ഭരണഘടനാ ദിനാഘോഷങ്ങളുടെ ഭാഗമായി രാജ്യത്തെ തദ്ദേശ സ്വയംഭരണ സ്ഥാപനങ്ങൾ ഉൾപ്പെടെയുള്ള എല്ലാ സർക്കാർ ഓഫീസുകളിലും ഭരണഘടനയുടെ ആമുഖം വായിക്കാൻ കാബിനറ്റ് സെക്രട്ടറിയുടെ സർക്കുലർ. ഭരണഘടനാ ദിനമായ നവംബർ 26 ഞായറാഴ്ചയായതിനാൽ നവംബർ 27ന് ആഘോഷപരിപാടികൾ സംഘടിപ്പിക്കാനാണ് സർക്കുലറിൽ പറയുന്നത്.
ഭരണഘടനയുടെ ആമുഖം വായിക്കുന്നതിനു പുറമെ, പൗരന്മാരുടെ മൗലികാവകാശങ്ങളെ കുറിച്ച് ചർച്ചകളും വെബിനാറുകളും സംഘടിപ്പിക്കാനും
സർക്കുലറിൽ നിർദ്ദേശമുണ്ട്. വിദ്യാഭ്യാസ സ്ഥാപനങ്ങളിലെ അസംബ്ലികളിൽ ആമുഖത്തോടൊപ്പം ഭരണഘടനയുടെ ആർട്ടിക്കിൾ 51 എയിൽ ലിസ്റ്റ് ചെയ്തിരിക്കുന്ന 11 മൗലിക കർത്തവ്യങ്ങൾ വായിക്കാനും സർക്കുലറിൽ പറയുന്നു.
2015 ഒക്ടോബർ 11ന് ഇന്ത്യൻ ഭരണഘടനയുടെ ശിൽപ്പിയായ ഡോ. ബി ആർ അംബേദ്‌കറിന്റെ സ്മരണയ്ക്ക് ‘സ്റ്റാച്യൂ ഓഫ് ഇക്വാലിറ്റി’യുടെ ശിലാസ്ഥാപനം നിർവഹിക്കവെ പ്രധാനമന്ത്രി നരേന്ദ്രമോദിയാണ് നവംബർ 26 ഭരണഘടനാ ദിനമായി ആചരിക്കുമെന്ന് പ്രഖ്യാപിച്ചത്. 2015 അംബേദ്കറുടെ 125-ാം ജന്മവാർഷികം കൂടിയായിരുന്നു. ആ ഇതിഹാസ പുരുഷനോടുള്ള ആദരസൂചകമായാണ് സർക്കാർ ഈ ആശയം മുന്നോട്ടു വെച്ചത്.
