തിരുവനന്തപുരം (Thiruvananthapuram) : യുവതിക്ക് നേരെ വെടിയുതിർത്ത സംഭവത്തിൽ അന്വേഷണം ഊർജിതമാക്കി പൊലീസ്. പരിക്കേറ്റ് ആശുപത്രിയിൽ കഴിയുന്ന ഷിനിയുടെ മൊഴി പൊലീസ് രേഖപ്പെടുത്തി. മൊഴിയിൽ നിന്ന് പ്രതിയെ കുറിച്ചുള്ള സൂചന പൊലീസിന് ലഭിച്ചെന്നാണ് വിവരം. അവധി ദിവസമായ ഇന്നലെ രാവിലെ വീട്ടിൽ കയറിയാണ് യുവതിയെ എയർ ഗൺ ഉപയോഗിച്ച് വെടിവെച്ചത്. മുൻ വൈരാഗ്യമാണ് ആക്രമണത്തിന് പിന്നിലെന്നാണ് സൂചന.
ഷിനിയുമായോ ഭർത്താവുമായോ വെടിയുതിർത്ത സ്ത്രീക്ക് വൈരാഗ്യമുണ്ടാകാം എന്നാണ് പൊലീസ് പറയുന്നത്. എന്നാൽ അതിന് കാരണമെന്തെന്ന് അന്വേഷണ സംഘത്തിന് വ്യക്തതയില്ല. അക്രമിയായ സ്ത്രീയെ കുറിച്ച് പൊലീസിന് വിവരം ലഭിച്ചിട്ടുണ്ടെന്നാണ് സൂചന.ഷിനിയുടെ വീട്ടിൽ എത്തിയ അക്രമിയുടെ സിൽവർ കളർ കാറിന്റെ നമ്പർ വ്യാജമാണെന്ന് പൊലീസ് കണ്ടെത്തിയിരുന്നു. സി സി ടിവി കേന്ദ്രീകരിച്ച് പൊലീസ് നടത്തിയ അന്വേഷണത്തിൽ ആക്രമണത്തിന് ശേഷം പ്രതി ചാക്ക ഭാഗത്തേക്ക് രക്ഷപ്പെട്ടതായാണ് വിവരം. കാറ് കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്.
