തൃശൂർ: നിർമ്മാണ തൊഴിലാളികളുടെ അംശാദായ തുക സർക്കാർ ധൂർത്തടിക്കുകയാണെന്ന് ബിൽഡിങ് ആൻഡ് റോഡ് വർക്കേഴ്സ് ഫെഡറേഷൻ ഐഎൻടിയുസി സംസ്ഥാന സെക്രട്ടറി ജനറൽ അഡ്വക്കേറ്റ് കെഎക്സ് സേവിയർ പറഞ്ഞു. ബിൽഡിംഗ് ആൻഡ് റോഡ് വർക്ക് ഫെഡറേഷൻ ഐഎൻടിയുസി തൃശ്ശൂർ ജില്ലാ കമ്മിറ്റിയുടെ നേതൃത്വത്തിൽ സംഘടിപ്പിച്ച കലക്ടറേറ്റ് ധർണ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മുതലാളിമാരിൽ നിന്നും പിരിച്ചെടുക്കുന്ന സെസ് തുക ക്ഷേമനിധിയിൽ നിക്ഷേപിക്കാതെ ട്രഷറിയിൽ നിക്ഷേപിച്ച് തൊഴിലാളികളെ നിരന്തരം ചതിച്ചു കൊണ്ടിരിക്കുകയാണ് സർക്കാർ ചെയ്യുന്നതെന്ന് ധർണയിൽ നേതാക്കൾ ആരോപിച്ചു. ഫെഡറേഷൻ ജില്ലാ പ്രസിഡണ്ട് പിജി ബേബി അധ്യക്ഷത വഹിച്ചു. സംസ്ഥാന ട്രഷറർ ജോൺ പഴേരി മുഖ്യപ്രഭാഷണം നടത്തി. പി ജെ റോയ്, ഫെഡറേഷൻ തൃശ്ശൂർ ജില്ല ജനറൽ സെക്രട്ടറി വറീത് ചിറ്റിലപ്പിള്ളി , എ ഡി പത്രോസ് ഷാജു ഇളവള്ളി വിൽസൺ കൊന്ന കുഴി എന്നിവർ പ്രസംഗിച്ചു.

ചിറ്റാട്ടുകര വെടിക്കെട്ട് പൊതു പ്രദര്‍ശനത്തിന് സമര്‍പ്പിച്ചിട്ടുള്ള അപേക്ഷ നിരസിച്ചു. പോലീസ്, ഫയര്‍, റവന്യൂ വകുപ്പുകളുടെ അന്വേഷണ റിപ്പോര്‍ട്ടുകള്‍ എതിരായതിനാല്‍ പൊതുജന സുരക്ഷ മുന്‍നിര്‍ത്തി എക്‌സ്ലോസീവ് ആക്ട് 1884 ലെ 6 സി (1) (സി) യുടെ അടിസ്ഥാനത്തില്‍ സമര്‍പ്പിച്ചിട്ടുള്ള അപേക്ഷ എഡിഎം നിരസിച്ചു.

കുന്നംകുളം: പഴഞ്ഞി പെങ്ങാമുക്കിൽ വീടിന് തീപിടിച്ചു വൻ നാശനഷ്ടം. പെങ്ങാമുക്ക് ഹൈസ്കൂളിനടുത്ത് ഒറ്റയ്ക്ക് താമസിക്കുന്ന കുഞ്ഞു കുട്ടി എന്നയാളുടെ വീടിനാണ് തീപിടിച്ചത്. തീ പടരുന്ന നേരത്ത് കുഞ്ഞു കുട്ടി വീടിനു വെളിയിൽ ആയിരുന്നു. നാട്ടുകാരുടെ നേതൃത്വത്തിൽ തീയണക്കാൻ ശ്രമിച്ചെങ്കിലും തീ അണക്കാൻ കഴിയാതെ അഗ്നി രക്ഷാ സേനയെ വിവരം അറിയിച്ചു. അഗ്നി രക്ഷാ സേന ഉദ്യോഗസ്ഥനായ ബി വൈശാഖിന്റെ നേതൃത്വത്തിലുള്ള സംഘം എത്തിയാണ് തീ അണച്ചത്. വീട്ടിൽ നിന്നും പുക ഉയരുന്നത് കണ്ട് അയൽക്കാരാണ് വീടിന് പുറത്ത് നിന്നിരുന്ന കുഞ്ഞു കുട്ടിയെ വിവരം അറിയിക്കുന്നത്. അപ്പോഴേക്കും തീ പടർന്നിരുന്നു. വീടിന്റെ ചുമരുകളും അടർന്നു വീണു. വസ്ത്രങ്ങളും ഫർണിച്ചറുകളും ഇലക്ട്രോണിക്സ് ഉപകരണങ്ങളും ഉൾപ്പെടെ കത്തി നശിച്ചു വലിയ നാശനഷ്ടമാണ് ഉണ്ടായത്. അഗ്നിരക്ഷ സേനയിലെ വിപിൻ, ഹരിക്കുട്ടൻ, ഗോഡ്സൺ, ആദർശ് എന്നിവരും പങ്കാളികളായി.