കഴിഞ്ഞ വര്‍ഷം വമ്പന്‍ ഹിറ്റുകളായ ചിത്രങ്ങളില്‍ ഒന്നായിരുന്നു ‘ജയിലര്‍’. രജനികാന്ത് നായകനായി എത്തിയ ചിത്രം സംവിധാനം ചെയ്തത് നെല്‍സണ്‍ ദിലീപ് കുമാറായിരുന്നു. മലയാളി താരമായ വിനായകന്‍ വില്ലനായി എത്തിയ ചിത്രം കേരളത്തിലും മികച്ച വിജയമായിരുന്നു.. മോഹന്‍ലാലും അതിഥി വേഷത്തിലെത്തിയ ചിത്രം കേരളത്തിലെ ആരാധകരും ഇരു കൈയ്യും നീട്ടിയാണ് സ്വീകരിച്ചത്. സണ്‍ പിക്‌ചേഴ്‌സ് നിര്‍മ്മിച്ച ചിത്രത്തിന്റെ സംഗീതം ഒരുക്കിയിരുന്നത് അനിരുദ്ധായിരുന്നു.
എന്നാലിപ്പോള്‍ ചിത്രത്തിലെ ഒരു കിടിലന്‍ രംഗത്തിന്റെ മേക്കിങ് വീഡിയോ അണിയറ പ്രവര്‍ത്തകര്‍ പുറത്ത് വിട്ടിരിക്കുകയാണ്. രജനിയുടെ മുന്നില്‍ ട്രക്ക് വട്ടം മറിയുന്ന രംഗത്തിന്റെ മേക്കിങ് വീഡിയോയാണ് റിലീസ് ചെയ്തിരിക്കുന്നത്. സീനിനെക്കുറിച്ച് രജനിയോട് കൃത്യമായി പറഞ്ഞ് കൊടുക്കുന്ന നെല്‍സണെയും വീഡിയോയില്‍ കാണാം. സിനിമയിലെ തന്നെ ഏറ്റവും ഹൈലൈറ്റും മാസ് രംഗവുമായ ഈ സീന്‍ ഒറ്റ ടേക്കിലാണ് രജനി പൂര്‍ത്തിയാക്കിയത്.
