ഒമ്പത് വയസ്സുകാരിയെ തട്ടിക്കൊണ്ടുപോയി പീഡിപ്പിച്ച് കൊലപ്പെടുത്തി. സംഭവം ഡല്‍ഹിയിലെ സ്വരൂപ് നഗറില്‍.. ഡിസംബര്‍ 12-നാണ് നാടിനെ നടുക്കിയ സംഭവം അരങ്ങേറിയത്. കേസില്‍ 52-കാരനെ പോലീസ് അറസ്റ്റ് ചെയ്തിട്ടുണ്ട്.
ഡിസംബര്‍ 12 ന് വീടിന് പുറത്ത് കളിക്കുകയായിരുന്നു കുട്ടി. അവിടെയെത്തിയ പ്രതി കാര്‍ യാത്ര വാഗ്ദാനം ചെയ്ത് വാഹനത്തില്‍ കയറ്റുകയായിരുന്നു. ശേഷം ഒറ്റപ്പെട്ട സ്ഥലത്തെത്തിച്ച് പീഡിപ്പിച്ചു എന്നാണ് പോലീസ് പറയുന്നത്. കുട്ടി കൊല്ലപ്പെട്ടതോടെ കൊലപാതകം മറച്ചവയ്ക്കുന്നതിനായി മൃതദേഹം ഇയാള്‍ കനാലില്‍ തള്ളിയതായും പോലീസ് വ്യക്തമാക്കി.
കുട്ടിയുടെ മാതാപിതാക്കള്‍ പോലീസിനെ അറിയിച്ചതിനെ തുടര്‍ന്ന് നടത്തിയ അന്വേഷണത്തിലാണ് പ്രതിയെ പിടികൂടൂന്നത്. സിസിടിവി ദൃശ്യങ്ങള്‍ കേന്ദ്രീകരിച്ച് നടത്തിയ അന്വേഷണത്തില്‍ സ്ഥലം ഉടമയാണ് കുട്ടിയെ തട്ടിക്കൊണ്ടുപോയതെന്ന് തിരിച്ചറിഞ്ഞു. ഇതേ ദിവസം കുട്ടി പ്രതിയുടെ കാറില്‍ ഇരിക്കുന്നത് കണ്ടതായി പോലീസും സ്ഥിരീകരിച്ചു. ചോദ്യം ചെയ്യലില്‍ പ്രതി കുറ്റസമ്മതം നടത്തി. മൃതദേഹം കണ്ടെടുക്കുന്നതിനായി കനാലില്‍ തിരച്ചില്‍ ആരംഭിച്ചെങ്കിലും ഇതുവരെ കണ്ടെത്താനായിട്ടില്ല.
തട്ടിക്കൊണ്ടുപോകല്‍, ബലാത്സംഗം, കൊലപാതകം എന്നീ വകുപ്പുകള്‍ പ്രകാരമാണ് പ്രതിക്കെതിരെ കേസെടുത്തിരിക്കുന്നത്. പോക്‌സോ കേസും ചുമത്തിയിട്ടുണ്ട്. എന്നാല്‍ 52കാരനായ പ്രതി ഒരു അപകടത്തില്‍ പെട്ട് നിലവില്‍ ചികിത്സയിലാണ്. പ്രതിയെ നിരീക്ഷിക്കുന്നതിനായി ആശുപത്രിയില്‍ ഉദ്യോഗസ്ഥരെ നിയോഗിച്ചിട്ടുണ്ടെന്നും പോലീസ് വ്യക്തമാക്കി.
