നടൻ സിദ്ദിഖ് ഇന്ന് പോലീസിന് മുന്നിൽ ഹാജരാകും. സുപ്രീംകോടതിയിൽ നിന്ന് ഇടക്കാല ജാമ്യം ലഭിച്ചതിന് പിന്നാലെ ചോദ്യം ചെയ്യലിന് ഹാജരാകാൻ തയ്യാറാണെന്ന് സിദ്ദിഖ് പൊലിസിന് ഇ-മെയിൽ അയക്കുകയായിരുന്നു. ഇതിനു പിന്നാലെയാണ് അന്വേഷണ ഉദ്യോഗസ്ഥനായ നാർക്കോട്ടിക് സെൽ അസിസ്റ്റൻറ് കമ്മീഷണർ നോട്ടീസ് നൽകുകയും ചെയ്തത് . ഇന്ന് ചോദ്യം ചെയ്ത് ശേഷം സിദ്ദിഖിനെ വിട്ടയക്കും.
കേസിൽ ചോദ്യം ചെയ്യാൻ പൊലീസ് നോട്ടീസ് നൽകാത്ത സാഹചര്യത്തിലാണ് സിദ്ദിഖ് പോലീസിന് അങ്ങോട്ട് കത്ത് നൽകിയത്.
ബലാത്സംഗ കേസിൽ ഹൈക്കോടതി മുൻകൂർ ജാമ്യം തള്ളിയെങ്കിലും സുപ്രീംകോടതി രണ്ടാഴ്ച്ചത്തേക്ക് സിദ്ദിഖിൻ്റെ അറസ്റ്റ് തടഞ്ഞിരുന്നു. ഇതോടെയാണ് ഒളിവിലായിരുന്ന സിദ്ദിഖ് പുറത്തിറങ്ങിയത്.
2016ൽ തിരുവനന്തപുരത്തെ മാസ്ക്കറ്റ് ഹോട്ടലിൽ വെച്ച് നടൻ സിദ്ദിഖ് ബലാത്സംഗം ചെയ്തുവെന്ന നടിയുടെ പരാതിയിലാണ് കേസ്. പരാതിക്കാരിയെ തിരുവനന്തപുരത്ത് വെച്ച് കണ്ടിരുന്നതായി നടൻ സിദ്ദിഖ് സമ്മതിച്ചിട്ടുണ്ട്.
