തൃശ്ശൂർ: കടങ്ങോട് പഞ്ചായത്തിലെ 16 കുടുംബങ്ങൾക്ക് പ്രധാനമന്ത്രി ഉജ്ജ്വൽ യോജന പ്രകാരം സൗജന്യമായി പാചകവാതകം വിതരണം ചെയ്തു. ബി.ജെ.പി. യുടെ നേതൃത്വത്തിൽ കടങ്ങോട് പഞ്ചായത്തിലെ നാലാം വാർഡിലാണ് വിതരണം നടന്നത്. ബി.ജെ. പി. ജില്ലാ ട്രഷറർ കെ.ആർ. അനീഷ് ഉദ്ഘാടനം ചെയ്തു. പഞ്ചായത്തംഗം കെ.എ. അഭിലാഷ് അധ്യക്ഷനായി. ബി.ജെ.പി. പഞ്ചായത്ത് പ്രസിഡന്റ് എം.വി. ധനീഷ്, എരുമപ്പെട്ടി മണ്ഡലം പ്രസിഡന്റ് സുഭാഷ് ആദൂർ, പട്ടികജാതി മോർച്ച എരുമപ്പെട്ടി മണ്ഡലം പ്രസിഡന്റ് കെ.വി. ബാബു എന്നിവർ പ്രസംഗിച്ചു.

തൃശൂർ: വിവിധ ആവശ്യങ്ങൾ ഉന്നയിച്ച് തൃശ്ശൂർ ജില്ലാ സംയുക്ത കർഷകസമിതിയുടെ നേതൃത്വത്തിൽ ഡിസംബർ 26, 27 പ്രചരണ ജാഥ സംഘടിപ്പിക്കുന്നു. വൻകിട ടയർ കമ്പനികൾ കൊള്ളയടിച്ച് ഉണ്ടാക്കിയ 1788 കോടി രൂപ സിസിഐ വിധിയുടെ അടിസ്ഥാനത്തിൽ റബർ കർഷകർക്ക് നൽകുക, 300 രൂപയെങ്കിലും ഒരു കിലോ റബറിന് തറവില നിശ്ചയിച്ച് കേന്ദ്രസർക്കാർ സംഭരിക്കുക, കേന്ദ്രസർക്കാർ 300 രൂപ നൽകാത്തപക്ഷം വില സ്ഥിരത ഫണ്ട് വർദ്ധിപ്പിക്കുക, ആവർത്തന കൃഷിക്ക് കേന്ദ്രസഹായം പുനസ്ഥാപിക്കുക, കേന്ദ്രസർക്കാർ കർഷക ദ്രോഹ നയങ്ങൾ തിരുത്തുക എന്നിവയാണ് കർഷകർ ഉന്നയികുന്ന ആവശ്യങ്ങൾ.

പ്രചരണ ജാഥയ്ക്ക് പുറമെ ഡിസംബർ 30ന് കളമശ്ശേരി അപ്പോളോ ടയേഴ്സിന് മുമ്പിൽ മാർച്ചും ഉപരോധവും നടക്കും. ജാഥ കേരള കർഷകസംഘം ജില്ലാ സെക്രട്ടറി എഎസ് കുട്ടി, കിസാൻ സഭാ ജില്ലാ സെക്രട്ടറി കെവി വസന്തകുമാർ, കേരള കർഷക സംഘം പ്രസിഡന്റ് പി ആർ വർഗീസ് മാസ്റ്റർ എന്നിവർ നയിക്കും.

കെ കെ രാജേന്ദ്ര ബാബു, എം എം അവറാച്ചൻ, വിസി ബേബി മാസ്റ്റർ, പിജി നാരായണൻ നമ്പൂതിരി, ജോർജ് വി ഐനിക്കൽ, പി എസ് ഉത്തമൻ, അലക്സ് സ്റ്റീഫൻ, പൗലോസ് ചേലക്കര, ജെയിംസ് മുട്ടിക്കൽ, സിദ്ധാർത്ഥൻ പട്ടേപ്പാടം തുടങ്ങിയവർ പങ്കെടുക്കും.

സാങ്കേതിക തടസങ്ങൾ കാരണം നിർത്തിവെച്ച കാവടിപ്പാലത്തിൻ്റെ പണി പുനരാരംഭിച്ചു. 2020ൽ ടൂറിസം വകുപ്പ് വികസന പദ്ധതിയിൽ ഉൾപ്പെടുത്തിയാണ് ചാർപ വെള്ളച്ചാട്ടം അടുത്തു കാണുന്നതിന് വേണ്ടി കാവടിപ്പാലത്തിൻ്റെ നിർമ്മാണം ആരംഭിച്ചത്.

മരാമത്ത് വകുപ്പിന്റെ മേൽനോട്ടത്തിലാണ് പാലത്തിന്റെ നിർമാണം. 90 ലക്ഷം വകയിരുത്തി നടപ്പിലാക്കുന്ന പദ്ധതി 2024 ഫെബ്രുവരിയിൽ പൂർത്തീകരിക്കാനാണ് ലക്ഷ്യമിടുന്നത്. സ്ഥലമെടുപ്പ് സംബന്ധിച്ച സാങ്കേതിക തടസ്സങ്ങൾ കാരണമാണ് നേരത്തെ പാലം പണി നിർത്തിവെച്ചിരുന്നത്. ഈ തടസ്സങ്ങൾ നീങ്ങിയാൽ വേ​ഗത്തിൽ പണി പൂർത്തിയാക്കാൻ കഴിയുമെന്നാണ് പ്രതീക്ഷ.

മഴക്കാലത്ത് റോഡ് കവിഞ്ഞൊഴുകുന്ന വെള്ളച്ചാട്ടം കാണാൻ ആയിരക്കണക്കിന് സന്ദർശകരാണ് എത്താറുള്ളത്. അതേസമയം, പാലത്തിന്റെ അശാസ്ത്രീയ നിർമാണം മൂലം വെള്ളച്ചാട്ടത്തിന്റ ഭംഗി നഷ്ടപ്പെട്ടതായും വിമർശനമുണ്ട്. നിലവിലുള്ള പാലത്തിനു സമാന്തരമായുണ്ടായിരുന്ന പഴയ ബ്രിട്ടിഷ് നിർമിത പാലം പൊളിച്ചാണ് പുതിയ പാലം പണിയുന്നത്.

പത്തനംതിട്ട: പന്തളം ഏഴംകുളത്ത് എബിവിപി പ്രവർത്തകന്റെ വീടിന് നേരെ എസ്എഫ്ഐ ആക്രമണം നടന്നതായി പരാതി. വെള്ളിയാഴ്ച അർധരാത്രി രണ്ട് മണിയോടെ എബിവിപി പ്രവർത്തകൻ ശ്രീനാഥിന്റെ വീടിന് നേരെയാണ് ആക്രമണമുണ്ടായത്.

പന്തളം എൻഎസ്എസ് കോളേജിലെ എബിവിപി-എസ്എഫ്ഐ സംഘർഷത്തിന്റെ തുടർച്ചയായാണ് ആക്രമണം നടന്നതെന്ന് പരാതിയിൽ പറയുന്നു. വ്യാഴാഴ്ച രാവിലെ പന്തളം എൻഎസ്എസ് കോളേജിലെ ക്രിസ്മസ് ആഘോഷത്തിനിടെ ഇരുവിഭാ​ഗങ്ങളും തമ്മിൽ ഏറ്റുമുട്ടിയിരുന്നു. പോലീസെത്തി ബലപ്രയോഗിച്ചാണ് ഇവരെ പിരിച്ചുവിട്ടത്.