ന്യൂസിലാന്റില്‍ കന്നി ടി20 വിജയം നേടി ബംഗ്ലാദേശ്. ഏകദിനത്തിലെ തങ്ങളുടെ കന്നി വിജയം ഏതാനും ദിവസം മുമ്പ് ബംഗ്ലാദേശ് ടീം നേടിയിരുന്നു. അതിന് ശേഷമാണ് ഈ നേട്ടവും ബംഗ്ലാദേശ് നേടിയത്.
ഇന്നലെ നടന്ന മത്സരത്തില്‍ ആദ്യം ന്യൂസിലാന്റാണ് ബാറ്റ് ചെയ്തത്. മികച്ച രീതിയല്‍ ബംഗ്ലാദേശ് ബൗളര്‍മാര്‍ ബൗള്‍ ചെയ്തപ്പോള്‍ ന്യൂസിലന്റിന് ഒന്‍പത് വിക്കറ്റ് നഷ്ടത്തില്‍ 134 റണ്‍സ് എടുക്കാനേ സാധിച്ചുള്ളൂ. 48 റണ്‍സ് നേടി ജെയിംസ് നീഷം ന്യൂസിലണ്ടിന്റെ ടോപ് സ്‌കോറര്‍ ആയി. ഷൊറിഫുള്‍ ഇസ്ലാം മൂന്നും മഹേദി ഹസന്‍, മുസ്തഫിസുര്‍ എന്നിവര്‍ രണ്ട് വിക്കറ്റ് വീതം നേടി ബംഗ്ലാദേശ് നിരയില്‍ തിളങ്ങി.
എന്നാല്‍ മറുപടി ബാറ്റിംഗിനിറങ്ങിയ ബംഗ്ലാദേശ് 18.4 ഓവറില്‍ ലക്ഷ്യം കണ്ടു. അഞ്ച് വിക്കറ്റ് നഷ്ടത്തിലാണ് ബംഗ്ലാദേശ് ചരിത്ര നേട്ടത്തിലെത്തിയത്. 42 റണ്‍സ് നേടിയ ലിറ്റണ്‍ ദാസാണ് ടോപ് സ്‌കോറര്‍. സൗമ്യ സര്‍ക്കാരും തൗഹിദ് ഹൃദോയും മഹേദി ഹസനും ബംഗ്ലാദേശിന് വേണ്ടി തിളങ്ങി.
