അശ്വതി മുതൽ രേവതി വരെ; മീന മാസത്തിലെ സമ്പൂർണ നക്ഷത്രഫലം അറിയാം

അശ്വതി

ആദിത്യൻ പന്ത്രണ്ടാം രാശിയിൽ സഞ്ചരിക്കുന്നതിനാൽ ശാരീരിക അദ്ധ്വാനം കൂടുന്ന കാലമാണ്. ജോലിസ്ഥലത്ത് പതിവിലും സമയം ചെലവഴിക്കേണ്ടി വന്നേക്കും. കാര്യാലോചനായോഗങ്ങളിൽ നിലപാടുകളും ആശയങ്ങളും വ്യക്തമാക്കാൻ ക്ലേശിക്കുന്നതാണ്. ഔദ്യോഗിക യാത്രകൾ കൂടിയേക്കും. വ്യാഴം, ചൊവ്വ എന്നീ ഗ്രഹങ്ങൾ അനുകൂലസ്ഥിതിയിൽ തുടരുന്നത് പ്രശ്നങ്ങളെ മറികടക്കാനുള്ള കരുത്തും ആത്മവിശ്വാസവും നൽകും. ആദർശത്തിന് വീഴ്ച വരാതെതന്നെ പ്രായോഗിക സമീപനം കൈക്കൊള്ളുവാൻ സാധിക്കുന്നതാണ്. സുഹൃത്തുക്കളുടെ കാര്യത്തിൽ കരുതൽ വേണ്ടതുണ്ട്. സാമ്പത്തിക സ്ഥിതി തൃപ്തികരമായിരിക്കും. എന്നാൽ ചെലവിൽ നല്ല നിയന്ത്രണം പുലർത്തണം. കുടുംബ ജീവിതത്തിൽ സാമാന്യം തൃപ്തിയുണ്ടാവും. മാസത്തിൻ്റെ പകുതിയിൽ (മീനം 15ന്/മാർച്ച് 29ന്) ശനി മീനം രാശിയിൽ പ്രവേശിക്കുന്നതോടുകൂടി ഏഴരശ്ശനിക്കാലം ആരംഭിക്കുകയാണ്.

ഭരണി

നക്ഷത്രനാഥനും ആദിത്യനും രാഹുവും ബുധനും പന്ത്രണ്ടിൽ സഞ്ചരിക്കുന്നതിനാൽ പലതരം സമ്മർദ്ദങ്ങളെ അഭിമുഖീകരിക്കേണ്ട സ്ഥിതിയുണ്ടാവും. തൊഴിലിൽ സഹപ്രവർത്തകരുമായി, മേലധികാരിയുമായി പിണങ്ങേണ്ടിവരും. വിജയം നേടുന്നതിന് ആവർത്തിത ശ്രമങ്ങൾ വേണ്ടതായിട്ടുണ്ട്. സാങ്കേതികമായി പോരായ്മ അനുഭവപ്പെടും. കർമ്മസംബന്ധമായ യാത്രകൾ കൂടിയേക്കും. ദുശ്ശീലങ്ങളുള്ളവർക്ക് ആ വകയിൽ ചെലവേറും. കൂട്ടുകെട്ടുകളുടെ കാര്യത്തിൽ പുനശ്ചിന്ത ഉണ്ടാവേണ്ട സന്ദർഭമാണ്. വ്യാഴം, ചൊവ്വ തുടങ്ങിയ ഗ്രഹങ്ങൾ സുസ്ഥിതിയിലാവുകയാൽ പ്രതിസന്ധികളെ സ്വയം പരിഹരിക്കാൻ കഴിഞ്ഞേക്കും. വിദ്യാർത്ഥികൾക്ക് ഏകാഗ്രത കുറയാം. ധനവരവ് മോശമാവില്ല. ചെലവിൽ ജാഗ്രത വേണം. ആരോഗ്യം പരിപാലിക്കുന്നതിൽ അലംഭാവമരുത്. മീനം പകുതി/മാർച്ച് അവസാനം മുതൽ ഏഴരശ്ശനിക്കാലം തുടങ്ങുന്നു എന്നതും പ്രസ്താവ്യമാണ്.

കാർത്തിക

മേടക്കൂറുകാർക്ക് മനക്ലേശവും ജോലിയിൽ പിരിമുറുക്കവും ഉണ്ടാവും. പ്രശ്നപരിഹാരം സുഗമമാവില്ല. ഏകാഗ്രതയോടെ പ്രവർത്തികൾ ചെയ്യാൻ വിഷമിച്ചേക്കും. ധനവരവ് മോശമാവില്ല. ധനം ഇല്ലാത്തതിനാൽ ഒരുകാര്യവും മുടങ്ങുകയുമില്ല. ധൂർത്തിന് മുതിരരുത്. രണ്ടിലെ വ്യാഴസ്ഥിതിയാൽ നല്ലവാക്കുകൾ പറയുവാൻ കഴിയും. സഹോദരർ സഹായിക്കുന്നതാണ്. ഇടവക്കൂറുകാർക്ക് ആദായം വർദ്ധിക്കുന്ന സാഹചര്യമുണ്ട്. ആത്മവിശ്വാസം പെരുകും. കർമ്മരംഗത്ത് നവീകരണം കൊണ്ടുവരാനുള്ള ശ്രമം വിജയിക്കും. പൈതൃകസ്വത്തുക്കൾ വിൽക്കാൻ കഴിയുന്നതാണ്. പിതാവിൽ നിന്നും സാമ്പത്തിക സഹായം ലഭിക്കാനും സാധ്യതകാണുന്നുണ്ട്. മത്സരങ്ങളിലും പരീക്ഷകളിലും മികച്ച വിജയം കരസ്ഥമാക്കും. സർക്കാർ സംബന്ധിച്ച് ലഭിക്കേണ്ട രേഖകൾ ലഭിക്കും.

രോഹിണി

പതിനൊന്നിൽ സൂര്യൻ, രാഹു, ബുധൻ, ശുക്രൻ എന്നീ ഗ്രഹങ്ങൾ സഞ്ചരിക്കുന്നതിനാൽ തൊഴിലിൽ ലാഭം ഭവിക്കും. കർമ്മതടസ്സങ്ങൾ അകലുന്നതാണ്. ശത്രുക്കളുടെ തന്ത്രങ്ങളെ സമർത്ഥമായി പ്രതിരോധിക്കുവാനാവും. സ്വന്തം കഴിവുകൾ തിരിച്ചറിയാൻ സന്ദർഭം വന്നെത്തും. നവസംരംഭങ്ങൾ തുടങ്ങാൻ അനുമതി ലഭിക്കുന്നതാണ്. സുഹൃൽബന്ധം ദൃഢമാകും. ഉപരിപഠനത്തെ സംബന്ധിച്ച് വ്യക്തതയുണ്ടാവും. തൊഴിൽ തേടുന്നവർക്ക് ഏറ്റവും ഹിതകരമായ ജോലി ലഭിച്ചേക്കും. പഴയ കടബാധ്യതകൾ തീർക്കാൻ വഴിതെളിയുന്നതാണ്. കുടുംബാംഗങ്ങളുടെ സ്നേഹം നിർലോഭം ലഭിക്കും. അവിവാഹിതർക്ക് ദാമ്പത്യസാഫല്യത്തിന് സാധ്യതയുണ്ട്. ഗൃഹനിർമ്മാണം തുടരാനാവും. മാസപ്പകുതിയിൽ കണ്ടകശ്ശനി തീരുന്നു. തൊഴിൽപരമായി കൂടുതൽ വളരാനും ധനോന്നതി കൈവരിക്കാനും സാഹചര്യം രൂപപ്പെടുകയാണ്.

മകയിരം

ഇടവക്കൂറുകാർക്ക് മീനമാസത്തിൽ ആഗ്രഹസാഫല്യം അനായാസമാവും. മത്സരങ്ങളിൽ വിജയിക്കുന്നതാണ്. സർക്കാരിൽ നിന്നും ആനുകൂല്യം കൈവരും. ബാങ്ക് വായ്പ ലഭിക്കാം., ചിട്ടി, നറുക്കെടുപ്പുകൾ എന്നിവ ധനാഗമമുണ്ടാക്കും. മാർക്കറ്റിംഗ് മേഖലയിലുള്ളവർക്ക് നിർദ്ദിഷ്ട ലക്ഷ്യം കൈവരിക്കുവാൻ സാധിക്കുന്നതാണ്. ചെറിയ കരുനീക്കങ്ങൾ വലിയ വിജയത്തിന് കാരണമാകാം. മാസത്തിൻ്റെ പകുതിയിൽ രണ്ടുവർഷത്തിലേറെ തുടർന്ന കണ്ടകശനി അവസാനിക്കുന്നു എന്നതും ഗുണകരമായ സത്യമാണ്. മിഥുനക്കൂറുകാർക്ക് സമ്മിശ്രഫലങ്ങളാവും. തൊഴിലന്വേഷണം വിജയിക്കും. കഴിവിനനുസരിച്ചുള്ള ഉദ്യോഗം ലഭിക്കാം. പരീക്ഷകളിൽ ശോഭിക്കാൻ കഴിയുന്നതാണ്. കുടുംബ ബന്ധങ്ങളിൽ തൃപ്തി കുറയാം. ബന്ധുക്കളുടെ തർക്കത്തിൽ ഇടപെടുന്നത് സൂക്ഷിച്ചാവണം.

തിരുവാതിര

ആദിത്യനും ബുധനും ഗുണകാരികളാകയാൽ തൊഴിലിൽ മെച്ചം പ്രതീക്ഷിക്കാം. പ്രൊമോഷനോ, അധികാരമുള്ള ചുമതലകളോ കിട്ടാം. സഹപ്രവർത്തകരെ ഏകോപിപ്പിക്കുന്നതിൽ വിജയിക്കുന്നതാണ്. ബുദ്ധിപൂർവ്വമായ നീക്കങ്ങൾ നടത്തും. വിദ്യാഭ്യാസത്തിൽ പുരോഗതിയുണ്ടാവും. ബന്ധുക്കളുടെ പിന്തുണ വന്നെത്തും. ശുക്രൻ അനുകൂലസ്ഥിതിയിൽ അല്ലാത്തതിനാൽ പ്രണയം ബാധിക്കപ്പെടും. പിണക്കം സ്ഥായിയായേക്കാം. വസ്തുപണയപ്പെടുത്തി ധനം നേടാനുള്ള ശ്രമം പിന്നീട് ദോഷകരമാവും. ഉത്സവാദികളിൽ സക്രിയമായ സാന്നിദ്ധ്യം പുലർത്തും. വിദേശത്ത് പഠന/തൊഴിൽ സാധ്യത തെളിഞ്ഞേക്കും. ശനിയും കൂടി പത്താം ഭാവത്തിൽ വരുന്നത് ആലസ്യം സൃഷ്ടിക്കാനിടയുണ്ട്. രാഹു-ശനി യോഗം വ്യക്തിത്വത്തെ ദുർബലപ്പെടുത്തും. ജന്മരാശിയിൽ ചൊവ്വ തുടരുന്നത് ക്ഷോഭവാസനകൾക്ക് കാരണമാകുന്നതാണ്.

പുണർതം

സ്വാശ്രയ വ്യാപാരത്തിൽ പുരോഗതിയുണ്ടാവും. തടസ്സങ്ങളുടെ കാരണം കണ്ടെത്തി പരിഹരിക്കാൻ കഴിയുന്നതാണ്. വലിയ മുതൽമുടക്കുകൾക്ക് അനുകൂല സമയമല്ലെന്ന് ഓർമ്മയുണ്ടാവണം. കമ്മീഷൻ വ്യാപാരം, ഏജൻസികൾ എന്നിവ ഗുണപ്രദമായിരിക്കും. ജോലി തേടുന്നവർക്ക് താത്കാലികമായ തൊഴിൽ കിട്ടിയേക്കാം. പ്രധാനപ്പെട്ട രേഖകൾ പുതുക്കേണ്ട കാര്യത്തിൽ മറവി വരാതിരിക്കാൻ കരുതലെടുക്കണം. വ്യായാമം, ദിനചര്യ എന്നിവയ്ക്ക് നേരനീക്കം വരില്ല. മകളുടെ വിവാഹം നിശ്ചയിക്കപ്പെടാം. സാമ്പത്തിക കാര്യത്തിൽ ചില ഉത്കണ്ഠകൾ വരാനിടയുണ്ട്. വസ്തുവ്യാപാരത്തിൽ മാസാന്ത്യം വരെ പലതരം തടസ്സങ്ങൾ വന്നേക്കും. വയോധികരായിട്ടുള്ള ബന്ധുക്കളെ സന്ദർശിക്കുന്നതാണ്. രാഷ്ട്രീയത്തോട് വിരക്തിയുണ്ടാവും. എന്നാൽ ജീവകാരുണ്യം ശ്രദ്ധാപൂർവ്വം നിർവഹിക്കും.

പൂയം

ആദിത്യൻ അഷ്ടമത്തിൽ നിന്നും മാറുന്നത് ആശ്വാസമാണ്. തൊഴിൽ രംഗത്തെ സമ്മർദ്ദങ്ങൾക്ക് അയവുണ്ടാകും. സ്വകാര്യ സ്ഥാപനത്തിൽ ജോലി ചെയ്യുന്നവർക്ക് ഉചിതമായ ഷിഫ്റ്റിലേക്ക് മാറാനാവും. പിതാവിൻ്റെ ആരോഗ്യസ്ഥിതി മെച്ചപ്പെടുന്നതാണ്. പല വർഷങ്ങളായി തുടരുന്ന വായ്പയുടെ തിരിച്ചടവ് പൂർത്തിയാകും. കലാകാരന്മാർക്ക് കൂടുതൽ അവസരം ലഭിക്കുന്നതാണ്. കുടുംബ ക്ഷേത്രത്തിൻ്റെ ജീർണ്ണോദ്ധാരണം പൂർത്തിയാവുന്നത് മാനസിക ആശ്വാസത്തിന് കാരണമാകും. വസ്തുകച്ചവടം ലാഭകരമാവില്ല. അതിനാൽ അല്പം കൂടി കാത്തിരിക്കുക. ഗവേഷണത്തിൽ മുന്നോട്ടു പോകാനാവും. കരാർ പണികൾ നീട്ടിക്കിട്ടാം. നീണ്ടപ്രണയം വിവാഹത്തിലൂടെ സഫലമായേക്കും. മാസം പകുതിയോടുകൂടി അഷ്ടമശനി അവസാനിക്കുന്നത് കുറച്ച് ആശ്വാസം സൃഷ്ടിക്കാം.

ആയില്യം

വരുമാനമാർഗം ഇല്ലാത്തവർക്ക് താത്കാലികമായിട്ടുള്ള ജോലിയെങ്കിലും തരപ്പെടുന്നതാണ്. വ്യാപാരത്തിൽ വലിയ തോതിൽ വിപുലീകരണം നടത്തുന്നത് ഇപ്പോൾ ഗുണകരമായേക്കില്ല. റിയൽ എസ്റ്റേറ്റുകാർക്ക് ക്രയവിക്രയത്തിൽ ലാഭം കുറയുന്നതായിരിക്കും. സ്വകാര്യ സ്ഥാപനത്തിലെ ഉദ്യോഗസ്ഥർക്ക് വേതനത്തിൽ വർദ്ധനയുണ്ടാവും. ഗൃഹനിർമ്മാണം തുടരാനാവും. എന്നാൽ ഇടക്കിടെധനക്ലേശം മൂലം നിർത്തേണ്ടി വന്നേക്കും. അന്യദേശത്ത് പഠനത്തിന് പോകുന്ന കാര്യം സജീവമായ പരിഗണനയിൽ വരുന്നതായിരിക്കും. കുടുംബ പ്രശ്നങ്ങൾ വയോജനങ്ങളുടെ മധ്യസ്ഥതയിൽ ഒത്തുതീരാൻ സാധ്യതയുണ്ട്. സാഹിത്യ-കലാരംഗം പുഷ്ടിപ്പെടുന്നതാണ്. തർക്കങ്ങൾ വ്യവഹാരങ്ങളായി മാറാനിടയുണ്ട്. അതിനാൽ സംഭാഷണത്തിൽ മിതത്വം പുലർത്തണം.

മകം

അഷ്ടമരാശിയായ മീനത്തിൽ ആദിത്യൻ സഞ്ചരിക്കുകയാണ്. അഷ്ടമത്തിൽ തുടരുന്ന ബുധശുക്രന്മാർ ഭൗതികമായ നേട്ടങ്ങൾ സമ്മാനിക്കുന്നുണ്ട്. ഭോഗസുഖം, സൗഹൃദം മൂലം സന്തോഷം, ആഢംബര വസ്തുലബ്ധി എന്നിവ അനുഭവിക്കുന്നു. അതിനൊപ്പം ബൗദ്ധികമായി ഉണർന്ന് പ്രവർത്തിക്കാനും സാധിക്കുന്നുണ്ട്. പഠനത്തിൽ / പരീക്ഷയിൽ ഏകാഗ്രതയുണ്ടാവും. അഷ്ടമത്തിലെ രവി – രാഹു യോഗം രന്ധ്രാന്വേഷികളായ ശത്രുക്കൾക്ക് ഗുണകരമാണ്. അതിനാൽ വാക്കിലും പ്രവൃത്തിയിലും ജാഗ്രത കൈക്കൊള്ളണം. രോഗാരിഷ്ടകൾക്ക് വേഗം ചികിൽസ തേടേണ്ടതുണ്ട്. ഭൂമി വ്യാപാരത്തിൽ ലാഭം വന്നെത്തും. വ്യവഹാരങ്ങളിൽ അനുകൂലമായ തീർപ്പുണ്ടാവാം. നവസംരംഭങ്ങൾ തുടങ്ങുന്നതിന് ഗ്രഹാനുകൂല്യം ഇല്ലെന്നത് മറക്കരുത്. മീനം 15 ന് ശനി ഏഴിൽ നിന്നും എട്ടിലേക്ക് മാറുന്നു. അതോടെ അഷ്ടമശ്ശനിക്കാലം തുടങ്ങുക കൂടിയാണ്.

പൂരം

പൂരം നാളിൻ്റെ വേധനക്ഷത്രമായ ഉത്രട്ടാതിയിൽ ത്രിഗ്രഹങ്ങളുണ്ട്. സൂര്യനും പിന്നീട് പ്രവേശിക്കും. അതിനാൽ അജ്ഞാതമോ അകാരണമോ ആയ തടസ്സങ്ങളുണ്ടാവും. ശത്രുക്കളെ തിരിച്ചറിയാൻ കഴിയില്ല. പ്രവർത്തനത്തിൽ മന്ദഗതി വന്നേക്കും. സാഹസികത ഒഴിവാക്കേണ്ടതുണ്ട്. സാമ്പത്തികമായി ഗുണകരമായ കാലമല്ല. വരവും ചെലവും അസന്തുലിതമാവും. ബന്ധങ്ങളുടെ ദാർഢ്യം നിലനിർത്താൻ ക്ലേശിക്കുന്നതാണ്. സുഹൃത്തുക്കളുടെ വാഗ്ദാനം പ്രാവർത്തികമാവുക വൈകിയായിരിക്കും. ഗവേഷകർക്കും ശാസ്ത്രജ്ഞർക്കും ആശയക്കുഴപ്പം ഉണ്ടാവാം. വ്യക്തമായ നിഗമനങ്ങളിലെത്താൻ പരീക്ഷണങ്ങൾ തുടരേണ്ടിവരും. ഭൂമിയിൽ നിന്നും ആദായം, സഹോദരാനുകൂല്യം, വ്യവഹാരത്തിൽ വിജയം ഇവ പ്രധാന ഗുണഫലങ്ങൾ ആയിരിക്കും. മീനം പകുതിയിൽ കണ്ടകശനി തീർന്ന് അഷ്ടമശനി ആരംഭിക്കുന്നു.

ഉത്രം

ചിങ്ങക്കൂറുകാർക്ക് ഏഴിൽ നിന്നും എട്ടിലേക്കും കന്നിക്കൂറുകാർക്ക് ആറിൽ നിന്നും ഏഴിലേക്കും ആദിത്യൻ സഞ്ചരിക്കുന്നു. ഇപ്പോൾ ചെയ്തുവരുന്ന ജോലിയിൽ സമാധാനം കുറയാം. പക്ഷേ ജോലി ഉപേക്ഷിച്ചുകൊണ്ട് പുതുജോലി തേടാൻ ഇത് ഉചിതകാലമല്ല. കൂട്ടുബിസിനസ്സുകളിലെ താത്പര്യം കൂടുകയും കുറയുകയും ചെയ്യും. കടബാധ്യതകളിൽ ചെറിയ ആശ്വാസം വന്നുചേരുന്നതാണ്. പ്രണയബന്ധം നിലനിർത്താൻ ക്ലേശിച്ചേക്കും. ഭൂമി, വീട് എന്നിവ പണയപ്പെടുത്തി ധനം സമാഹരിക്കാൻ സാധ്യതയുണ്ട്. വിവാഹം അന്വേഷിക്കുന്നവർക്ക് കാര്യസാധ്യം ഭവിക്കാം. പൊതുപ്രവർത്തകർക്ക് എതിർപ്പുകൾ പരിഹരിക്കാൻ വിയർപ്പൊഴുക്കേണ്ടി വരുന്നതാണ്. കരാർ പണികൾ തുടർച്ചയായി ലഭിക്കാനിടയുണ്ട്. കുടുംബത്തിൻ്റെ താല്പര്യപ്രകാരം അവധിക്കാല ദൂരയാത്രകൾ ആസൂത്രണം ചെയ്യും.

അത്തം

ഗ്രഹങ്ങളുടെ ഏഴാം ഭാവത്തിലേക്കുള്ള രാശിസംക്രമണം ജീവിതത്തെ ഗുണപരമായും ദോഷകരമായും ബാധിക്കുന്ന കാലമാണ്. തൊഴിൽ രംഗത്ത് ആയാസമനുഭവിക്കും. മേലധികാരികൾ അനുകൂല നിലപാടുകൾ കൈക്കൊള്ളാത്തത് സമ്മർദങ്ങൾക്ക് കാരണമാകുന്നതാണ്. വലിയ തോതിൽ പണം മുടക്കുന്നത് ഇപ്പോൾ അഭിലഷണീയമല്ല. എന്നാൽ ബിസിനസ്സിൽ നിന്നും തരക്കേടില്ലാത്ത വരുമാനം പ്രതീക്ഷിക്കാം. ബന്ധുക്കളുടെ സഹായം സ്വീകരിക്കും. തന്മൂലം നിലവിലെ കടബാധ്യതകൾ ഭാഗികമായി വീട്ടുവാൻ കഴിഞ്ഞേക്കും. ദാമ്പത്യത്തിൽ പിണക്കങ്ങൾ കൂടാനിടയുണ്ട്. പരസ്പരം കുറ്റം കണ്ടെത്തുന്ന ശീലം വല്ലാതെ വർദ്ധിക്കും. സുഹൃൽസമാഗമങ്ങൾ സന്തോഷം നൽകുന്നതാണ്. സാങ്കേതിക കാര്യങ്ങൾ പഠിച്ചറിയാൻ സമയം ചെലവഴിക്കും.

ചിത്തിര

കന്നിക്കൂറുകാർക്ക് തൊഴിൽപരമായിട്ടുള്ള സമ്മർദ്ദം ഉയരാം. ആലസ്യം അനുഭവപ്പെടുന്നതാണ്. അകാരണമായി ലീവെടുക്കാൻ തോന്നും. ഏറ്റെടുത്ത ദൗത്യങ്ങൾ പൂർത്തീകരിക്കാൻ കൂടുതൽ സമയം വേണ്ടിവരുന്നതാണ്. ആരോഗ്യപ്രശ്നങ്ങൾക്ക് വൈദ്യസഹായം ആവശ്യമാവാം. പണമെടപാടുകൾ കൃത്യതയോടെ നടത്താൻ ക്ലേശിക്കുന്നതാണ്. കൂട്ടുബിസിനസ്സിൽ ലാഭം നാമമാത്രമാകും. എങ്കിലും വ്യാഴാനുകൂല്യത്താൽ പ്രധാനപ്പെട്ട കാര്യങ്ങൾ മുടങ്ങുകയില്ല. തുലാക്കൂറുകാരായ ചിത്തിര നാളുകാർക്ക് തൊഴിലടത്ത് സമാശ്വാസം ഭവിക്കും. വരുമാനമാർഗത്തിൽ തടസ്സങ്ങളുണ്ടാവില്ല. ശത്രുക്കൾ പൊതുലക്ഷ്യത്തിനായി സഹകരിക്കുന്നതാണ്. കുടുംബ ജീവിതത്തിൽ നിലവിലെ പ്രശ്നങ്ങൾ സ്വയം പിൻവലിയും. തടസ്സപ്പെട്ട ഗൃഹനിർമ്മാണം പുനരാരംഭിക്കാനാവും. നഷ്ടപ്പെട്ടെന്ന് കരുതിയവ തിരികെക്കിട്ടാം.

ചോതി

ആദിത്യൻ അനുകൂലമായിട്ടുള്ള ആറാം ഭാവത്തിലേക്ക് സംക്രമിക്കുകയാൽ ആരോഗ്യപുഷ്ടി ഭവിക്കുന്നതാണ്. കാര്യസാധ്യം സുഗമമാവും. സർക്കാർ സംബന്ധിച്ച വിഷയങ്ങൾ ഭംഗിയായി നടന്നു കിട്ടുന്നതാണ്. സംഘടനകളിൽ നേതൃപദവി ലഭിക്കാം. ബിസിനസ്സിൽ നവീനമായ പരീക്ഷണങ്ങൾ വിജയിച്ചേക്കും. സാമൂഹികമായ അംഗീകാരം തേടിവരുന്നതാണ്. പ്രണയത്തിലെ കയ്പുരസം മറക്കാനാവും. സൗഹൃദം പുഷ്ടിപ്പെടും. ബന്ധുക്കളിൽ നിന്നും നിർലോഭമായ സഹായസഹകരണം പ്രതീക്ഷിക്കാം. തൊഴിൽ തേടുന്നവർക്ക് ആശ്വസിക്കാനാവും. അഷ്ടമത്തിലെ വ്യാഴം ചെറിയ നിർഭാഗ്യങ്ങളും ധനക്ലേശങ്ങളും വരുത്താനിടയുണ്ട്. ഒമ്പതിലെ ചൊവ്വ ഭാഗ്യഭ്രംശത്തിനും പിതാവിന് സ്വൈരക്കേടിനും കാരണമാകാം. ശനിയുടെ രാശിമാറ്റം ഫലം കിട്ടാൻ വൈകുമെങ്കിലും ശുഭദായകമാണ്.

വിശാഖം

തുലാക്കൂറിലെ വിശാഖം നാളുകാർക്ക് പലതരം നേട്ടങ്ങൾ വന്നെത്തും. അധ്വാനത്തിന് അർഹിക്കുന്ന ഫലം ഉണ്ടാവുന്നതാണ്. സ്വകാര്യസ്ഥാപനത്തിൽ ജോലിലഭിക്കാൻ സാധ്യതയുണ്ട്. വിദേശത്തു കഴിയുന്ന വേണ്ടപ്പെട്ടവരുടെ ധനസഹായം ലഭിക്കാം. സഹപ്രവർത്തകർ കൈയൊഴിഞ്ഞ ക്ലിഷ്ടങ്ങളായ ദൗത്യങ്ങൾ ഏറ്റെടുത്ത് നിർവഹണത്തിലെത്തിക്കുവാനുമാവും. വൃശ്ചികക്കൂറിലെ വിശാഖം നാളുകാർക്ക് നിലവിലെ സ്ഥിതി മാറ്റമില്ലാതെ തുടരപ്പെടാം. മനസ്സിനെ ആലസ്യം ബാധിക്കുന്നതാണ്. പുതുസംരംഭങ്ങൾ തുടങ്ങാൻ ആശിക്കും. എന്നാൽ പലതരം നൂലാമാലകൾ വിഷമിപ്പിക്കുന്നതാണ്. ന്യായമായ ചെലവുകൾക്ക് ധനം വന്നെത്തും. കുടുംബത്തോടൊപ്പം കഴിയാൻ വേണ്ടുവോളം സമയം ലഭിക്കുന്നതാണ്. മകൻ്റെ പ്രണയകാര്യത്തിൽ തീരുമാനം കൈക്കൊള്ളാൻ വിഷമിച്ചേക്കും.

അനിഴം

നിലവിലെ സാഹചര്യങ്ങളിൽ നിന്നും വലിയമാറ്റം പ്രതീക്ഷിക്കാനാവില്ല. അഞ്ചാം ഭാവത്തിൽ നാലുഗ്രഹങ്ങൾ സഞ്ചരിക്കുന്നത് കർമ്മമേഖലയിൽ ആശയക്കുഴപ്പം സൃഷ്ടിക്കുന്നതാണ്. ഭാവികാര്യങ്ങളിൽ അവ്യക്തത തുടരുന്നതാണ്. ശാഠ്യബുദ്ധി മൂലം അവസരങ്ങൾ നഷ്ടമാകാനിടയുണ്ട്. മക്കളുടെ പഠനകാര്യത്തിൽ അവ്യക്തത ഉടലെടുക്കാം. ഏഴാം ഭാവത്തിൽ തുടരുന്ന വ്യാഴം വിദേശയാത്ര സാധിപ്പിച്ചേക്കും. കൂട്ടുകച്ചവടത്തിൽ നേട്ടങ്ങൾ ആവർത്തിക്കുന്നതാണ്. സാഹിത്യകാരന്മാർ ഭാവനാത്മകതയോടെ സർഗവ്യാപാരത്തിൽ മുഴുകും. പ്രണയത്തിൽ പാരസ്പര്യം ശക്തമാകുന്നതാണ്. അയൽ തർക്കങ്ങൾ ആവർത്തിക്കാം. പാരമ്പര്യ തൊഴിലുകളിൽ അനിഷ്ടം ഉടലെടുക്കുന്നതായിരിക്കും. രാഷ്ട്രീയ നിലപാടുകൾ അവസരവാദമായി വിമർശിക്കപ്പെടും.

തൃക്കേട്ട

സൂര്യൻ നാലാം ഭാവത്തിൽ നിന്നും അഞ്ചിലേക്ക് സംക്രമിക്കുകയാണ്. വീടും വീട്ടുകാരും സുഹൃത്തുക്കളും മറ്റും നാലാമെടത്തിൻ്റെ പരിഗണനകളാണ്. ആ വിഷയങ്ങളിൽ ഏർപ്പെട്ടിരുന്ന സമ്മർദ്ദത്തിന് ഇതോടെ അയവുണ്ടാവും. അഞ്ചാമെടം ഭാവനയെയും വിവേകത്തെയും സൂചിപ്പിക്കുന്നു. അക്കാര്യങ്ങളിൽ കരുതലാവശ്യമാണ്. ശനികൂടി മാസം പകുതിയിൽ അഞ്ചാമെടത്തിലേക്ക് പ്രവേശിക്കുന്നതിനാൽ കണ്ടകശനി തീരുന്നു. വ്യക്തിപരമായി സുഗമതയും സ്വസ്ഥതയും ഉണ്ടാവും. അനാവശ്യമായിട്ടുള്ള സമ്മർദ്ദം നേരിടേണ്ടി വന്നേക്കില്ല. ബിസനസ്സിൽ മെച്ചം പ്രതീക്ഷിക്കാം. വ്യാഴാനുകൂല്യം പൊതുവേയുള്ളത് സൗഭാഗ്യത്തിന് കാരണമാകുന്നതാണ്. അഷ്ടമത്തിലെ ചൊവ്വ മൂന്നാം ആഴ്ചയ്ക്കുശേഷം രാശിമാറുന്നതും ഗുണകരമാകും. സ്വാതന്ത്ര്യം അനുഭവപ്പെടുന്നതാണ്.

മൂലം

ഗുണദോഷഫലങ്ങൾ ഉണ്ടാവും. പദവികളിൽ ഇരിക്കുന്നവർ സ്വയം ദുർബലരാവുന്നതായി തോന്നിയേക്കും. അധികാരം പങ്കിടാൻ വേറെയും അവകാശികളുണ്ടാവുന്നതാണ്. ഗൃഹൈക്യം ഒരു സ്വപ്നമാവും. മക്കളുടെ നിർബന്ധശീലം വിഷമിപ്പിക്കുന്നതാണ്. ബന്ധുക്കൾ പിണക്കം മറന്ന് വീണ്ടും സഹകരിക്കുന്നത് ആശ്വാസമാവും. സ്ത്രീകളുടെ സഹായ സഹകരണങ്ങൾ ലഭിക്കുന്നതാണ്. പ്രണയത്തകർച്ചയിൽ നിന്നും കരകയറാനാവും. ആഢംബര വസ്തുക്കൾ പാരിതോഷികമായി ലഭിച്ചേക്കാം. ഗവേഷണം, ഉപരിപഠനം ഇവ തുടരാനാവുന്നതാണ്. മീനം 15 ന് ശേഷം കണ്ടകശനി ആരംഭിക്കുന്നു. കഴിവതും അറിയാത്ത കാര്യങ്ങൾ ചെയ്യാനൊരുമ്പെടരുത്. വ്യായാമവും ആഹാരനിയന്ത്രണവും ജീവിതത്തിൻ്റെ ഭാഗമാക്കണം. ജീവിതശൈലീ രോഗങ്ങൾ ഉള്ളവർ ചികിൽസ മുടക്കരുത്.

പൂരാടം

മൂന്നാം ഭാവത്തിൽ നിന്നും ആദിത്യൻ നാലിൽ പ്രവേശിക്കുന്നതോടെ ആ ഭാവത്തിൽ ഇരുപാപഗ്രഹങ്ങളും ഇരുശുഭഗ്രഹങ്ങളും സഞ്ചരിക്കുന്ന സ്ഥിതിവരുന്നു. പകുതി ഗുണം, പകുതി ദോഷം എന്ന നിലയാവും. സ്വതസിദ്ധമായ കഴിവുകൾ മുഴുവൻ പുറത്തെടുക്കാൻ സാധിച്ചേക്കില്ല. ശത്രുക്കളെ പ്രതിരോധിക്കുവാനും ലക്ഷ്യത്തിലേക്ക് നീങ്ങാനുമാവും. വാഗ്ദാനങ്ങൾ പാലിക്കാൻ വിഷമിക്കുന്നതാണ്. കൈവായ്പകൾ പ്രയോജനപ്പെടുത്തി അത്യാവശ്യങ്ങൾ നിറവേറ്റാനാകും. പുതിയ വാഹനം വാങ്ങാൻ സാധ്യത കാണുന്നു. ബാല്യകാല സുഹൃത്തുക്കളുമായി നല്ല ഓർമ്മകളിൽ മുഴുകുന്നതാണ്. ആരോഗ്യപ്രശ്നങ്ങൾ കുറയുമെങ്കിലും പതിവ് പരിശോധനകൾ കുറയ്ക്കരുത്. മാസത്തിൻ്റെ പകുതിയിൽ ശനി നാലാം ഭാവത്തിലേക്ക് സംക്രമിക്കുന്നതോടെ കണ്ടകശനി ആരംഭിക്കുകയായി.

ഉത്രാടം

മകരക്കൂറിലെ ഉത്രാടത്തിന് ഗുണഫലങ്ങൾ അധികരിക്കുന്നതാണ്. തൊഴിൽ രംഗത്ത് സമ്മർദ്ദം അകലും. സ്വാതന്ത്ര്യത്തോടെ പ്രവർത്തിക്കാനാവും. ബന്ധങ്ങളുടെ മുറിഞ്ഞ ചങ്ങലക്കണ്ണികൾ വീണ്ടും വിളക്കിച്ചേർക്കും. സാമ്പത്തികമായും മറ്റും സഹായങ്ങൾ വന്നെത്തും. ബിസിനസ്സ് രംഗം അരിഷ്ടകളും തടസ്സങ്ങളുമില്ലാതെ മുന്നോട്ടുപോയി തുടങ്ങും. മീനം പകുതിക്കുമേൽ ഏഴരശ്ശനിക്കാലം തീരുന്നുവെന്ന ശുഭവാർത്തയുമുണ്ട്. ധനുക്കൂറിൽ വരുന്ന ഉത്രാടം നാളുകാർക്ക് സന്തോഷാനുഭവങ്ങളും ഒപ്പം സങ്കടങ്ങളും കൂടി വന്നുചേരും. സുഹൃത്തുക്കളോട് പിണങ്ങാനിടയുണ്ട്. എന്നാൽ സുഹൃത്തുക്കളുടെ / ബന്ധുക്കളുടെ ഭൗതികമായ പിന്തുണയും ലഭിക്കും. പ്രതീക്ഷിച്ച സ്ഥാനമാനങ്ങൾ കിട്ടിയേക്കില്ല. നാലാം ഭാവത്തിലേക്ക് ശനി വരുന്നതിനാൽ രണ്ടുവർഷത്തിലധികം നീളുന്ന കണ്ടകശനിക്കാലം തുടങ്ങുകയുമാണ്.

തിരുവോണം

ഗുണാനുഭവങ്ങൾക്ക് മുൻതൂക്കം ലഭിക്കുന്ന കാലഘട്ടമാണ്. സമ്മർദ്ദങ്ങൾക്ക് നല്ല അയവുണ്ടാവും. സ്വശക്തി ഫലപ്രദമായി ഉപയോഗിക്കുന്നതിന് അവസരമുണ്ടാവും. ഔദ്യോഗിക രംഗത്ത് ആധിപത്യം കൈവരിക്കുന്നതാണ്. മേലധികാരികൾ വിദഗ്ദ്ധാഭിപ്രായം ചോദിക്കുന്നതിനിടയുണ്ട്. വരുമാന മാർഗം വിപുലീകരിക്കാനുള്ള ശ്രമം ഫലവത്താകും. രാഷ്ട്രീയ പ്രവർത്തകരുടെ സ്വാധീനശക്തി വളരും. പിന്തുണ പലകോണുകളിൽ നിന്നും വന്നെത്തും. ഉപരിവിദ്യാഭ്യാസത്തിലെ അവ്യക്തതയ്ക്ക് പരിഹാരം കിട്ടും. മാതാപിതാക്കൾക്കും ക്ഷേമകാലമാവും. മകൻ്റെ വിവാഹകാര്യം ശുഭതീരുമാനത്തിൽ എത്തിച്ചേർന്നേക്കും. ഭൂമി വില്പനയിലെ തടസ്സം നീങ്ങുന്നതാണ്. നിക്ഷേപങ്ങൾ കൂടുതൽ പലിശ ലഭിക്കും വിധം പുതുക്കിവെക്കാനാ വും. രോഗക്ലേശിതർക്ക് പുതിയ ചികിൽസ ഫലവത്താകും.

അവിട്ടം

മകരക്കൂറുകാർ കൂടുതൽ ഗുണഫലങ്ങൾ അനുഭവിക്കും. ഏഴരശ്ശനി തീരുന്ന സന്ദർഭമാണ്. സഹായസ്ഥാനത്ത് ധാരാളം ഗ്രഹങ്ങളുള്ളതിനാൽ പലതരം പിന്തുണകൾ ആവശ്യപ്പെടാതെ തേടിവന്നേക്കും. ആത്മവിശ്വാസത്തോടെ കർമ്മമേഖലയിൽ മുഴുകാനാവും. തൊഴിലില്ലാത്തവർക്ക് ചെറിയ വരുമാനമെങ്കിലും വന്നെത്തും. വ്യവഹാരങ്ങൾ ഉഭയസമ്മത പ്രകാരം അവസാനിപ്പിക്കും. മീനം 20 നു ശേഷം നക്ഷത്രാധിപനായ ചൊവ്വ നീചക്ഷേത്രത്തിൽ പ്രവേശിക്കുന്നത് കാര്യതടസ്സം ഉണ്ടാക്കും. ദാമ്പത്യ പ്രശ്നങ്ങൾ അലട്ടാനിടയുണ്ട്. കുംഭക്കൂറുകാർക്ക് ഏഴരശ്ശനിക്കാലം തുടരുകയാണ്. പ്രധാന തീരുമാനങ്ങൾ തിടക്കപ്പെട്ട് കൈക്കൊള്ളരുത്. അധികാരികളോട് തർക്കിക്കുന്നത് ഗുണം ചെയ്തേക്കില്ല. പ്രണയം നിലനിർത്താൻ ക്ലേശിക്കുന്നതാണ്.

ചതയം

ജന്മരാശിയിൽ നിന്നും ആദ്യം ആദിത്യനും ക്രമേണ ശനിയും മാറുന്നു. ജന്മശനിക്കാലം അവസാനിക്കുന്നത് പലനിലയ്ക്കും ആശ്വാസകരമാണ്. മീനമാസത്തിൽ വാക്ശുദ്ധി കുറയാം. വാക്കുകൾക്ക് ഉച്ചാരണമോ സ്പെല്ലിംഗോ തെറ്റിയേക്കും. വാഗ്ദാനങ്ങൾ ലംഘിക്കാനും ഇടയുണ്ട്. അലച്ചിൽ കുറയുന്നത് ആശ്വാസമാണ്. ജോലിസ്ഥലത്തെ ഷിഫ്റ്റ് ഉറക്കത്തെ ബാധിക്കാത്ത വിധത്തിലാവും. ചെയ്യുന്ന ജോലിയിൽ മൊബൈൽ / കമ്പ്യൂട്ടർ തുടങ്ങിയ യന്ത്രങ്ങളെ കൂടുതൽ ആശ്രയിക്കും. ദുശ്ശീലങ്ങളുള്ളവർക്ക് നിയന്ത്രണം കുറയാം. കൂട്ടുകെട്ടുകളെച്ചൊല്ലി ഗാർഹികമായിട്ടുള്ള അലോസരങ്ങൾക്ക് സാധ്യതയുണ്ട്. ചെറുപ്പക്കാർക്ക് ജോലി കിട്ടുമെങ്കിലും അതിൽ പൂർണതൃപ്തി വന്നേക്കില്ല. പ്രണയികൾക്കിടയിൽ പിണക്കം തിരനോട്ടം നടത്താം.

പൂരൂരുട്ടാതി

കുംഭക്കൂറുകാരായ പൂരൂരുട്ടാതിക്കാർക്ക് ആശ്വാസത്തിൻ്റെ കാലഘട്ടം ആരംഭിക്കുകയാണ്. മീനം 15 ന് ശനി കുംഭം രാശിയിൽ നിന്നും മാറുന്നതോടെ ജന്മശനിക്കാലം അവസാനിക്കുന്നു. തടസ്സപ്പെട്ടിരുന്ന പലതും പുനരാരംഭിക്കും. വീടുപണി തുടരാനുള്ള ധനം കൈവശമെത്തും. കടക്കെണിയിൽ പെട്ട് ശ്വാസം മുട്ടിയവർക്ക് പിടിവള്ളി കിട്ടിയേക്കും. അന്യനാട്ടിൽ കുടുങ്ങിയവർക്ക് നാട്ടിലെത്താൻ വഴിതെളിയുന്നതാണ്. രോഗബാധിതർക്ക് ചികിൽസാ മാറ്റം ആശ്വാസമേകും. പൂരൂരുട്ടാതി നാലാംപാദത്തിൽ അഥവാ മീനക്കൂറിൽ ജനിച്ചവർക്ക് ജന്മത്തിൽ ആദിത്യനും രാഹുവും ശനിയും മാറി മാറി സഞ്ചരിക്കുന്ന കാലമാണ്. പ്രവാസം ഒരു സാധ്യതയാണെന്ന് ഓർമ്മിക്കണം. ഒന്നിനു പിറകെ ഒന്നായി ചെലവുകൾ കൂടി പണക്ലേശം ഉണ്ടാവാം. അതിനാൽ സാഹസങ്ങൾ ഒഴിവാക്കാനും മിതവ്യയം പാലിക്കാനും ആരോഗ്യത്തിൽ ശ്രദ്ധിക്കാനും വാക്കും കർമ്മവും പൊരുത്തപ്പെടാനും കരുതൽ വേണം.

ഉത്രട്ടാതി

ജന്മരാശിയിലും ജന്മനക്ഷത്രത്തിലുമായി നാലിലധികം ഗ്രഹങ്ങൾ സഞ്ചരിക്കുകയാണ്. മീനം 16 മുതൽ ജന്മശനിയും തുടങ്ങുന്നു. രാഹു, ജന്മനക്ഷത്രത്തിൽ നിന്നും മാസാദ്യം മാറുന്നു എന്നത് ആശ്വാസമാണ്. ജീവിതത്തിലെ സങ്കീർണ്ണമായ ഒരു കാലഘട്ടത്തിലൂടെയാണ് കടന്നുപോകുന്നത്. പ്രവാസം, ഒറ്റപ്പെടൽ, തെറ്റിദ്ധരിക്കപ്പെടൽ, മാനസിക പിരിമുറുക്കം ഇവ അനുഭവപ്പെടാം. രോഗക്ലേശങ്ങളുണ്ടാവാം. വലിയ മുതൽമുടക്കുകൾ ഈ മാസം ഒഴിവാക്കുകയാവും അഭികാമ്യം. നിലവിലെ ജോലി ഉപേക്ഷിച്ചാൽ പുതിയത് കിട്ടാൻ കാത്തിരിക്കേണ്ടി വന്നേക്കും. ദാമ്പത്യത്തിൽ വിട്ടുവീഴ്ചയുണ്ടാവണം. ആരോഗ്യ ജാഗ്രത അനിവാര്യം. കൂരിരുട്ടിലും വഴികാട്ടാൻ സ്ഫുടതാരകളുണ്ടെന്ന് കവി വാക്യം. അതിനാൽ സാന്ത്വനശക്തി തന്നെ കൈവരും. തലോടാനും പ്രകൃതിക്കറിയാമെന്ന് ആശ്വസിക്കാനാവും. സഹിഷ്ണുതയും വിവേകവുമാണ് പ്രധാനം. ഈ കാലവും കടന്നുപോകും.

രേവതി

കർമ്മരംഗത്ത് പലതരത്തിലുള്ള അവ്യക്തതയുണ്ടാവും. മുൻഗണന നിശ്ചയിക്കുന്നതിൽ കൃത്യത വരില്ല. ജന്മരാശിയിലെ ഗ്രഹപ്പെരുക്കം ശ്രദ്ധേയമാണ്. ഓഫീസിൽ ആരെങ്കിലും അധികാരത്തിൽ കൈകടത്തിയേക്കും. തർക്കങ്ങളിൽ പരാജയപ്പെടാം. ഔദ്യോഗികമായ അലച്ചിലുണ്ടാവും. കരുതിവെച്ച ധനം മറ്റേതെങ്കിലും കാര്യത്തിന് ഉപയോഗിക്കുന്നതാണ്. പ്രധാനകാര്യങ്ങൾ പുനരാലോചനകളിലൂടെ കൈക്കൊള്ളണം. അഭിമുഖങ്ങളിൽ ശോഭിക്കുന്നതാണ്. എന്നാൽ നിയമനം ലഭിക്കാൻ കാത്തിരിക്കേണ്ട സ്ഥിതിയുണ്ടാവും. ഭോഗാനുഭവങ്ങളും പാരിതോഷിക ലബ്ലിയും സാഹിത്യ-കലാ രംഗങ്ങളിൽ മുന്നേറ്റവും പ്രതീക്ഷിക്കാം. പൂർവ്വകാല സുഹൃത്തുക്കളെ കാണാനാവും. ഏഴരശ്ശനിയിലെ ജന്മശനി തുടങ്ങുന്ന മാസം കൂടിയാണ്.