തിരുവനന്തപുരം ; നവകേരള സദസ്സുമായി ബന്ധപ്പെട്ടു കരിങ്കൊടി പ്രതിഷേധം നടത്തിയ കോൺഗ്രസ് പ്രവർത്തകരെ പൊലീസും സി പി എം പ്രവർത്തകരും ചേർന്ന് വ്യാപകമായി കൈയേറ്റം ചെയ്തിരുന്നു.
നൂറു കണക്കിന് യൂത്ത് കോൺഗ്രസ് – കെ എസ് യു പ്രവർത്തകർക്കാണ് മർദ്ദനം ഏറ്റിരുന്നത് . നവകേരള യാത്ര ആരംഭിച്ചത് മുതൽ യു ഡി എഫ് ശക്തമായ പ്രതിഷേധമാണ് നടത്തിവന്നിരുന്നത്. കറുത്ത വസ്ത്രം ധരിച്ചും കരിങ്കൊടി കാട്ടിയും ആയിരുന്നു പ്രതിഷേധങ്ങളിൽ അധികവും.
നവകേരള സദസ്സിൽ മുഖ്യമന്ത്രി യാത്ര ചെയ്തിരുന്ന വിദേശ നിർമ്മിത ബസിനു പുറകെ സുരക്ഷാ ഉദ്യോഗസ്ഥരെ കൂടാതെ ഡി വൈ എഫ് ഐ, എസ് എഫ് ഐ പ്രവർത്തകരും സുരക്ഷാ വലയം തീർത്തു സഞ്ചരിച്ചിരുന്നു. ആദ്യ ഘട്ടങ്ങളിൽ പൊലീസാണ് കരിങ്കൊടി പ്രതിഷേധക്കാരെ തടയുകയും കസ്റ്റഡിയിൽ എടുക്കുകയും ചെയ്തിരുന്നു. എന്നാൽ ഇതിനു അറുതി വരുത്താൻ കഴിയാതെ വന്നതോടെ യാത്രയുടെ അനൗദ്യോഗിക സംരക്ഷണ ചുമതല പാർട്ടി ഏറ്റെടുക്കുകയായിരുന്നു. പിന്നീട് സമാനതകളില്ലാത്ത മർദ്ദന മുറകളാണ് ഉണ്ടായിരുന്നത്.
ചില സ്ഥലങ്ങളിൽ മഫ്തി പോലീസുകാരാണെന്നു തോന്നിക്കുന്ന തരത്തിൽ കാക്കി പാന്റും വെള്ള ടീഷർട്ടും ധരിച്ച ഡി വൈ എഫ് ഐ പോലീസിനോടൊപ്പം ചേർന്ന് പ്രതിഷേധക്കാരെ മർദിക്കുന്ന നിരവധി സംഭവങ്ങൾ റിപ്പോർട്ട് ചെയ്തിട്ടുണ്ട്. ഒടുവിൽ യൂത്ത് കോൺഗ്രസ് പ്രവർത്തകനായ അംഗ പരിമിതന്റെ മുതുകിൽ സി പി എം പ്രവർത്തകൻ ചാടി ചവിട്ടുന്ന വീഡിയോ പുറത്തുവന്നിരുന്നു.
എന്നാൽ ഈ അക്രമങ്ങളെയെല്ലാം രക്ഷപ്പെടുത്തലുകളായി ചിത്രീകരിച്ച മുഖ്യമന്ത്രി നടത്തിയ പ്രസംഗം വിവാദമായി. ഒടുവിൽ മുഖ്യമന്ത്രിയുടെ അംഗരക്ഷകൻ തന്നെ സമരക്കാരെ മർദിച്ച സംഭവം കൂടുതൽ വിവാദം വിളിച്ചുവരുത്തി. ഇതേതുടന്നാണ്‌ കേരളത്തിലെമ്പാടും ഉള്ള പോലീസ് സ്റ്റേഷനുകൾക്ക് മുന്നിൽ കോൺഗ്രസ് പ്രതിഷേധയോഗം അരങ്ങേറിയത്.
