തൃശൂരിലെ സാംസ്‌കാരികപ്രവര്‍ത്തകരുമായുള്ള മുഖാമുഖം പരിപാടിയിലും മാധ്യമപ്രവര്‍ത്തകര്‍ക്ക് വിലക്കേര്‍പ്പെടുത്തി. ലുലു കണ്‍വെന്‍ഷന്‍ സെന്ററിലാണ് മുഖ്യമന്ത്രി പിണറായി വിജയനും (Pinarayi Vijayan) കലാ സാംസ്‌കാരിക പ്രവര്‍ത്തകരും തമ്മിലുള്ള മുഖാമുഖം നടക്കുന്നത്. ഉദ്ഘാടനത്തിനുശേഷം മാധ്യമപ്രവര്‍ത്തകരോട് പുറത്തുപോകണമെന്നു നിര്‍ദേശിക്കുകയായിരുന്നു. അറിയിപ്പു കേള്‍ക്കാത്തവര്‍ക്കായി വാട്സാപ്പിലൂടെയും ഔദ്യോഗികമായി പുറത്തുപോകണമെന്ന് അഭ്യര്‍ഥിച്ചു. മാധ്യമ സുഹൃത്തുക്കള്‍ എല്ലാവരും മുഖാമുഖം ഹാളില്‍ നിന്ന് പുറത്തുപോകേണ്ടതാണെന്നായിരുന്നു അറിയിപ്പ്.
കണ്ണൂരില്‍ ദലിത്, ആദിവാസി പ്രതിനിധികളുമായി നടത്തിയ മുഖാമുഖം പരിപാടിയില്‍നിന്നും സമാനമായ രീതിയില്‍ മാധ്യമപ്രവര്‍ത്തകരെ പുറത്താക്കിയിരുന്നു. മുഖ്യമന്ത്രിയുടെ പ്രസംഗം കഴിഞ്ഞയുടനാണ് നടപടി. പിന്നീട് പരിപാടിയുടെ വിശദമായ പ്രസ് റിലീസ് മാധ്യമങ്ങള്‍ക്ക് അയക്കുന്ന രീതിയാണ് ഇപ്പോള്‍ അവലംബിക്കുന്നത്.
