പുതുക്കാട്: ദേശീയപാതയിൽ കെഎസ്ആർടിസി ബസ് സ്റ്റാൻഡിനു മുന്നിൽ മിനി ലോറിക്കു പിറകിൽ കണ്ടെയ്നർ ലോറി ഇടിച്ച് അപകടം. സ്റ്റാൻഡിൽ നിന്നു ദേശീയപാതയിലേക്ക് കയറിയ കെഎസ്ആർടിസി ബസിന്റെ പുറകിൽ ഇടിക്കാതിരിക്കാനായി പെട്ടെന്ന് ബ്രേക്ക് ചെയ്ത മിനി ലോറിക്കു പിറകിൽ കണ്ടെയ്നർ ലോറി ഇടിക്കുകയായിരുന്നു. ബസിൽ ഇടിക്കാതിരുന്നത് യാത്രക്കാർക്ക് രക്ഷയായി. ഇന്നലെ രാവിലെ 7.30നായിരുന്നു അപകടം. ആർക്കും പരുക്കില്ല.
ഇടിയുടെ ആഘാതത്തിൽ ടയറുകൾ കുടുങ്ങിയതിനാൽ കണ്ടെയ്നർ ലോറി മണിക്കൂറുകൾക്കുശേഷമാണ് ദേശീയപാതയിൽ നിന്നു നീക്കിയത്. തൃശൂർ ഭാഗത്തേക്കുള്ള പാതയിൽ ഗതാഗതക്കുരുക്കുണ്ടായി. നിരന്തരം അപകടം സംഭവിക്കുന്ന ഇവിടെ സുരക്ഷയ്ക്കായി നടപടികൾ സ്വീകരിക്കണമെന്ന യാത്രക്കാരുടെ ആവശ്യം അധികൃതർ മുഖവിലയ്ക്കെടുക്കുന്നില്ലെന്ന ആക്ഷേപവും ഉയരുന്നുണ്ട്. ഇവിടെ കെഎസ്ആർടിസി ബസുകൾ സ്റ്റാൻഡിലേക്കും തിരിച്ചും പ്രവേശിക്കുന്നത് വലിയ അപകടഭീഷണിയാണ് ഉയർത്തുന്നത്.
