കറ്റില്‍ കൂറ്റനടിക്കാരനായ ഈ ഇടം കൈയ്യന്‍ യുവതാരം ഐപിഎല്ലിലേക്ക് മടങ്ങി വരുമോ എന്ന പ്രതീക്ഷയിലാണ് ആരാധകര്‍..
അതിന് കാരണവുമുണ്ട്. കഴിഞ്ഞ മാസം കൊല്‍ക്കത്തയില്‍ നടന്ന ഡല്‍ഹി ക്യാപിറ്റല്‍സ് ക്യാമ്പില്‍ സൗരവ് ഗാംഗുലി, റിക്കി പോണ്ടിംഗ് എന്നിവര്‍ക്കൊപ്പം പന്തിനെ കണ്ടപ്പോഴാണ് ആരാധകര്‍ക്ക് ഈ പ്രതീക്ഷയും വളര്‍ന്നത്.
എന്നാല്‍ ഇപ്പോള്‍ എല്ലാ അഭ്യൂഹങ്ങള്‍ക്കും വിരാമമിട്ട് കൊണ്ട് പന്ത് തന്നെ രംഗത്ത് വന്നിരിക്കുകയാണ്. ഡല്‍ഹി ക്യാപിറ്റല്‍സ് സാമൂഹ്യമാധ്യമങ്ങളില്‍ പങ്കുവെച്ച വീഡിയോയിലാണ് ഋഷഭ് പന്ത് എല്ലാ കാര്യങ്ങളും വ്യക്തമാക്കുന്നത്.
ഇപ്പോള്‍ മുമ്പത്തേക്കാള്‍ ആരോഗ്യം ഏറെ മെച്ചപ്പെട്ടിട്ടുണ്ട് എന്ന് വ്യക്തമാക്കിയ താരം നൂറ് ശതമാനം ഫിറ്റ്‌നസിലേക്ക് വരികയാണെന്നും വ്യക്തമാക്കി. കുറച്ച് മാസത്തിനുള്ളില്‍ പൂര്‍ണ്ണ ഫിറ്റ്‌നസിലേക്കെത്തുമെന്നും പന്ത് കൂട്ടിചേര്‍ത്തു.
ഗുരുതരമായി പരിക്കേറ്റ സമയത്ത് ആരാധകര്‍ തന്ന സ്‌നേഹം അറിയാന്‍ സാധിച്ചു. അവര്‍ എന്നെ ഏറെ ഇഷ്ടപ്പെടുന്നുണ്ട്. അവര്‍ ഞങ്ങളെ ബഹുമാനിക്കുന്നു.. ചികിത്സയിലുള്‍പ്പോള്‍ ആരാധകരുടെ പിന്തുണയും പ്രോല്‍സാഹനവും തനിക്ക് ലഭിച്ചിട്ടുണ്ട്. ശാരീരകമായി മാത്രമല്ല മാനസികമായും വലിയ വെല്ലുവിളികളാണ് ഈയൊരു വര്‍ഷ കാലം നേരിടേണ്ടി വന്നത്. അതുകൊണ്ട് തന്നെ ആരാധകരുടെ സ്‌നേഹവും പിന്തുണയും മടങ്ങിവരവിന് പ്രചോദനമായി. വീഡിയോയില്‍ താരം വ്യക്തമാക്കുന്നു.
ഐപിഎല്‍ താരലേലത്തിനായി ദുബായില്‍ എത്തിയിരിക്കുകയാണ് താരം. ഡല്‍ഹി ക്യാപിറ്റല്‍സിനായി കളിക്കാനാകും എന്ന പ്രതീക്ഷയിലാണ് താരം.
