പുറത്തിറങ്ങാൻ പറഞ്ഞ എസ്‌ഐയുടെ കൈ കടിച്ച് മുറിച്ച് യുവാവ്….

തിരൂർ: സംശയാസ്‌പദമായി നിർത്തിയിട്ടിരുന്ന കാറിൽ നിന്ന് ഇറങ്ങാൻ ആവശ്യപ്പെട്ടതിന് യുവാവ് എസ്ഐയുടെ കയ്യിൽ കടിച്ച് മുറിവേൽപ്പിച്ചു. മലപ്പുറം തിരൂരിലാണ് സംഭവം. എസ്ഐയെ ആക്രമിച്ച മംഗലം കുട്ടമ്മാക്കൽ കുയിപ്പയിൽ അജയൻ (45) അറസ്റ്രിലായിട്ടുണ്ട്. തിരൂർ പൊലീസ് സ്റ്റേഷനിലെ എസ്‌ഐ ആയ ഉദയരാജിന്റെ കയ്യാണ് ഇയാൾ കടിച്ച് മുറിവേൽപ്പിച്ചത്. കഴിഞ്ഞ ദിവസം പുലർച്ചെ തൃപ്രങ്ങോട് ബീരാഞ്ചിറയിലായിരുന്നു സംഭവം.
ഉദയരാജും സംഘവും പട്രോളിംഗിനിടെയാണ് പുലർച്ചെയോടെ ബീരാഞ്ചിറയിൽ എത്തിയത്. ഇവിടെ ഒരു കാർ സംശയാസ്‌പദമായി നിർത്തിയിട്ടിരിക്കുന്നത് ഇവർ കണ്ടു. ഇതോടെ അടുത്തെത്തി പൊലീസ് സംഘം കാർ പരിശോധിച്ചു. ഡ്രൈവിംഗ് സീറ്റിൽ ഒരു യുവാവ് ഉണ്ടായിരുന്നു. പേര് ചോദിച്ചപ്പോൾ മറുപടി നൽകി. തുടർന്ന് വാഹനം പരിശോധിക്കണമെന്നും പുറത്തിറങ്ങാനും ആവശ്യപ്പെട്ടു. എന്നാൽ, വാഹനത്തിൽ നിന്നും ഇറങ്ങാൻ അജയൻ തയ്യാറായില്ല. ഇതോടെ കാറിന്റെ ഡോർ തുറന്ന് യുവാവിനെ പുറത്തിറക്കാൻ പൊലീസ് ശ്രമിച്ചു. തുടർന്ന് ഇയാളും പൊലീസുമായി ഉന്തും തള്ളുമുണ്ടായി. ഇതിനിടെയാണ് അജയൻ എസ്‌ഐയുടെ കയ്യിൽ കടിച്ചത്.ഇതോടെ പൊലീസ് ഉദ്യോഗസ്ഥർ പ്രതിയെ ബലമായി പിടിച്ചുവച്ചു. പിന്നീട് ഇയാളെ അറസ്റ്റ് ചെയ്ത് തിരൂർ പൊലീസ് സ്റ്റേഷനിലെത്തിച്ചു. മുറിവേറ്റ എസ്‌ഐ തിരൂർ ജില്ലാ ആശുപത്രിയിൽ ചികിത്സ തേടിയിരിക്കുകയാണ്.