പ്രീമിയര്‍ ലീഗിലെ മികച്ച ഫോം ലീഗ് കപ്പിലും തുടര്‍ന്ന് ലിവര്‍പൂള്‍. ഇന്നലെ നടന്ന ലീഗ് കപ്പില്‍ വെസ്റ്റ് ഹാമിനെ ഒന്നിനെതിരെ അഞ്ച് ഗോളുകള്‍ക്കാണ് തകര്‍ത്ത് വിട്ടത്. ഈ വിജയത്തോടെ സെമിയിലേക്ക് മുന്നേറാനും അവര്‍ക്കായി. സെമിയില്‍ ഫുള്‍ഹാമാണ് എതിരാളികള്‍. ജനുവരി ഒന്‍പതിനാണ് മത്സരം.
ലിവര്‍പൂളിനായി ജോണ്‍സ് ഇരട്ട ഗോളുകള്‍ നേടിയപ്പോള്‍ സ്ലൊബസ്ലായ്, ഗാക്‌പോ, മുഹമ്മദ് സലാ എന്നിവര്‍ ഒരോ ഗോളുകള്‍ വീതം നേടി. വെസ്റ്റഹാമിന്റെ ആശ്വാസ ഗോള്‍ ബോവെനാണ് നേടിയത്.
പ്രീമിയര്‍ ലീഗിലെ മികച്ച ഫോമുമായി എത്തിയതായിരുന്നു വെസ്റ്റ് ഹാം. എന്നാല്‍ ക്ലോപ്പിന്റെ ടീമിനോട് അവര്‍ തകര്‍ന്നടിയുകയായിരുന്നു. പ്രീമിയര്‍ ലീഗ് കിരീടവും യൂറോപ്പ ലീഗ് കിരീടവും ലക്ഷ്യമിടുന്ന ലിവര്‍പൂളിന് കരാബാവോ കപ്പിലും സെമിയില്‍ എത്തിയത് ഈ സീസണിലെ കൂടുതല്‍ നേട്ടമായി.
നിലവില്‍ 38 പോയിന്റുമായി ലിവര്‍പൂള്‍ പ്രീമിയര്‍ ലീഗില്‍ രണ്ടാം സ്ഥാനത്താണ്.. ഒരു പോയിന്റെന്റെ വ്യത്യാസത്തില്‍ ആഴ്‌സണലാണ് ഒന്നാമത്. അടുത്ത മത്സരം ഇരുവരും തമ്മിലായതിനാല്‍ പോയിന്റെ ടേബിളില്‍ മാറ്റങ്ങള്‍ ഉണ്ടാകും.
മാഞ്ചസ്റ്റര്‍ യുണൈറ്റഡുമായി ആന്‍ഫീല്‍ഡില്‍ കഴിഞ്ഞ മത്സരം സമനിലയിലായ ലിവര്‍പൂളിന് വെസ്റ്റ്ഹാമിനെതിരെയുള്ള വിജയം ആഴ്‌സണലിനെ നേരിടാന്‍ ഇറങ്ങുമ്പോള്‍ കൂടുതല്‍ ആത്മവിശ്വാസം പകരും.
