തൃശൂർ: സബ്സിഡി സാധനങ്ങളില്ലാത്തതിനെ തുടർന്ന് നാട്ടുകാരുടെ പ്രതിഷേധത്തെ തുടർന്ന് സപ്ലൈകോയുടെ ക്രിസ്മസ് ചന്ത ഉദ്ഘാടനം മുടങ്ങി. പ്രശ്നങ്ങളെ തുടർന്ന് ഉദ്ഘാടകനായ മേയർ എം കെ വർഗീസും, എം.എൽ.എ പി ബാലചന്ദ്രനും ചടങ്ങ് പൂർത്തിയാക്കാതെ മടങ്ങി.
സബ്സിഡിയുള്ള 13 സാധനങ്ങൾ ഉണ്ടാകുമെന്നാണ് പറഞ്ഞിരുന്നത്. വലിയ പ്രതീക്ഷയോടെയാണ് സപ്ലൈകോയുടെ ചന്തയിലെത്തിയതെന്നും എന്നാൽ ഉദ്ഘാടനദിവസം തന്നെ സാധനങ്ങളില്ലാത്തത് അംഗീകരിക്കാൻ കഴിയില്ലെന്നും വാങ്ങാനെത്തിയ നാട്ടുകാർ പറഞ്ഞു.
ചന്ത തുടങ്ങുന്നതുമായി ബന്ധപ്പെട്ട് ചില അനിശ്ചിതത്വങ്ങളുണ്ടായിരുന്നുവെന്നും അതിനാലാണ് സാധനങ്ങളെത്തിക്കാൻ വൈകിയതെന്നും സപ്ലൈകോ അധികൃതർ അറിയിച്ചു. സബ്സിഡിയുള്ള 13 സാധനങ്ങളും ഉടൻ എത്തിക്കുമെന്നും സപ്ലൈകോ ഉദ്യോഗസ്ഥർ പറഞ്ഞു.
