കേരളത്തില്‍ കഴിഞ്ഞ 24 മണിക്കൂറിനിടെയുള്ള കോവിഡ് കേസുകളില്‍ വര്‍ദ്ധനവ്. കേന്ദ്ര ആരോഗ്യമന്ത്രാലയത്തിന്റെ കണക്ക് പ്രകാരം സംസ്ഥാനത്ത് കഴിഞ്ഞ 24 മണിക്കൂറിനുള്ളില്‍ 292 പേര്‍ക്കാണ് കോവിഡ് സ്ഥിരീകരിച്ചത്. ഈ കണക്കുകള്‍ വ്യക്തമാക്കുന്നത് കേരളത്തില്‍ ഓരോ ദിവസവും കോവിഡ് കേസുകള്‍ ഉയര്‍ന്നുവരുന്നു എന്നുള്ളതാണ്. കൂടാതെ 3 മരണവും സ്ഥിരീകരിച്ചിട്ടുണ്ട്.
ഇപ്പോള്‍ കേരളത്തില്‍ കോവിഡ് ബാധിച്ച് ചികിത്സയിലുള്ളവരുടെ എണ്ണം 2041 ആണ്. കഴിഞ്ഞ 24 മണിക്കൂറിനിടെ രാജ്യത്ത് ഏറ്റവും കൂടുതല്‍ കോവിഡ് സ്ഥിരീകരിച്ചതും കേരളത്തിലാണ്. കോവിഡിന്റെ ജെഎന്‍ 1 ഉപവകഭേദം കേരളത്തില്‍ കണ്ടെത്തിയതിന് പിന്നാലെയാണ് പുതിയ കേസുകളില്‍ വര്‍ദ്ധനവുണ്ടായിരിക്കുന്നത്.
എന്നാല്‍ രാജ്യത്ത് ഏറ്റവും കൂടുതല്‍ കോവിഡ് പരിശോധന നടക്കുന്നത് കേരളത്തിലായതിനാലാണ് കേസുകളും കൂടുതലായി റിപ്പോര്‍ട്ട് ചെയ്യുന്നതെന്നാണ് സംസ്ഥാന ആരോഗ്യവകുപ്പിന്റെ വിശദീകരണം. കൊവിഡ് കേസുകള്‍ വര്‍ദ്ധിക്കുന്നതില്‍ ആശങ്ക വേണ്ടെന്നും അധികൃതര്‍ അറിയിച്ചു.
