അമേരിക്കൻ ക്രൈം ചിത്രവും 2023ലെ മികച്ച ചിത്രങ്ങളുടെ പട്ടികയിൽ ഇടം പിടിച്ചതുമായ ‘കില്ലേഴ്സ് ഓഫ് ദി ഫ്ലവർ മൂൺ’ ഇന്ന് ഡിസംബർ 22ന് വെള്ളിയാഴ്ച ഇരിങ്ങാലക്കുട ഫിലിം സൊസൈറ്റി സ്ക്രീൻ ചെയ്യുന്നു.
പ്രശസ്ത സംവിധായകൻ മാർട്ടിൻ സ്കോർസെസി സംവിധാനം നിർവ്വഹിച്ച ഈ ചിത്രം 1920 കളുടെ തുടക്കത്തിലെ ഒക്‌ലഹോമയിലെ ഒസാജ് നേഷൻ എന്നറിയപ്പെടുന്ന ആദിവാസി ഗ്രാമത്തിൽ നടന്ന കൊലപാതകങ്ങളെ അടിസ്ഥാനമാക്കിയാണ്. ഭൂമിയിൽ എണ്ണ ശേഖരം കണ്ടെത്തിയതോടെ ഒസാജ് സമൂഹം അമേരിക്കയിലെ ധനിക സമൂഹമായി മാറുന്നു. പിന്നീട് ഗോത്രത്തിലെ അംഗങ്ങൾ പലരും ദുരൂഹ സാഹചര്യത്തിൽ കൊല്ലപ്പെടുന്നതുമാണ് സിനിമയുടെ ഇതിവൃത്തം.
അമേരിക്കൻ എഴുത്തുകാരനായ ഡേവിഡ് ഗ്രാനിന്റെ 2017ൽ ഏറ്റവും കൂടുതൽ വിൽക്കപ്പെട്ട നോൺ ഫിക്ഷൻ പുസ്തകമായ ‘ദ ഓസേജ് മർഡേഴ്സ് ആൻഡ് ദ ബർത്ത്’ ഓഫ് ദ എഫ് ബി ഐ’എന്ന നോവലിനെ ആസ്പദമാക്കിയാണ് സിനിമ ഒരുക്കിയിട്ടുള്ളത്. ലിയനാർഡോ ഡികാപ്രിയോ, റോബർട്ട് ഡി നിറോ, ലിലി ഗ്ലാഡ്സ്റ്റൺ എന്നിവർ കേന്ദ്ര കഥാപാത്രങ്ങളെ അവതരിപ്പിക്കുന്നു. മൂന്ന് മണിക്കൂർ ഉള്ള ചിത്രത്തിന്റെ പ്രദർശനം വൈകിട്ട് അഞ്ചിന് ക്രൈസ്റ്റ് കോളേജ് ജംഗ്ഷനിലെ ‘ഓർമ്മ ഹാളിൽ’നടക്കും.
