കാസർകോട്: സിപിഐഎം കാസർകോട് മുൻ ജില്ലാ സെക്രട്ടറിയും മുന്‍ തൃക്കരിപ്പൂർ എംഎൽഎയും ആയ കെ കുഞ്ഞിരാമൻ (80) അന്തരിച്ചു. വാർദ്ധക്യ സഹജമായ അസുഖത്തെ തുടർന്ന് ചികിത്സയിലിരിക്കെ അർദ്ധരാത്രിയോടെ കണ്ണൂർ മിംസ് ആശുപത്രിയിലായിരുന്നു അന്ത്യം. രണ്ടുദിവസം മുൻപ് ഇദ്ദേഹത്തെ ആശുപത്രിയിൽ പ്രവേശിപ്പിച്ചിരുന്നു.
1943 നവംബർ പത്തിന് തുരുത്തി വപ്പിലമാട് കെ വി കുഞ്ഞു വൈദ്യരുടെയും കുഞ്ഞിമാണിക്കത്തിന്റെയും മകനായിട്ട് ആയിരുന്നു ജനനം. പള്ളിക്കര സംഭവം, അടിയന്തരാവസ്ഥ, ചീമേനി തോൽവിറക്ക് പോരാട്ടം എന്നിങ്ങനെ നിരവധി സമരങ്ങളിൽ മുൻനിരയിൽ നിന്ന പോരാളിയായിരുന്നു.
1979 മുതൽ 84 വരെ ചെറുവത്തൂർ പഞ്ചായത്ത് പ്രസിഡണ്ടായി പ്രവർത്തിച്ചിരുന്നു. 2006 മുതൽ 2016 വരെ തൃക്കരിപ്പൂർ എംഎൽഎ ആയിരുന്നു. മൃതദേഹം കാലിക്കടവ്, കാരി , ചെറുവത്തൂർ എന്നിവിടങ്ങളിൽ പൊതുദർശനത്തിന് വച്ചശേഷം ഉച്ചയ്ക്ക് ഒരു മണിക്ക് മട്ടലായിയിലെ മാനവീയം വസതിയിൽ എത്തിച്ചതിനുശേഷം വീട്ടുവളപ്പിൽ സംസ്കരിക്കും.
