ത്യാഗത്തിന്റെയും സമര്‍പ്പണത്തിന്റെയും സ്മരണയില്‍ വിശ്വാസികള്‍ക്ക് ഇന്ന് ബലിപെരുന്നാള്‍. ബലികര്‍മമുള്‍പ്പെടെയുള്ള ചടങ്ങുകള്‍ക്കൊപ്പം കുടുംബ സന്ദര്‍ശനവും മധുരം പങ്കിടലും സൗഹൃദം പുതുക്കലുമായി വിശ്വാസികള്‍ ആഘോഷ നിറവിലാണ്.
പ്രവാചകന്‍ ഇബ്രാഹീം, പ്രിയപുത്രന്‍ ഇസ്മാഈലിനെ ദൈവ കല്‍പന അനുസരിച്ച് ബലിയറുക്കാന്‍ സന്നദ്ധനായതിന്റെ ത്യാഗസ്മരണ. പരീക്ഷണത്തില്‍ വിജയിച്ച പ്രവാചകന്‍ ഇബ്രാഹിമിനെ നാഥന്‍ ചേര്‍ത്ത് പിടിച്ചു. അചഞ്ചലമായ വിശ്വാസത്തിന്റെ സമര്പ്പണത്തിന്റെ ഓര്‍മപ്പെടുത്തലാണ് ബലിപെരുന്നാള്‍ ദിനം.
