കേപ്ടൗണ്‍ : ദക്ഷിണാഫ്രിക്കയ്‌ക്കെതിരായുള്ള രണ്ടാം ടെസ്റ്റിനുള്ള ഇന്ത്യന്‍ ടീമിലേക്ക് ആവേശ് ഖാന് ഇടം പിടിച്ചു. പരിക്കേറ്റ പേസര്‍ മുഹമ്മദ് ഷമിക്ക് പകരമാണ് യുവ പേസര്‍ ആവേശ് ഖാനെ ടീമിലെടുത്തത്. ഷമിക്ക് ആദ്യ മത്സരത്തില്‍ കളിക്കാന്‍ സാധിച്ചിരുന്നില്ല. ഫിറ്റ്‌നെസ് വീണ്ടെടുക്കുമെന്ന് കരുതിയെങ്കിലും അതുണ്ടായില്ല. ഈ സാഹചര്യത്തിലാണ് ആവേശ് ഖാന് ടീമിലേക്ക് വിളി വന്നത്.
ആവേശ് ഖാന് വരുന്നതോടൊപ്പം ശാര്‍ദുല്‍ ഠാക്കൂറിന്റെ സ്ഥാനം തെറിക്കാന്‍ സാധ്യത ഏറെയാണ്. ആദ്യ ടെസ്റ്റില്‍ ദക്ഷിണാഫ്രിക്കയുടെ ബാറ്റിംഗ് ചൂട് കൂടതലായി അറിഞ്ഞത് ശാര്‍ദുല്‍ ഠാക്കൂറായിരുന്നു. 19 ഓവറില്‍ 5.32 ഇക്കോണമിയില്‍ 101 റണ്‍സാണ് താരം വഴങ്ങിയത്.
ആവേശ് ഖാന്റെ സമീപകാല പ്രകടനമാണ് ടീമിലേക്ക് എടുക്കാന്‍ കാരണം. മികച്ച രീതിയില്‍ ബൗള്‍ ചെയ്യുന്ന യുവ താരം 38 ഫസ്റ്റ് ക്ലാസ് മത്സരങ്ങളില്‍ നിന്ന് 149 വിക്കറ്റുകളും സ്വന്തമാക്കിയിട്ടുണ്ട്. രണ്ട് ടെസ്റ്റുകളുടെ പരമ്പരയില്‍ ആദ്യ ടെസ്റ്റ് തോറ്റ ഇന്ത്യക്ക് രണ്ടാം മത്സരം നിര്‍ണ്ണായകമാണ്. ജനുവരി മൂന്നിനാണ് രണ്ടാം ടെസ്റ്റ് അരങ്ങേറുക.
