ജില്ലാ പഞ്ചായത്തിന്റെ കീഴിലുള്ള ഓട്ടുപാറ ജില്ലാ ആശുപത്രി സമഗ്ര വികസനത്തിനു മാസ്റ്റർ പ്ലാൻ അംഗീകരിച്ചു. കോസ്റ്റ് ഫോർഡ് തയ്യാറാക്കിയ മാസ്റ്റർ പ്ലാൻ ആണ് ജില്ലാ ആശുപത്രിയിൽ ചേർന്ന ആശുപത്രി വികസന സമിതി യോഗത്തിൽ അവതരിപ്പിച്ച് അംഗീകാരം നേടിയത്.
യോഗത്തിൽ വടക്കാഞ്ചേരി എംഎൽഎ സേവ്യർ ചിറ്റിലപ്പിള്ളി അദ്ധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡണ്ട് ലത ചന്ദ്രൻ, നഗരസഭ ചെയർമാൻ, പി എൻ സുരേന്ദ്രൻ, ജില്ലാ പഞ്ചായത്ത് ആരോഗ്യ സ്റ്റാൻഡിങ് കമ്മിറ്റി ചെയർമാൻ റഹീം വീട്ടി പറമ്പിൽ, ജില്ലാ പഞ്ചായത്ത് അംഗം എ വി.വല്ലഭൻ, ബ്ലോക്ക് പഞ്ചായത്ത് വൈസ് പ്രസിഡണ്ട് ടി വി സുനിൽകുമാർ, നഗരസഭാ വൈസ് ചെയർപേഴ്സൺ ഷീല മോഹൻ മറ്റു ബന്ധപ്പെട്ട ഉദ്യോഗസ്ഥർ, വികസന സമിതി അംഗങ്ങൾ തുടങ്ങിയവർ ചർച്ചയിൽ പങ്കെടുത്ത് സംസാരിച്ചു.
കോസ്റ്റ് ഫോർഡ് പ്രതിനിധി ദേവപ്രിയൻ രൂപരേഖ അവതരിപ്പിച്ചു. നാല് ഘട്ടങ്ങളിലായി 2 ലക്ഷം സ്ക്വയർ ഫീറ്റിലാണ് കെട്ടിടങ്ങൾ വിഭാവനം ചെയ്തിട്ടുള്ളത്. ആശുപത്രി സൂപ്രണ്ട് സ്വാഗതവും ജില്ലാ പഞ്ചായത്ത് അംഗം ജലീൽ ആദൂർ നന്ദിയും പറഞ്ഞു.
