തിരുവനന്തപുരം: തിരുവനന്തപുരം ചെന്നൈ മെയിലില്‍ ലേഡീസ് കമ്പാര്‍ട്ട്മെന്റില്‍ യാത്ര ചെയ്തത് ചോദ്യം ചെയ്ത വനിത ടിടിഇക്ക് നേരെ കയ്യേറ്റ ശ്രമം നടത്തിയ യാത്രക്കാരന്‍ അറസ്റ്റില്‍. ട്രെയിന്‍ കൊല്ലം സ്റ്റേഷന്‍ കഴിഞ്ഞപ്പോഴാണ് സംഭവം. ലേഡീസ് കമ്പാര്‍ട്ട്മെന്റില്‍ യാത്ര ചെയ്ത പ്രതിയ്‌ക്കെതിരെ പരാതിയുണ്ടായതിനെത്തുടര്‍ന്ന് വനിതാ ടിടിഇ കമ്പാര്‍ട്ട്‌മെന്റിലെത്തി മാറിയിരിക്കണമെന്ന് ആവശ്യപ്പെടുകയായിരുന്നു. എന്നാല്‍ മാറാന്‍ തയ്യാറാകാതിരുന്ന യാത്രക്കാരന്‍ വനിത ടിടിഇയുമായി വാക്കുതര്‍ക്കത്തിലേര്‍പ്പെട്ടു. ടിടിഇയുടെ ചിത്രങ്ങള്‍ മൊബൈല്‍ ഫോണില്‍ പകര്‍ത്താനും ഇയാള്‍ ശ്രമിച്ചു. തുടര്‍ന്ന് ടിടിഇ ആര്‍പിഎഫിനെ ഫോണില്‍ ബന്ധപ്പെടുകയും കായംകുളത്ത് വച്ച് ആര്‍പിഎഫ് എത്തി പ്രതിയെ പിടികൂടുകയുമായിരുന്നു.
ട്രെയിനുകളില്‍ തുടര്‍ച്ചയായി ടിടിഇമാര്‍ക്ക് നേരെ കയ്യേറ്റം തുടരുകയാണ്. തൃശൂരില്‍ ടിടിഇ വിനോദിനെ അന്യസംസ്ഥാന തൊഴിലാളി ട്രെയിനില്‍ നിന്ന് തള്ളിയിട്ട് കൊലപ്പെടുത്തിയതിന്റെ ഞെട്ടല്‍ മാറുന്നതിന് മുമ്പ് മറ്റൊരു സംഭവം കൂടി പുറത്തുവരുന്നത്.
