- Advertisement -
കോഴിക്കോട് പുതിയ ടാഗോർ ഹാൾ നിർമ്മിക്കാൻ തയ്യാറെടുത്ത് കോർപറേഷൻ. പദ്ധതി രൂപരേഖകളുടെ ആദ്യഘട്ട അവതരണവും പരിശോധനയും പൂർത്തിയായി. സംസ്ഥാനത്തിന്റെ വിവിധ ഭാഗങ്ങളിൽനിന്നുള്ള ആർക്കിടെക്ടുമാരുടെ പാനലിൽനിന്ന് 6 പേരാണ് പദ്ധതി രൂപരേഖകൾ സമർപ്പിച്ചത്. കോഴിക്കോട്ടുനിന്ന് 2 പേരും ഇതിലുൾപ്പെടും. നഗരത്തിന്റെ പാരമ്പര്യം നിലനിർത്തുന്ന രീതിയിലാണ് പുതിയ ടഗോർ ഹാൾ നിർമാണത്തിന് രൂപരേഖകൾ തയാറാക്കിയിരിക്കുന്നത്.
വിവിധ സ്ഥിരം സമിതി അധ്യക്ഷരും ധനകാര്യ കമ്മിറ്റിയംഗങ്ങളും എൻജിനീയറിങ് വിഭാഗം അധികൃതരും 6 രൂപരേഖകളുടെ അവതരണത്തിൽ പങ്കെടുത്തിരുന്നു. കോർപറേഷൻ മുന്നോട്ടുവച്ച നിർദേശങ്ങളും പരിഷ്കാരങ്ങളും കൂടി കണക്കിലെടുത്ത് പുതുക്കിയ രൂപരേഖകൾ ആർക്കിടെക്ടുകൾ തയ്യാറാക്കി അവതരിപ്പിക്കും. ഇതിനു ശേഷമേ ഇതിൽനിന്നൊരെണ്ണം തിരഞ്ഞെടുക്കൂ. അടുത്ത അവതരണത്തിന്റെ തീയതി തീരുമാനിച്ചിട്ടില്ല.
