കോട്ടയം: സ്നേഹാലയത്തിലെ അഗതികൾക്ക് നൽകാനായി പൊതിച്ചോറ് ശേഖരിക്കാൻ റോഡിൽ നിന്ന പഞ്ചായത്തംഗത്തെ കറുത്ത ഷർട്ട് ധരിച്ചെന്ന പേരിൽ വാകത്താനം പൊലീസ് അറസ്റ്റ് ചെയ്തതായി പരാതി. നവകേരള സദസിന് ചങ്ങനാശേരിയിലേക്ക് മുഖ്യമന്ത്രിയുടെ വാഹനവ്യൂഹം കടന്നുപോകുന്നതിന് മുൻപാണ് വാകത്താനം പഞ്ചായത്ത് 18ാം വാർഡ് മെംബർ എജി പാറപ്പാട്ടിനെ അറസ്റ്റ് ചെയ്തത്. ഇതിനിടെ റോഡിലുടെ കറുത്ത കുടയുമായെത്തിയ ഗൃഹനാഥനെയും രണ്ട്അതിഥി തൊഴിലാളികളെയും പൊലീസ് തടഞ്ഞതായും പരാതിയുണ്ട്.
വീടിനടുത്ത് സുഹൃത്തുമായി സംസാരിച്ചു നിൽക്കവെയാണ് എജിയെ വാകത്താനം പൊലീസെത്തി ചോദ്യം ചെയ്തത്. പിന്നാലെ കറുകച്ചാൽ പൊലീസ് സംഘവുമെത്തി. കറുത്ത ഷർട്ടിട്ട് പ്രതിഷേധിക്കാനാണോ എന്ന് ചോദിച്ച പൊലീസ് ഇവിടെ നിൽക്കാൻ പറ്റില്ലെന്നും പൊലീസ് വാഹനത്തിൽ കയറണമെന്നും എജിയോട് ആവശ്യപ്പെട്ടു. താൻ ക്രിമിനിൽ കുറ്റം ചെയ്തിട്ടില്ലല്ലോ എന്ന് ചോദിച്ച എജിയെ കൂടുതൽ വർത്തമാനം പറയണ്ട എന്ന് പറഞ്ഞ് പൊലീസ് ജീപ്പിൽ കയറ്റി വാകത്താനം പൊലീസ് സ്റ്റേഷനിൽ എത്തിക്കുകയായിരുന്നു.
