ക്രിസ്മസ് മുന്നില്‍ കണ്ട് ഡിസംബര്‍ 21 ന് റിലീസ് ആയ ചിത്രമാണ് ‘നേര്’. മോഹന്‍ലാല്‍ നായകനായി വരുന്ന ചിത്രം ജിത്തു ജോസഫ് ആണ് സംവിധാനം ചെയ്തിരിക്കുന്നത്. ഒരു കോര്‍ട്ട് റൂം ഡ്രാമയായ ചിത്രത്തിന്റെ തിരക്കഥ എഴുതിയിരിക്കുന്നത് ജിത്തു ജോസഫും ശാന്തി മായാദേവിയും ചേര്‍ന്നാണ്.
സിനിമ റിലീസായ അന്ന് മുതല്‍ വമ്പിച്ച പ്രക്ഷേക സ്വീകാര്യത ലഭിച്ചാണ് നേര് മുമ്പോട്ട് പോയ്‌ക്കൊണ്ടിരിക്കുന്നത്. ഇപ്പോള്‍ ചിത്രം ആഗോളതതലത്തില്‍ 50 കോടി കളക്ഷന്‍ നേടിയെന്ന വാര്‍ത്തയാണ് പുറത്ത് വരുന്നത്. മോഹന്‍ലാലും അത് സ്ഥിരീകരിച്ചിട്ടുണ്ട്.
ഫെയ്‌സ്ബുക്കിലൂടെയാണ് അദ്ദേഹം നേരിന്റെ കളക്ഷന്‍ റിപ്പോര്‍ട്ട് സ്ഥിരീകരിച്ചത്. കൂടാതെ പ്രേക്ഷകര്‍ക്കും ഒപ്പമുണ്ടായ എല്ലാവര്‍ക്കും അദ്ദേഹം നന്ദിയും പറഞ്ഞു. പുലിമുരുകന്‍, ഒപ്പം, ലൂസിഫര്‍, ദൃശ്യം എന്നീ സിനിമകളാണ് ഇതിന് മുമ്പ് അമ്പത് കോടി ക്ലബ്ബില്‍ ഇടം പിടിച്ച മോഹന്‍ലാല്‍ ചിത്രങ്ങള്‍.
