തൃപ്രയാർ: യുവാവിന്റെ വീട്ടിൽ നിന്നും സ്പീഡ്പോസ്റ്റിൽ വന്ന പാഴ്സലിലുമായി 14.19 ഗ്രാം എംഡിഎംഎ പിടികൂടി. കഴിമ്പ്രം നെടിയിരുപ്പിൽ അഖിൽരാജിനെ (25) വാടാനപ്പള്ളി എക്സൈസ് റേഞ്ച് ഇൻസ്പെക്ടർ എസ്.എസ്.സച്ചിനും സംഘവും അറസ്റ്റ് ചെയ്തു.
അഖിൽരാജ് എംഡിഎംഎ വിൽപന നടത്തുന്നുണ്ടെന്ന രഹസ്യ സൂചനയെത്തുടർന്ന് എക്സൈസ് സംഘം നടത്തിയ പരിശോധനയിലാണ് ഇയാളുടെ വീട്ടിൽ നിന്ന് 3.75 ഗ്രാം എംഡിഎംഎ കണ്ടെത്തിയത്. ഈ സമയത്ത് പോസ്റ്റ് ഓഫിസിൽ നിന്ന് വന്ന സ്പീഡ് പോസ്റ്റ് പാഴ്സൽ സംശയം തോന്നി പരിശോധിച്ചപ്പോൾ എക്സൈസ് സംഘത്തിന് 10.44 ഗ്രാം എംഡിഎംഎയും കൂടി ലഭിച്ചു.
തപാലിൽ വന്ന പാഴ്സലിലെ വിലാസം പോണത്ത് ബാലുവിന്റെയും ഫോൺ നമ്പർ അഖിൽരാജിന്റേതുമായിരുന്നു. ബാലുവിനെ പിടികൂടാനായിട്ടില്ല. പാഴ്സലിനുള്ളിൽ മറ്റൊരു പൊതിയിലാണ് ലഹരി മരുന്ന് രഹസ്യമായി ഒളിപ്പിച്ചിരുന്നത്. മധ്യപ്രദേശ് ജബൽപൂരിലെ ഏജൻസിയാണ് സ്പീഡ് പോസ്റ്റ് പാഴ്സൽ അയിച്ചിട്ടുള്ളത്.
