പട്ടിക്കാട് : ദേശീയപാത പട്ടിക്കാട് പിക്കപ്പ് വാൻ മറിഞ്ഞ് അപകടം. അപകടത്തിൽ ഡ്രൈവറും സഹായിയും പരിക്കേൽക്കാതെ അത്ഭുതകരമായി രക്ഷപെട്ടു. ഇന്ന് രാവിലെ 10 മണിയോടെ പാലക്കാട് ഭാഗത്തേക്കുള്ള പാതയിൽ മേൽപ്പാത ഇറങ്ങുന്നിടത്താണ് അപകടം ഉണ്ടായത്. അപകടകാരണം വ്യക്തമല്ല. നിയന്ത്രണം വിട്ട് ഡിവൈഡറിൽ ഇടിച്ച പിക്കപ്പ് വാൻ ദേശീയപാതയിൽ രണ്ടുപ്രാവശ്യം മറിഞ്ഞതായി ദൃക്സാക്ഷികൾ പറഞ്ഞു. ആലുവയിൽ നിന്നും പാലക്കാടിന് റിവേറ്റ് കയറ്റി പോവുകയായിരുന്നു വാൻ. അപകടത്തിൽ വാഹനം പൂർണ്ണമായും തകർന്നു. പീച്ചി പോലീസ് എസ്ഐ അമീർ അലി, സിപിഒ ഒ.ബി സനിൽകുമാർ എന്നിവർ അപകടം നടന്നയുടൻ സ്ഥലത്തെത്തി ഗതാഗത നിയന്ത്രണം ഏർപ്പെടുത്തുകയും വേണ്ട നടപടികൾ സ്വീകരിക്കുകയും ചെയ്തു. നാട്ടുകാർ ചേർന്ന് റോഡിൽ ചിതറിക്കിടന്നിരുന്ന റിവേറ്റ് ബോക്സുകൾ നീക്കം ചെയ്തു. മണ്ണുത്തി പോലീസ് ഉദ്യോഗസ്ഥരും സ്ഥലത്തെത്തി.
