തൃശൂർ: പ്രധാനമന്ത്രി നരേന്ദ്ര മോദി വീണ്ടും തൃശൂരിൽ എത്തിയേക്കും. നടനും ബിജെപി നേതാവുമായ സുരേഷ് ഗോപിയുടെ മകളുടെ വിവാഹച്ചടങ്ങിൽ പങ്കെടുക്കാനായി പ്രധാനമന്ത്രി ജനുവരി 17ന് ഗുരുവായൂരിൽ എത്തിയേക്കുമെന്നാണ് റിപ്പോർട്ട്. പ്രധാനമന്ത്രി എത്തുന്നതിനു മുന്നോടിയായി സുരക്ഷ ക്രമീകരണങ്ങൾ സംബന്ധിച്ചു കേന്ദ്രം പോലീസിനോട് റിപ്പോർട്ട് തേടിയെന്നാണ് വിവരം. ഇക്കഴിഞ്ഞ മൂന്നിന് തേക്കിൻകാട് മൈതാനിയിൽ ബിജെപി സംഘടിപ്പിച്ച മഹിളാസമ്മേളനത്തിൽ പ്രധാനമന്ത്രി പങ്കെടുത്തിരുന്നു.
ജനുവരി 17ന് ഗുരുവായൂർ ക്ഷേത്രത്തിൽ വെച്ചാണ് സുരേഷ് ഗോപിയുടെ മകൾ ഭാഗ്യ സുരേഷിൻ്റെ വിവാഹം നടക്കുന്നത്. സുരേഷ് ഗോപി, ഭാര്യ രാധിക സുരേഷ് എന്നിവർ ഡൽഹിയിൽ എത്തി പ്രധാനമന്ത്രിയെ വിവാഹത്തിലേക്ക് ക്ഷണിച്ചിരുന്നു. കഴിഞ്ഞ ദിവസം തൃശൂരിൽ നടന്ന സമ്മേളനത്തിനിടെ സുരേഷ് ഗോപിക്കൊപ്പം മക്കളായ ഭാവ്നി സുരേഷ്, മാധവ് എന്നിവരും പ്രധാനമന്ത്രിയെ സന്ദർശിച്ചിരുന്നു.
പ്രധാനമന്ത്രി എത്തുന്നതിനു മുന്നോടിയായി പോലീസ് സുരക്ഷാ ക്രമീകരണങ്ങൾ പരിശോധിച്ചു വരികയാണെന്നാണ് വിവരം. ഇതിൻ്റെ ഭാഗമായി ഹെലിപാഡുള്ള ഗുരുവായൂർ ശ്രീകൃഷ്ണ കോളേജിൽ ഉന്നത പോലീസ് ഉദ്യോഗസ്ഥരെത്തി പരിശോധന നടത്തി. സുരക്ഷ സംബന്ധിച്ച വിശദമായ റിപ്പോർട്ട് കേന്ദ്രത്തിനു കൈമാറിയ ശേഷമാകും പ്രധാനമന്ത്രിയുടെ സന്ദർശനത്തിൽ സ്ഥിരീകരണം ഉണ്ടാകുക.
